لو كنت ظابط شرطة وقتلت حرامى هروح النار

**Samah AbdAllah** · 23-07-2010 06:34 PM

لو كنت ظابط شرطة وقتلت حرامى هروح النار ؟؟؟

السؤال ده ابنى بيسألهولى دلوقتى
عمره 5 سنين على فكرة
قولتله مش من حقك حتى لو ظابط شرطة تموت حد
قالى ما هو حرامى يبقا اموته عادى
اقوله لا يا حبيبى حتى لو حرامى مش من حقك تموته
لازم تمسكه وتوديه النيابة والمحكمة والقضاء هو اللى يحكم ويشوف هو يستحق عقوبة شكلها ايه
والولد ابدا مصر انه طالما هو ظابط والتانى حرامى يبقا يموته عادى جدا
لو ابنك سألك السؤال ده هتقوله ايه ؟؟؟؟

**Samah AbdAllah** · 23-07-2010 06:57 PM

المشاركة الأصلية كتبت بواسطة ahmedelzeeny

ممكن توضح له ان الحرامى بيتسجن وهو هيفهم المعنى من العقوبه والطفل هيفهم لانه اكيد شاف ناس محبوسين فى التلفزيون كتيييييييييييييير جدا لان التلفزيون بيفتح عنيهم على حاجات كتير مش ممكن نتوقعها
طب انا فى مرة كان عندنا ضيوف وكان معاهم طفله عندها حوالى 5 سنين فكان فى فيلم شغال ومشهد فيه واحد وزميلته فى الجامعه راحت معاه الشقه وشربت وبعدها جايه البنت بتعيط و شعرها منكوش وبتلطم والواد بيطبطب عليها
تقوم الطفله تقول عملها الندل واعدت اتحايل عليها عشان اعرف قصدها ايه تقولى انتا يعنى مش عارف

ههههههههههههههههههههههههه ههه
ماهو ابنى شاف ظباط كتير بيقتلوا فى التليفزيون والافلام
وعشان كده بيقول يموته هو لسة هيستنى لما يتحبس

**ahmedabutaleb** · 23-07-2010 07:16 PM

طبعا من اللى هوا شايفه
بس انا ممكن اسالك سؤال لو الضابط مقتلش الحرامى تفتكر برده هيروح الجنة
طبعا فيه قله محترمة بس الغالبية مش عايزة كلام

**Mzeid** · 23-07-2010 07:24 PM

لو ابني هقول له لا
الحرامي بيموت لو قتل حد انما لو سرق يبقى هنوديه السجن بس

**aly_hosny** · 23-07-2010 07:29 PM

ما هو برضو لو الحرامي حاول يهرب لازم الظابط يضرب عليه نار
وبرضو ممكن الحرامي هو ال يحاول يموت الظابط
هو عقله صغير لسه
قوليله لو الحرامي وحش نقتله لو حرامي طيب نوديه السجن او مارينا :)

**Ahmed Samy** · 23-07-2010 07:45 PM

هاقوله قشطة نموته

و لما يكبر يبقى ربنا يفرجها

انا هاشرح لعيل قواعد التعامل مع المواقف الحرجة

**Mzeid** · 23-07-2010 07:56 PM

للأسف العيال دلوقتي بقوا خبرة جامدة جدا
أنا ابن خالتي اللي عنده 6 سنين عارف حاجات في الكورة اكتر مني علشان بيشجع الاهلي :)

**بحري** · 23-07-2010 08:14 PM

نقوله...
لو الحرامي معاه مسدس وبيقتل الناس الضابط يموته على طول..ولو مش معاه مسدس يبقى الضابط يقبض عليه ويكتفه ويوديه السجن ويحبسه

متهيألي دي أبسط صورة ممكن يستوعبها

النقطة التانية بقى...لما الطفل وهو صغير كده عنده إن الضابط لازم يقتل الحرامي...وطبعا الحرامي ده هو أي حد شرير (سياسي-جنائي).. فلما يكبر ونفسيته محفور فيها حاجة زي دي ..يبقى الراجل بتاع عماد الكبير كتر خيره إنه مقتلوش

التلفزيون عمل كوارث في نفسية المصريين..كوارث عابرة للأجيال