الموضوع: تقرير صيانة ال20000 و انطباعى عن البرسونا بعد سنة كاملة و...... أجمل عربية فى الدنيا

أعضاء المنتدى الجميل أد إيه كنت سعيد فى آخر مقابلتين فى العين السخنة و الرحاب لما جالى أكتر من عضو و قالولى إنهم اشتروا البرسونا و فيه منهم كمان جاب الجين بعد ما قروا تقرير ال1000 اللى كتبته عن البرسونا و اللى هو بصراحة كانت أحسن صيانة ادتها حقها.
دلوقتى راجعلكم تانى بعد سنة كاملة استعمال و بعد صيانة ال20000 اللى عملتها يوم الأحد اللى فات عشان أشارككم التجربة سواء الصيانة أو انطباعى العام عن العربية بعد مرور سنة بالتمام و الكمال و كلكم إن شاء الله معزومين على عيد ميلادها فى المقابلة الجاية بس ما تنسوش الهدايا

نيجى الأول للصيانة يوم الأحد اللى فات وصلت الحمد لله الساعة 9:10 ص و بالظبط 5 دقايق و جالى مهندس/ محمد عبد الهادى مش عارف أدى انطباع عنه كان داخل بجدية كده شوية زى بتاعة أمناء الشرطة فى الكماين و سألنى عن مشاكلى فى العربية و قلتله السى دى بيعلق فى الكاسيت مش بيخرج قاللى إنهم غيروا النظام و بقوا بيبعتوا العميل التوكيل يصلح الكاسيت و يرجع يكيش الفاتورة من التوكيل إذا كان عيب تصنيع مش سوء استخدام مش عارف بصراحة إيه النظام الغريب ده بس قال إنهم بقوا ماشيين بالنظام ده عشان العملاء كانوا بيتضايقوا من تأخير الكاسيت عند التوكيل ما علينا ، المشكلة التانية كانت المالتى فنكشن بقى بيهرج بصراحة بعمل mute بيروح معلى أدوس mode يغير محطة الراديو يعنى حاجة آخر استعباط، المشكلة التالتة عضة الفتيس و تقله و سألنى خصوصا فى أنهى نقلة قلتله فى التانى و سجل ، المشكلة الرابعة صوت تزييق فى دواسة الفرامل ، المشكلة الخامسة صوت وراء فى المطبات كأن الشنطة كانت مفتوحة و بتتقفل. المهم سجل كل الشكاوى و سألنى إذا كنت غيرت تيل الفرامل قبل كده و لا لأ قلتله لأ فسأل يعنى لو لقيته محتاج يتغير أغيره و لا أرجعلك الأول قلتله لأ ارجعلى الأول راح رادد قايللى لو رجعتلك يبقى مش هيتغير النهارده عشان الوقت إنما لو غيرته علطول يتغير قلتله برده ما تغيروش مش لازم النهارده قاللى طب خللينى أبصلك عليه كده من غير ما أفك و راح بص على التيل و قاللى لأ كويس مش محتاج يتغير. سألته فى زيت 10000 قاللى موجود بس هيزود الصيانة 170 جنيه يعنى هتبقى كلها 840 جنيه هتستلم إن شاء الله على الساة 2:00 م سكت و استعوضت ربنا فى المبلغ المسكين و روحت قعدت مع محسن صالح شوية اتكلمنا فى العربية و عاملة إيه معايا و فى التأمين اللى قرب يخلص و شوية فى مشاكل الساجا و تكاليفها و قطع غيارها و بعدين استأذنته و روحت كارفور أتمشى شوية عشان أكسر الوقت.
المهم المهندس محمد اتصل بيا بالظبط الساعة 2:05 م و قاللى العربية خلصت تعالى عشان تستلمها ماشاء الله على الوقت المظبوط إيه الدقة دى؟.
المهم روحت استلم العربية قاللى كل حاجة اشتكيت منها اتعملت و المالتى فنكشن اتغير بس مش ده المهم قلتله إيه المهم بقى قاللى إن تيل الفرامل عايز يتغير ضرورى و إنه على آخره بصيتله باندهاش كده و قلت فى بالى مانت لسه قايل مافيهوش حاجة، و قلتله يعنى يقعد أد إيه كده قاللى لأ لازم يتغير فورا و سألته التيل بكام قاللى فى واحد ب300 بس عيبه إنه بيصفر و التيل الأصلى بتعاها ب1000 و ما بيصفرش قلتله شكرا و خدت العربية و مشيت.
دى تفنيطة الفلوس اللى اتدفعت فى الصيانة:-
4 ك زيت 10000: 266 جنيه
فلتر زيت: 41 جنيه
فلتر بنزين: 118 جنيه
أربع بوجيهات * 28 جنيه للبوجيه: 112 جنيه
مصنعية: 223 جنيه
إجمالى الضرايب على المصنعية و قطع الغيار و الزيت: 72 جنيه
خصم 15% على قطع الغيار عشان استيكر المنتدى: 40.65 جنيه
دفعت فى الآخر من غير الفكة 791 جنيه

دلوقتى بقى أقوللكم النتيجة: بالنسبة للكاسيت أنا مكسل أوى مشوار توكيل كلاريون مع إنه جنبى فى المهندسين، بالنسبة للمالتى فنكشن ماشاء الله لحد دلوقتى مافيهوش مشاكل و التزييقة بتاعة دواسة الفرامل انتهت و الصوت اللى كنت بسمعه وراء عند المطبات اختفى فعلا و الفتيس الحمد لله العضة راحت من التانى اتنقلت للتالت أدينى اتطمنت بالمعدل ده العضة تختفى خالص إن شاء الله بعد 3 صيانات من دلوقتى.
نيجى بقى للعنوان الأهم و أجمل عربية فى الدنيا بجد ماشاء الله عدت سنة كاملة و أنا لسه حاسس إنى مستلم العربية إمباح مش بس فى أداءها لأن ده عادى سنة مش كتير أنا أقصد إحساسى بيها، أنا فضلت مدة طويلة قبل ما أشتريها محتار و خايف و مقارنات مع عربيات تانية حوالى 7 شهور كاملة قبل آخد قرار نهائى بالشراء و أتحدى ناس كتير حذرونى منها و وقفوا قدامى زى والدى مثلا و الحمد لله ربنا وفقنى و أنا اللى كسبت الرهان فى الآخر و ركبت فعلا أجمل عربية فى الدنيا:-
أولا التوكيل: ماشاء الله فى تحسن قوى باستثناء موضوع الفتيس مافيش مشكلة اشتكيت منها ما اتحلتش و المالتى اتغير و الحمد لله كان موجود و العربية اتسلمت بالظبط فى الميعاد اللى اتقال، صحيح السعر حراء حبيتين بس دى عموما صيانة تقيلة و أغلب التوكيلات حراقة فى سعرها إنما بشكل عام أنا مبسوط من المعاملة و من النظام و من دقة الشغل المرة دى.
ثانيا الشكل: هو فى الأول و فى الآخر أذواق و كتير هيعتقد إنى بتكلم كده قصر ديل و إنى عشان راكب العربية بقنع نفسى إنما و الله العظيم أنا صادق و أنا بقوللكم إنها فى عينى أجمل عربية فى السوق فى فئتها أجمل بالنسبة لى من البى إم و من المازدا 3 و من الهوندا الأكورد و من الباسات و من الرينو الفلونس و من كل العربيات اللى بشوفها فى الشارع جنبى حقيقى بحس إنى راكب عربية أجمل فيهم كلهم و الوحيدة اللى بحس بغيرة بسيطة منها هى الجين 2 و مش دايما لأنى مقتنع تماما إنهم فئتين مختلفتين كليفت باك و سيدان و أنا عموما بفضل السيدان لأنها عائلية أكتر و بتدى وقار أكبر من الجين اللى إحساسها شبابى أكتر عشان كده برده من غير ما أزعل أصحاب الجين برده بحس عربيتى أحلى عشان محققالى كل اللى بحلم بيه فى شكل العربية ماشاء الله. لما بمشى جنب سيدان بحس بفخامتها و لما بمشى جنب عربية شبابى بحسها بقت اسبورت و أعتقدنى راكب جين.
ثالثا القيادة: متعة بمعنى الكلمة أنا عربيتى مانيوال هاى لاين ربنا يباركلى فيها بحس و أنا سايق إنى سايق عربية سباق و مرتاح فى كل حاجة مسكة الدركسيون و العدادات و الدواسات كل حاجة بسطانى الحمد لله و حاسس بتحكم فيها كأنى أنا اللى عامل العربية. الثبات اللى ماشاء الله يحاكى الألمانى بجد و المرة دى حسيت بيه على سرعات عالية أكتر بكتير من 120 اللى اتكلمت عنهم فى تقرير ال1000 جبت على العين السخنة و احنا راجعين 170 و لا كأنى جايب 110 مثلا و جبت على طريق راس سدر 160 و ماحدش حس لا والدى و لا خطيبتى و لا أختى و كلهم اتخضوا لما عرفوا إنى كنت ماشى على السرعة دى.
رابعا الأوبشنز: ماشاء الله على الباركينج سينسورز اللى اتعودت عليه لدرجة إنى بقيت أتلخبط لما أركن عربية والدى ماكنتش أعرف أد إيه مفيد إلا لما استعملته و بقيت فعلا حاسس بالفخر لوجوده فى عربيتى. المالتى اللى لسه مغيره بيسعفنى كتير أوى أثناء الطريق طبع لما كان بيبقى شغال كويس.
خامسا عوامل الأمان: الإير باجز ربنا ما يجعلنا نحتاجها كلنا يا رب بس طبعا أكيد مجرد وجودها مدينا إحساس بالأمان أما الفرامل فما شاء الله عليها أسعفتنى أكتر من و فى كذا موقف و ربنا يستر و تسعفنى لحد ما أشوف موضوع التيل ده.
سادسا استهلاك البنزين: بتعمل معايا العربية حاليا و ده قياسا على آخر مرة قسته حوالى 260 كم فى الصفيحة و أعتقد إنه رقم كويس مقارنة بفئة ال1600 و باقى الأعضاء.
سابعا سعر العربية: ما تستغربوش بس حقيقى أنا ببقى مستغرب و أنا ماشى فى الشارع و أشوف عربية زى الياريس 20000 زيادة و هى ضايعة فى ثباتها و اللانسر اللى أغلى بنفس القيمة تقريبا و شكلها أقل بمراحل و الجيتا اللى ب 70000 زيادة فى أول فئة و هى مافيهاش نصف الأوبشنز اللى فى البرسونا و اللى بيدفع 40000 زيادة فى المازدا 3 و هى صاجها أخف بكتير و اللى بيدفع 15000 زيادة فى السيراتو اللى مافياهش وسيلة أمان واحدة فى الفئة الأولى لا فرامل ABS و لا EPD و لا وسائد هوائية و لا ريموت سنتر حتى. ده أنا ساعات بيصعب عليا لما أشوف بى إم أو مارسيدس ماشيين قدامى بجنوط عادية أو ماعندهم باركينج سينسورز و الله بحس بالفخر أوى من العربية اللى أنا راكبها.

عشان كده بحس إنها أجمل عربية فى الدنيا و بجد يا جماعة و ده حلفان هتحاسب عليه و الله لو كان معايا 100000 زيادة كنت برده هجيب العربية دى و للعلم عشان الناس تبقى عارفة أنا جبتها كاش بفضل الله يعنى لو كنت دفعت الفلوس دى مقدم فى أى عربية تانية كنت هدفع قسط هايف أوى بس حقيقى ربنا يباركلى فيها أنا مش مستعد أستغنى عنها تماما و لا حسيت فى أى وقت لحد دلوقتى إنى نفسى فى غيرها.

[QUOTE=jisso82;3872860311]

المشاركة الأصلية كتبت بواسطة madoskin

جميل إنك سألت السؤال ده: و أنا بتكلم مع أ/ محسن صالح عن عربيتى سألنى عن حد من أصحابى كنت جبتهوله يشوف الساجا بس صاحبى لسه متجوز جديد و طبعا بيسدد حاليا ديون الجواز (ادعيله ربنا يفك كربه)
أسأل الله رب العرش العظيم أن يفك كربه
قلتله على ظروفه و بعدين كملت بإن بمتابعتى للمنتدى حاسس إن سياسة التوكيل غلط جدا فى تسويق الساجا بالذات دونا عن باقى موديلات بروتون لأن الساجا بتخاطب فئة مختلفة من العملاء يعنى اللى عايز يجيب عربية ب85000 و 1600 سى سى مش زى اللى عايز يجيب عربية اقتصادية ب65000 و 1300 سى سى الأول بيقارن بإيه و التانى بيقارن بإيه و الشكاوى اللى بقراها من معدل استهلاك البنزين اللى أكتر من عضو ساجاوى قال إنه يشبه استهلاك ال1600 و مش اقتصادى بالمرة، قطع غيارها فى التوكيل اللى قدامى و أيمن بيكتبها من المخزن كانت أعلى فى سعرها من قطع غيار الجين و ده غير مناسب تماما للتارجت اللى معمولة عشانه العربية لأن بمقارنة بسيطة بأهم منافسيها فى السوق زى اللانوس و الفيرنا هنلاقى الكلام ده كله فيهم أخف كتير و أكيد طبعا فيه ناس عاقلة و فاهمة هما بيختاروا الساجا ليه لأنها ماشاء الله صاجها أقوى كتير من العربيتين اللى اتكلمنا عليهم و ثباتها أعلى بمراحل بس برده احنا هنا بنخص فئة بعينها بتدور على ده أما الفئة العامة اللى بتدور على عربية اقتصادية يهمها جدا الصرف اللى بعد الشراء زى استهلاك البنزين و الصيانة و قطع الغيار و ده مافيش اهتمام بيه تماما يعنى أكيد منصور ما بيتعاملش مع صيانة الأوبل زى صيانة الشيفروليه و ماحدش يفهمنى غلط أنا مش قصدى أقلل من قيمة الساجا أو الناس اللى جايباها هى ماشاء الله عربية جميلة و أنا نفسى عايز أشتريها لخطيبتى بس كان يفترض بيهم يراعوا النسبة الأكبر الموجهة ليهم العربية دى فى السوق مش معقول أبدا إن قطع غياها تبقى أعلى من الجين و بشكل مستفز كمان.

جزاك الله خيرا على الرد و صدقني أنا معايا الساجا و كل ماأركبها أحمد ربنا انه وفقني لشراها و المشاكل زي البنزين بيتحسن مع الوقت و ده حقيقي معايا و قطع الغيار بتنزل في سعرها مع انتشار العربية و ده واقع