الموضوع: مرور ابيس

بص يا استاذي
الاول : هتروح المرور التابع ليك هتقلهم عاوز اقدم في المدرسه هيقولك 370 جنيه وشهاده باطنه ونظر ودم (الدم دي غير متأكد ممكن يرخم ويطلبها وممكن يطنشها )
تروح تجيب ملف ب 8 او ب 10 جنيه وبعدين تروح تدفع 3 جنيه تقريبا في الخزنه يديك نموذج تملاه وبعد اللفه دي تروح توديه للست تاني وتديك ورقه كده تروح بيها تدفع رسوم المدرسه 370 هتديك حوالي 16 ايصال تروح طالع تاني للست إل بتقدم عندها الاوراق تختم علي الورق وتقولك بقي روح عند كوبري الابراهيميه اتعلم السواقه تقولها انا بسوق اصلا تقولك خلاص اطلع علي الانفوشي وهما هناك يختموا لك انك تم التدريب وتعرف بقي ايام امنتحانات المدرسه امته اي يوم في الاسبوع
ثانيا: بقي هو يوم الاختبار تروح تدخل اختبار الاشارات وطبعا ناجح لانك بتمسك الماوس بس وهي بتجاوب جنبك علي الاجابه الصحيحه تخلص الاشارات تقولك روح امتحن سواقه
وبعديها تروح تدفع 25 جنيه للعربيه بتاعت الاختبار تأخد الايصال ده ونتزل بيه ساحه الاختبار تقدمه وتستني بقي لما يندهوا عليك علاشان تختبر لما يندهوا عليك تحط للراجل علي الفتيس الورقه الحمراء ام 50 جنيه يقولك ملكش دعوه بأي حاجه انت بس امسك الطاره وانا هقولك تعمل ايه وبعديها ان شاء الله ناجح واحد قدامي عطاله 20 جنيه فضل معاه في اول المشوار بوشه بتاع حرف الاس لحد اخر قرطاس وقعه ووهو راجع بظهره
ولما الواد نزل للمهندس قاله انا اصلا المرايات مش شايف فيها حاجه قاله مخلتهوش يظبتهملك ليه قاله هو قالي كده مظبوطين قاله زعقله وقوله ظبتهملي الراجل السواق بتاع الفحص نده عليه وعطاه 20 جنيه بتعته قدامي الموقف ده حصل بالفعل
وبعد ما تنجح ان شاء الله تروح بقي علي التصوير وبتدفع مش فاكر كده تقريبا 5 جنيه نموذج تملاه علاشان التصوير وتروح بقي تتصور
هي دي القصه كلها من اولها لاخرها وطبعا دي مرور المنتزه ( طوسون) واكيد كل وحدات المرور نفس النظام
انت تجهز معاك 500 جنيه علاشان تتطلع رخصه من الاخر كده هي فلوس كلها بتتدفع من اجل انك تطلع رخصه رشوه شرعيه لاداره المرور بدل ما تروح تدفعها لحد بره وهو يطلعا ليك المرور بقي بتقولك احنا اولي بدل ما تدفعهم بره ادفعهم عندنا
بس ياباشا وربنا معاك
الحوار ده انا عامله كله من اوله لاخره مع بن خالتي وكنت بلف معاه في الحوارات دي كلها
وموفق ان شاء الله وطلع الرخصه