الموضوع: ماهو اصعب قرار اتخذته في حياتك ؟؟

هو قرار أحداثه قديمة شوية.. من 10 سنين بس :p


اللي حصل اني أول ما اتخرجت من 10 سنين اشتغلت مدرسة في مدرسة لغات، كنت بادرس لكي جي و شوية كده طبعا و لقيت اني هانسى حبة الانجليزي اللي اتعلمتهم في الكلية، فبدأت أدور على وظيفة تانية و بالفعل عملت انترفيو في شركة توظيف صاحبتها سيدة انجليزية محترمة جدددددددددا.. المهم عجبتها و سألتني تحبي تبدأي امتى؟ قلت لها مش قبل 4 أو 5 أشهر من دلوقتي (كنا ساعتها في فبراير) عشان ما أقدرش اسيب الولاد في المرحلة دي بعد ما أخدوا علية و بدأوا يتقدموا دراسيا. الست الصراحة قالت لي طيب انا كده هاجيب حد لحد ما تكلميني تاني لما تكوني قادرة انك تبدأي و ساعتها نتكلم تاني. و اتفقنا على هذا الأساس.


اللي حصل بأه اني بعد ما الولاد امتحنوا و اديتهم شهاداتهم نسيت خالص موضوع الست دي و بدأت أدور على حاجة بعض الظهر أشغل نفسي فيها و أنمي لغتي، و بالفعل اشتغلت بعد الظهر في مركز تعليم لغات و كنت بادي شباب و بنات في سني و اكبر و الحمد لله عملت معاهم شغل كويس. قبل ما اشتغل في المركز و ساعة ما قابلت صاحبة الشركة اياها كنت لابسة حجاب عادي.. يعني إيشارب قصير عادي و بلوزة و جيبة او بنطلون مش فارقة اوي.. بس برضه كان لبسي متحفظ.. انما بعد ما بدأت أقف قدام ناس كبار و أدرس لهم حبيت اني أطول حجابي اكتر و التزمت بالجيبات الواسعة و اللبس الفضفضا على أد ما أقدر.. انا باقول المعلومة دي عشان ليها اهمية كبيرة فيما هو آت.


في الوقت ده اللي كنت فيه الصبح في المدرسة و الولاد في أجازة و بعد الظهر في مركز تعليم اللغات، اتصلت بية الست الانجليزية عشان تفكرني بوعدي ليها و تقول لي انها عايزة تقابلني تاني.. و كان سبحان الله الاتصال ده جاي في وقته. رحت الانترفيو و اتفقنا على كل حاجة و هابدأ امتى و كله تمام..انما في آخر المقابلة قالت لي “انتي المرة دي لبسك ستايله مختلف عن المرة الأولانية اللي قابلتك فيها.. يعني كان حجابك قصير كده و عادي.. انما المرة دي انا شايفة ان حجابك بأه أطول و لبسك بأه اكتر تحفظا.. انا طبعا ماعنديش اعتراض على ستايل اللبس ده.. انما بالنسبة لعملائنا اللي معظمهم أجانب يفضل لو ترجعي تلبسي نفس ستايل لبسك الأولاني.. اللي هو طبعا انك مش هاتقلعي الحجاب.. لأ ده انتي هاتلبسي حجاب مودرن شوية زي السكرتيرات اللي اتعرفتي عليهم و انتي داخلة هنا.. ايه رأيك؟”
انا الصراحة اتفاجئت من تعليقها عشان انا كنت ناسية اصلا انا جيت لها أول مرة بإيه و المرة دي لابسة بطريقة مختلفة و الحوارات دي.. أنا كنت خلاص اتعودت على طريقة لبسي دي و مرتاحة فيها و مرتاحة لها و ماعنديش مشكلة.. لحد هي ما جت قالت لي البؤين دول.. طبعا مش هاقول لكوا اني قلت لها كلا و ألف كلا انا عمري ما هاغير طريقة لبسي و الرزق على الله و الكلام الكبير ده.. انا هاكون صريحة معاكوا لأقصى درجة و اقول اني قلت لها طيب اديني فرصة أفكر.

طيب انا هاكمل الحكاية في مشاركة تانية عشان اكيد انتوا زهقتوا

قلت لها اديني فرصة أفكر.. قالت لي أد ايه؟ قلت لها يومين.. هارد عليكي يوم الخميس (يومها كان التلات).. و بعدين فكرت و قلت لها.. و لا اقول لك.. خليها الأحد احسن.. قالت لي أوك.. هاستنى منك مكاملة يوم الأحد.

ماخبيش عليكوا انا مخي فضل يودي و يجيب.. و هنا بأه جه دور شوشو.. طبعا دي فرصته.. و خد عندك بأه كلام ييجي في دماغي من نوع يعني هي بتقول لك اقلعي الحجاب لا سمح الله؟ دي بتقول لك بس قصريه زي ما كنتي مقصراه قبل كده.. و يعني هو انتي كنتي مالك لما كنت لابسة ايشارب قصير؟ ما انتي طول عمرك لبسك ملتزم و حشمة.. ده حتى سنين الكلية كلها عدت من غير ما تلبسي بنطلون زي زميلاتك و لا تحطي ماكياج و لا حتى رتوش.. في حين ان زميلاتك اللي برضه محجبات كان الجينز و الروج عندهم اساسي.. يعني انتي مش هاتفجري يعني.. و بعدين دي فرصة ما تتعوضش.. و المرتب ضعف اللي انتي بتاخديه من المدرسة بعد نبح قلبك بالساعات.. و كلام طول اليوم مع واحدة انجليزية.. و مكتب بتاعك و تليفون و منظر.. يعني ده انتي تبقي غبية لو رفضتي الوظيفة عشان السبب ده..
اما عن الجانب الآخر فكنت باقول لنفسي.. طيب انا عملت حاجة عشان ربنا يبقى راضي عني.. هارجع تاني و ارجع فيها ليه؟ انا مرتاحة في شكل اللبس ده و مبسوطة بيه.. اقوم آجي عشان وظيفة أغير كل ده و ارجع زي ما كنت؟ يرجع تاني شوشو يقول لي و يعني هو انتي كنت ايه؟ ده انتي محجبة من سن 14.. في وقت كنتي انتي و اتنين بس المحجبات في فصلك كله في المدرسة.. يبقى اللي هاتعمليه ده مش حاجة جامدة اوي.
و أرجع تاني اقول لنفسي يعني هي الست دي هي اللي هاترزقني؟ ما الرزاق موجود و هو اللي بإيده كل شئ.. طيب افرض عملت زي ما هي عايزة و اشتغلت عندها فعلا و بعدين ما عجبهاش شغلي؟ ابقى كده خسرت نفسي و شغلي في المدرسة عشان لا شئ؟ بلاش دي.. افرض الست ماتت بعده ما اتعينت على طول و قفلت المكتب؟ يبقى اعتمدت على الزايل و أغضبت الحي الذي لا يموت؟
و طبعا شوشو مش سايبني.. يا بنتي هو انتي هاتعملي معصية؟ الموضوع أبسط من كده بكتير.

ما اطولش عليكوا فضلت كده ييجي يومين.. كر و فر.. يمين و شمال.. فوق و تحت و استخير و اسأل الناس و استشرت كمان مديري في المدرسة فنصحني اني ما اتخلاش عن اللي حاسة اني حالي أفضل بيه و لا اتنازل عن مبادئي و قال لي بعيدا كمان عن الدين، الناس دي بتحترم اللي بيتمسك بمبادئه.. فلو اتمسكتي بستايل لبسك ده هي ممكن تتمسك بيكي اكتر.
برضه ده ما ريحش بالي اوي.. انا عايزة حاجة واضحة امسك فيها.. حاجة تقول لي آه أو لأ.. حاجة تجيبلي من الآخر.. و الحمد لله ربنا ما طولش علية بيها.

و ظللت أفكر و أفكر.. لحد ما يوم الجمعة بالليل كنت سهرانة ييجي لحد الساعة 3 بالليل كده - و انا مش من عادتي أصلا السهر اوي كده - انما كنت طبعا مش جايلي نوم من التفكير.. و كنت قاعدة في الصالة في بيتنا القديم و ماسكة الراديو في ايدي.. قمت فاتحة على إذاعة القرآن الكريم.. و إذ بي افتح على بداية الآية الكريمة: “ربنا لا تزغ قلوبنا بعد إذ هديتنا و هب لنا من لدنك رحمة انك انت الوهاب”. انا ساعتها تنحت.. قلت لنفسي الآية دي يا بت يا علا جاية لك في الوقت ده بالذات زي رسالة.. يا ترى هاتفهميها و لا تسدي ودنك و عقلك؟ انما الحمد لله فهمت الرسالة و قفلت الراديو و قمت نمت.. نمت قريرة العين لأول مرة من أيام.. مقررة قرار واحد مافيش غيره و راضية تماما بكل ما يتبعه من نتايج

يوم السبت ما فكرتش في اي حاجة خاااااااااااااااالص و دخل قلبي اطمئنان و سكينة غير طبيعيين.. طيب هاقلق من ايه طالما انا خلاص أخدت القرار بعد استخارة و بعد اللي حصل ده قبلها بليلة؟ و فعلا يوم الأحد بعد ما رجعت من المدرسة و قبل ما أنزل المركز اتصلت بيها و قلت لها اني فكرت كتير في الموضوع اللي اتكلمنا فيه و لقيت اني مش مستعدة اني أرجع زي ما كنت و مدركة تماما انك مش بتطلبي مني أقلع الحجاب، انما انا لما أخدت قرار تغيير ستايل لبسي كنت مرتاحة ليه و لا زلت.. و مش مستعدة أرجع فيه. قامت قالت لي طيب اديني فرصة أفكر انا كمان..
قلت لها تيك يور تايم و فيل فري في اتخاذ قرارك.
تاني يوم بالظبط لقيتها بتكلمني و بتسألني احب ابدأ معاها امتى؟
قلت لها اديني اسبوعين أظبط اموري في المكانين اللي انا فيهم و بعدين ابدأ معاكي على 19 يوليو ان شاء الله.. و قد كان.. و بدأت معاها و الحمد لله عمرت معاها سنين.. و هي بالفعل انسانة محترمة فوق الوصف و الأيام اثبتت ان قرار كان صح.. جت لي فترة لبست فيها عبايات و كانت هي اكتر واحدة بتبدي إعجابها بشياكة لبسي و كنت بافرح اوي عشان حطيت القاعدة اللي هامشي عليها طول ما انا باشتغل عندها و هي احترمت فية ده.


طيب.. أسيبكوا بأه عشان كل واحد قرا المشاركتين دول يلحق ياخدله حباية بانادول أكتي فاست قبل ما يروح الشغل :D

المشاركة الأصلية كتبت بواسطة CryptonX

اصعب قرار لي شخصي .. هو كان قرار جماعي لي وأسرتي
برفع اجهزة التنفس الصناعي عن اخي الرضيع " ماجد " ذو الخمس الايام بسبب اجماع جميع الاطباء المصريين و الالمان علي عدم اكتمال جهازه التنفسي و العصبي و بالتالي لا توجد اي فرصة لنجاته بعد شهر من الحضانة .

الله يرحمه .

.

البقاء لله و تعيش و تفتكر
ياااااااااه ده قرار صعب جدا

حاليا اصعب قرار ليا مش عارف اتخذه اصلا :)

د
ده بقا لازم تنجز فيه لانه خير و ربنا بيساعدك فيه فوق ماتتخيل
وكده كده لازم تشرب قصدى تدخل القفص :D

المشاركة الأصلية كتبت بواسطة CryptonX

اصعب قرار لي شخصي .. هو كان قرار جماعي لي وأسرتي
برفع اجهزة التنفس الصناعي عن اخي الرضيع " ماجد " ذو الخمس الايام بسبب اجماع جميع الاطباء المصريين و الالمان علي عدم اكتمال جهازه التنفسي و العصبي و بالتالي لا توجد اي فرصة لنجاته بعد شهر من الحضانة .
الله يرحمه . .