الموضوع: جين 2 عاده ام نيو اكسنت سبورت عاده ام افيو اوتوماتيك

المشاركة الأصلية كتبت بواسطة أبومريم

بالنسبة لانتشار قطع الغيار طبعا الاكسنت اكثر انتشارا وارخص والجين 2 حاليا في مرحلة الانتشار وبقى في كذا محل في شارع دمشق والحرفيين والجيزة وفيصل ومدينة نصر يعني برضو قطع الغيار متوافرة برا التوكيل الى حد ما ومنها التيل اللي حضرتك بتتكلم عليه موجود منه نوع اسباني اسمه ريمسا سعره 180ج تقريبا وبيقعد كتير والحمد لله الجين مفيهاش أي مشاكل في أي اساسيات العيوب اللي ممكن تظهر في التقفيل وبتتعالج في التوكيل بينما فيها امكانيات زي ال ABS دا ممكن ينقذ حياة بني ادم وانا اعرف اتنين معاهم نيو اكسنت كل واحد فيهم عمل حادثة لو كان في ABS يمكن كان ربنا جعله سبب في ان الحادثة متحصلش دا كفاية قوي
صحيح هو سعر تيل النيو اكسنت (200ج) في التوكيل؟ أصلي كنت شايف عضو هنا كان كاتب انه ب 396ج

بالنسبة للفروق
2 اير باج موجودة في الجين ومش موجودة في النيو اكسنت (اماكنها موجودة عشان العربية دي بتنزل ب 6 اير باجز برا بس طبعا غبور منفض العربية)
ABS,EBD موجودين في الجين ومش موجودين في النيو اكسنت
باركينج سينسور في الجين بس
فوج لايتس في الجين بس(حتى الفوج لايت غبور شايله :)
جنوط سبور 15 بتساعد على ثبات العربية وبتديها شكل احلي وطبعا في الجين بس
سبويلر موجود في الجين وموجود في اللي غبور بيقول عليها سبورت اكسنت
strut bar للحفاظ على ثبات العربية في الملفات مع مختلف السرعات وطبعا موجود في الجين بسسس
كونصول في النص بين الكرسيين اللي قدام لحفظ الاوراق وما شابه موجود في الجين بس وفي الاكسنت موجود دراع كدا تسند ايدك عليه بس تحس انه معمول مش بتاع العربية
كرسي السواق بيعلى ويوطى في الجين 2 بس
مفتاح الجين 2 ايمبوليزر يعني حتى لو حد عمل نسخة من المفتاح ميقدرش يسرق العربية وبرضو دي في الجين بسسس
والمالتي فنكشن الي الاستاذ عزت شايف انه الرفاهية الوحيدة اللي في الجين2 :)
هي دي الفروق اللي فاكرها دلوقتي وانا شايف انها فروق مهمة وفي حاجات كتير منها لا يمكن الاستغناء عنها

لا سعر التيل دلوقتى 210 من التوكيل نفسة
بالنسبة لعوامل الامان طبعا ميزة مهمة وموجودة فى الجين و مش موجودة فى الاكسنت بس انا شخصيا بهتم بالكواليتى و مدى الكفاءة و الفعالية اكتر من العدد .
يعنى لو قارنت الجين بالاسبيرانزا طبعا الجين هتكتسح مع ان الاتنين فيهم عوامل الامان و الاوبشنز تقريبا واحد و الاسبيرانزا ثباتها حلو بردة ............. بس الكواليتى بتاعة الجين اعلى من الاسبيرانزا .
انا شفت كذا موضوع عن فرامل الجين و اختلفت الاراء البعض بيشتكى ان الفرامل كفائتها مش عالية اوى و اللى بيقول ان ال abs فى حاجة غريبة و واحد عامل موضوع ان الفرامل هربت على سرعة 20 كيلو و عمل حادثة و الاعضاء بتشرحلة ازاى يدوس فرامل بطريقة متخليش ال abs يشتغل - مع ان اللى اعرفة انة المفروض ميشتغلش غير على السرعات العالية .
الخلاصة ان الموضوع مش بكتر الاوبشنز و عوامل الامان .. المهم ابقى واثق و مطمن ان احتمالية حدوث اى مشكلة فى العربية احتمال قليل حتى لو كانت المشكلة هايفة او فى الكماليات او ان التوكيل هيحلها لانى بشترى زيرو عشان استريح مش عشان احل مشاكل عربية لسة زيرو .