عاوز رأيكم في عربية معروضة عليا

السلام عليكم ورحمة الله وبركاته يا أهل الخير
أولا أنا دخلت المنتدى بالصدفة ولكن كانت صدفة جميلة جدا اني الاقي ناس محترمة بتفيد بعضها وتنفع نفسها وغيرها لوجه الله ربنا يبارك فيكم ويجعل ده في ميزان حساناتكم باذن الله ومش هطول عليكم كتير

عاوز رأيكم في عربية معروضة عليا هي نوبيرا 2 خليجي معاقين موديل 2002 عاملة 68000 كيلو لونها أسود ومرفوع الحظر بتاعها وجبت ميكانيكي فحصها قالي زي الفل مافيش غير شوية دقدقة في السكوترات وساعتها صاحبها قال عاوزة تغير جلب المقصات
المهم سعرها المطلوب والنهائي 48 ألف وعلى فكرة العربية فعلا ماشاء الله عليها حلوة وفيها امكانيات جميلة مش موجودة في النوبيرا المصري وللعلم يا جماعة دي أول عربية هشتريها من فلوسي يعني تعب وشقى وعلشان كدة عاوز أعرف رأيكم علشان الواحد مش كل شوية هيجيب عربية

منتظر ردكم وبارك الله فيكم

بالمناسبة أنا اسمي أحمد والاسم اللي مسجل بيه في المنتدى ده علشان كل ما اكتب اسم يطلع موجود رحت كتبت اسم المدير الاقليمي للشركة اللي بشتغل فيها:shyy:
والسلام عليكم ورحمة الله وبركاته

تم تعديل عنوان الموضوع لمخالفتة القاعدة 16 من قواعد المنتدى

برجاء عدم تكرار المخالفة منعا لتوقيع عقوبات

يرجى مراجعة قوانين المنتدى

مشرف عام الكورى و الماليزى

شرفتنا يا استاذ احمد وان شاء الله ربنا هيديلك كل ما فى نفسك
النوبيرا عربية جميله جدا طبعا ومحدش ينكر ذلك
وطبعا ما ذكرتش حضرتك هى فتيس اتوماتيك ولا فتيس مانوال
وسوف ننتظر اصحاب النوبيرا الاعزاء ليفيدونا بالرد الازم واستفسارتهم عليك ان شاء الله تعالى

ألف شكر يا استاذ خالد ربنا يبارك فيك
عندك حق أنا نسيت أقول انها اوتوماتيك

يا جماعة أنا منتظر الرد بالله عليكم حد يفيدني أنا محتار فعلا

انا من رايي ابعد عن المعاقين عشان قرفها كتيير وبتلككو في كل حته عشان ياخدو فلوس

هيه مانيوال ولا اتوماتيك

توكل على الله يا استاذ احمد النوبيرا فعلا عربيه جميله وتتحمل السفر وثابته وعائليه وقطع غيارها متوفره ورخيصه ويكفى انها وارد كوريا بس نصيحه لوجه الله سجل فى الشهر العقاري على طول خاصه انها معاقين

لو اتوماتيك ابعد عنها خاااااااااااااااااااااااا لص

العربية اوتوماتيك يا جماعة وبالنسبة لكونها معاقين الحظر بتاعها مرفوع والموضوع ده مافيهوش أي مشكلة

بعتذر على مخالفة قوانين المنتدى في عنوان الموضوع يا مشرف القسم فعلا ما قرأتش القوانين قبل كتابة الموضوع

فتيس الاوتوماتيك بتاع النوبيرا واللانوس به مشاكل كان فيه واحد صاحبى معاه لاوس اوتوماتيك فى سنه 2000 وكانت مجنناه

بصراحة كنت متوقع مساعدة و ردود أكتر من كدة
كنت عاوز أعرف هل العربية حلوة ولا لأ وهل تستاهل السعر ده ولا لأ
عموما شكرا للناس اللي ردت وحاولت تساعد

اخى / لابد من المعاينه بالرؤيه العينيه
النوبيرا عربيه ممتازة وعائليه وكبيرة وحلوة واى حد يتمناها
اقولك/ شوف ميكانيكى كويس شاطر او سمكرى
وظبط معاه الاول قبل ما تاخد العربيه ليه
وبعد كده خد له العربيه ويكشفلك على اساسيتها وحوضها وقوايمها وماتورها وفتيسها
وطبعا اهم شئ اساستها ثم فتيسها لانها اتوماتيك

ألف شكر يا استاذ خالد
أنا عملت كدة فعلا والميكانيكي قالي انها زي الفل وركبها وجربها وشكرلي فيها جدا
وقالي بصراحة تستاهل 47 ألف وفتيسها تمام
هتوكل على الله وربنا يكفينا شرها

اقتباس:

---

المشاركة الأصلية كتبت بواسطة shaddadfalcon1

انا من رايي ابعد عن المعاقين عشان قرفها كتيير وبتلككو في كل حته عشان ياخدو فلوس

---

لو العربية مرفوع حظرها زي الاخ ما بيقول
ما حدش ليه عنده حاجة زيها زي اي عربية تانية

اتوكل على الله بس حرص من المطبات مع الأوتوماتيك ,

شكرا يا استاذ أكرم ويا استاذ محمود
بس كنت عاوز أعرف رأي حضراتكم لو السعر كدة مناسب ولا غالي لأن في ناس قالولي تستاهل 35 ألف بس
وده طبعا احبطني جدا لأن صاحبها سعره النهائي 48 ألف؟

هو السعر عالى شوية يعنى لو 45 يبقى كويس لو الحالة كويسة ذى مابتقول والورق سليم ومفيهاش مشاكل
موضوع انها اتوماتك وموديل 2002 فهيحتاج صيانة ومتابعة دورية غير المانيول وان كان انا شايف تبعد عن الأتوماتك احسن

صلى استخاره يابو حميد وان شاء الله

ربنا يوفقك لما فيه الخير.....وانا شايف ان عربيه

بالموصفات دى تبقى ممتازه جدا وكمان عدادها قليل

والنوبيرا عربيه واسعه وموتورها قوى اللى عاجبنى

فى العربيه دى انها استيراد تبع المعاقين صدقنى وعن تجربه

هتلاقى احسن من النوبيرا اللى هنا بتير جدا

لان كل حاجه فيها تقفيل كورى مش المصرى التعبان

انا معايا لانوس كانت معاقين برده احسن من اللانوس المصرى

ومش هتحس بالفرق ده غير لما تجرب الكورى وتجرب المصرى

ألف شكر يا استاذ srm
بارك الله فيك أنا فعلا صليت استخارة وربنا يقدملي اللي فيه الخير
شكرا جزيلا على ردك
بس اللي هيجنني الناس اللي قالتلي 35 ألف دي
أنا عمري ما سمعت عن السعر ده لعربية بالمواصفات دي

لا طبعا 35 الف قليله طبعا على عربية بالشكل ده

انا مش حكلمك عن السعر لأنى مش عارفة
بس انا خالى كان عنده نوبيرا 1 اوتوماتيك (منطقة حرة) يعنى كورى برده
عذبته وطلعت عينية وباعها :B4_237:وجاب نوبيرا 2 مانيوال (منطقة بردة)
النوبيرا 2 لو هى استيشن بيبقى الأوتوماتيك بتاعها ممتاز بيسموه المدفع
لو هى سيدان فكر كتير وأسأل عن تغييره الى مانيوال لأن القرار ده ممكن تاخده بعد كده
وصلى استخارة تانى وربنا يعملك اللى فيه الخير. تحياتى:satelite:

السلام عليكم ورحمه الله وبركاته
بص يا باشا
أولاً - السعر ده ممكن يكون عالي شوية هي كويس عليها 45 لو حالتها فبريكة زي ما حضرتك بتقول ، موضوع مرفوعه ده ممكن يكون بوظ فيها حاجات معينه يقولك عليها عفشجي كويس .
ثانياً :35 ده سعر قليل جداً عليها ، لإن العربية إلي زي دي موديل 2001 معاقين بدون فك حظر عامله 45 ألف كيلو بتتباع برخصة تلات سنين للضباط مع تكتيف المعاق بشيكات بـ 38 ألف جنيه ودي فيها وجاب جامد كمان ، بس طالما إنك بتقول ورقها خالصان ببقي تمام وسجل في الشهر العقاري وخد كل إحتياطاتك دي فلوس مش ورق كراريس :)
ثالثاً : والأهم موضوع الأوتوماتيك هاتصرف عليه يا باشا يعني هاتخد العربية وتطلع علي واحد متخصص فتيس نوبيرا وتغرملك 100 جنيه ولا حاجة وتكشف عليه تقولي زي مين أقولك في واحد من الأعضاء علي ما أتذكر كان عامل موضوع شكر عن فتيس النوبيرا الأوتوماتيك في القسم هنا دور عليه في آخر عشر صفحات ولا حاجة هتلاقيه إن شاء الله . لإن فتيس النوبيرا الأوتوماتيك لو فيه مشاكل هايتعبك وتصليحه رخم وغالي يعني أنا شفت ناس بتتكلم في تصليح بـ 2000 جندي وحاجات من دي وإنت في غني عن الكلام ده طالما إن فلوسك في جيبك لسه .
إحترامات

متشكر جدا يا جماعة على ردودكم ونصايحكم بجد ربنا يجازيكم خير ان شاء الله
أنا فعلا لازم أسأل على موضوع الاوتوماتيك بتاع النوبيرا لأن كتير قالوا فعلا انه مقرف بس في ناس تانية بتقول ان الخليجي مافيهاش المشكلة دي هي بس حكاية جلب المقصات دي
وياريت لو في أي أراء أو نصايح تانية تقولوهالي
ألف شكر