العربية يا جماعة بتسخن جامد الحرارة عدت ال95 والمروحتين شغالين والمؤشر كان بيزيد بردة وعلى فكرة معدل المياة كمان مش مزبوط .
عرض للطباعة
العربية يا جماعة بتسخن جامد الحرارة عدت ال95 والمروحتين شغالين والمؤشر كان بيزيد بردة وعلى فكرة معدل المياة كمان مش مزبوط .
تمام يافادي باشا
ولو عالجت التسريب وبرضه المشكله زي ماهي بص علي الزيت علشان كان عندي نفس الموضوع ده وانتهي باني غيرت الزيت علشان كان ابتدي يتحرق ومافيهوش عرق مع العلم انه لسه ماكملش 2000 كم وهو المفروض يتغير علي 3000
انا عندى نفس المشكه بالظبط
بس بقا انا عندى شئ عجيب شويه.. الحراره بتكون على 90-92.. ده كويس.. امشى بسرعه شويه واتك بنزين او اشغل تكييف توصل 97-98... اهدى رجلى من ع البنزين او ابطل التكييف.. ترجع 90=92 بعد خمس دقايق مثلا
بترعب انا من كلمه وش السلندر دى.. عاملالى بعبع
دا ريداتير يا باشا
اقولك ليه
شغلت التكييف يبقي المفروض درجه الحراره تقل علشان المروحتين بيكونوا شغالين علي السرعه الاولي دا اولا
شغلت التكييف و زودت السرعه و درجه الحراره بتعلي مش بتنزل يبقي دا الريداتير فيه حاجه علشان الحاجه الوحيده اللي ممكن تسخن العربيه و انت بتجري لو دوره الميه مظبوطه و مفيهاش تسريب هوا الريداتير و ربنا يوصلك للسبب
انا رايح بكره انضف الدروه واكبس ميه اشوف فيه تسريب ولا لا
ربنا يسهل
عندي نفس المشكله بالظبط
فيه فكره واحد قالي عليها لسا مجربتهاش هجربها واقولك
ان الشكمان مش ايكوتيك بيكون الشكمان بتاع القديم ال 1600
ده على اساس ان المكنه 2000 والفكره بتقول
ان الشكمان مش بياخد العادم كله بيرد شويه منه للمكنه بتسخنها
لو غيرت الشكمان لايكوتيك بيكون أوسع ومناسب لكميه العادم ومش هيكون
فيه رد منه
دي فكره انا مجربتهاش بس هجربها الاسبوع ده
سلام عليكم
لو الشكمان اللي في العربيه بتاع ال 1600 و المتور 2000 اكيد هيسخن العربيه لانه مش بيطرد العادم كله و بيكتم المتور دا اساسي لازم يتغير من غير اي حاجه لانه بيأثر علي عمر المتور
الحرارة بتعلى و دى فيكترا ايه اتوماتيك يعنى كده الحرارة فى العادى عشان متتعبش نفسك و تصرف كتير و مش هتلاقى نتيجه قوية
فى تسريب فى دورة المية او الترمستات مخرفة اضغط دورة المية
احتمالات كتيره بس الشكمان ابرزها
انا ياجماعة بشكركم جميعا على المساعدة .انا ذهبت لكهربائى .
قالى لازم العربية تسخن لان فى سلك مقطوع بيخلى المروحة مش بتشتغل على السرعة الثانية.
وصل السلك والعربية بقت تمام .لكن السخونية بتزيد مع التكييف ومؤشر البنزين بيقل . و بعدلما اطفى التكييف االحرارة تنزل ومؤشر البنزين يعلى .
غريبه قوى موضوع البنزين
الحرارة تزيد ممكن
بص يا فادي هقولك كلمتين و متقولهمش لعدوك :d
طالما بتشغل التكييف فا العدادات تلعب اللي هوا الحراره تزيد و البنزين يقل يبقي يا باشا و انت مغمض تراجع علي سلوك الارضي علشان دا هيكون السبب الوحيد ان العدادات تعمل كده و اي خدمه
اتفق معك فى الراى المشكلة ان شاء الله مشكلة سلك ملمس او قفلة فى حاجة معينة التوكيل بيبقى عندة جهاز حس ذاتى بيمشية فو ق السلك والضفيرة فبيعرف القطع او القفلة فين بدل ما تصرف عند الكهربائية كتير روح للتوكيل وابدا معاهم من لعب العدادات وبلغهم قلقك من الكهرباء
اه شفت الجهاز ده فى منصور بس مشفتوش فى مقار
انا يا جماعة لغيت الترموستات اللى فى الكوع الحرارة مش بتعلى نهائى ولا حتى مع تشغيل التكييف .ايه رأيكم اجيب ترموستات جديدة ولا الغى الترموستات .
فرقت معاك كتير ياباشا لما لغيت الترموستات؟؟؟؟؟؟؟؟؟؟
بصراحة الحرارة تحت ال90 بس مش عارف كده صح ولا غلط على العربية . لان اكيد مادام العربية نازلة بالترموستات يبق مش المفروض تتشال .
الترموستات منظم لدرجة حرارة المية جوه الموتور لأن دى مواتير حامبة
يعنى اركب ترموستات جديدة بدل اللى كانت راكبة فى العربية .
ده المفروض و الصح
الفكترا الاية لغاية 98 بالتكييف عادى جدا و الكلام دة انا متاكد منة لانة بيحصل فى عربيتى و سالت علية كتير اوى
بس المشكلة ان المية مش مظبوطة و دة لان 98 فى الدورة المظبوطة المضغوطة تعتبر قليلة لان فى الدورة دى درجة الغليان بتاعة المية تساوى 123 درجة و هى كدة بعيدة عن درجة الغليان بمدى 25 درجة
لكن لما يكون فى تنفيس فى الضغط كدة درجة 98 هتكون قريبة جدا من درجة الغليان بتاعه المية اللى هى 100 درجة
الفرق درجتين بس و دة طبعا مقلق جدا
راجع على كل الخراطيم و الطبب و الردياتير و اهم خراطيم ممكن متاخدش بالك منهم الخراطيم اللى جنب الدينامو و جنب حساس الكولانت " فى جنبها خرطومين واحد من فوق و واحد تحتية بشوية و لو فية تسريب هتلاقى الحتة اللى حواليها مجيرة او مصفرة شوية "
و يا رب المشكلة تتحل على كدة و متطلعش فى الردياتير او فى الجوان او فى الطرمبة بتاعه المية
متشكر يا باشا لكن ايه رأى حضرتك فى موضوع الترموستات ده.
لازم يتحط
فى الخليجى محطوط يبقى ملوش علاقه بالجو
هو بيحافظ علي درجه حراره الموتور ..انما الحراره الخارجيه للجو اذا اثرت فلها اللي يخفضها (رادياتيرومراوح)
لأن مواتير الألمانى متظبطش و لا تسحب الا و هى سخنه
اول شيء اتأكد ان الردياتير و سربنتينة التكييف نضاف مافيهمش طين و تراب و زفارة زيوت و شحوم , ادخل محطة و اغسلهم بجاز ثم بالماء بالمسدس و بلاش خرطوم الضغط العالي "الكرشر" لانة ممكن يسبب انثناء ريش السربنتينة و زيادة سددها
و ماتستهونش بالحكاية دي لانها بتفرق قوي و بتكتم تهوية الردياتير و تسخن العربية في الطريق المفتوح او مع التكييف لان الموتور بيسخن اكتر و مافيش مقابل دة سريان تيار هواء بارد مقابل نتيجه وساخه السربنتينة و انسدادها
ثانيا اتأكد ان الردياتير سالك و مافيهوش صدأ او املاح
ثالثا تأكد ان الخراطيم مافيهاش اي تسريب
و مؤكد ان عندك تسريب لان مستوى المياة بينقص
و بلغنا بالنتيجه
اكبر غلط
و لازم ترجع الثرموستات تاني, تجيب ترموستات جديد يكون نفس حرارة الفتح و الغلق (يعني الاصلي بتاع عربيتك بالضبط)
لانة بيحافظ على درجه الحرارة المطلوبة للتشغيل
و دة حايفرق معاك كتير لما الصيف يخلص (كلها شهرين) و تلاقي العربية بتبرد في الطوالي و تبطل و تستهلك بنزين و الصبح ماتمشي الا لما تسخنها كويس يا أما تبطل
و تلاقي شوية حريق ني اول الدوارة و استهلاك وقود و أداء سيء طول الجو البارد
كلام 100%
و اى الغاء للأساسيات ما بحبوش