المشاركة الأصلية كتبت بواسطة smsmxxxxxx
انا واحد من الناس اللى عاملة حديد امام عمارتها على فكرة انا ساكن فى فيصل
ودى فرصة كويسة انكم تسمعوا وجهة نظر الطرف الاخر
اولا الاسباب اللى خلتنى اعمل موضوع الحديد
انا وقرايبي كنا بنركن عربياتنا فى جراج قريب علشان نتقي شر التكاتك والمايكروباصات اللى بيختصروا الطريق من شارعنا
وكنت سايب الجيران اللى فى العمارات اللى حوالينا يركنوا براحتهم لكن كنت طالب من البوابين ومن الناس نفسهم اللى بلاقيهم صدفة بيركنوا
انهم ميركنوش امام المدخل ويبعدوا عن ابواب المخازن علشان نعرف نفتحها لان مفيش رصيف ادامهم
لكن زى العادة الناس بتقابل الادب بقلة الادب
الناس ركنت امام الباب بتاع العمارة لدرجة ان والله كنا ساعات بنطلع من على الكبوت بتاع العربية لانهم بيبقوا لازقين في بعض
والمخازن ركن ادامها ثلاث عربيات اصحابهم مش محتاجنهم رافعينهم يعنى لحد ما يشفولهم بيعة
وكل ما اسأل بواب عن اصحاب العربيات دى يقولوا منعرفوش
لدرجة اننا كنا بنشترى بضاعة بسعر اعلى علشان مش عارفين ناخد اللى جوة المخزن
المهم اتحايلت على البوابين وعلى اصحاب العربيات
بكل ادب للاسف كان ردهم دا شارع الحكومة انتا عايزنى اطلع العربية الشقة مليش دعوة هو كدة ويروح سايبنى وماشي
اخدت حوالى 3 شهور من ساعة ما سكنت على الحال ده
ورحت قالب على الوش الوحش بس الوحش قوى
الصوت الهادى اتحول لصوت رعد والكلام المؤدب اتحول لأسوأ الشتايم
واليد اللى مبتمسكش غير الماوس مسكت عمود حديد وهددت بكسر العربيات وزقها فى وسط الشارع ان ماتشلتش
ومسكت اتنين بوابين من رقبتهم وقلتلهم اللى هيركن هنا تبعكم او مش تبعكم هولع فيكم انتوا والعربية اللى هتركن
كنت متغاظ منهم اوى لانهم كانوا بيحلفوا بالله كدب ان العربيات مش تبعهم
والله فى ظرف 5 دقائق كان العمارة ادامها فاضي
وتانى يوم رحت عامل الحديد اللى بيتفك وخليت عربياتنا تركن ادام العمارة
ومع الوقت الناس اللى معايا بيكسلوا يحطوا الحديد لانهم عارفين ان محدش هيقدر يركن مكانهم
الخلاصة
لو اللى بيركن بيراعى مدخل العمارات انه ميركنش ادامهم حتى لو عمارته
اننا منركنش ادام المحلات لان دى محلات اكل عيش لاننا لو عايزين نشترى حاجة من محل ولقينا صف عربيات راكن ادامه ملزق فى بعضه مش هيمشي لاخر الشارع علشان يشترى لاء هنشترى من اللى بعده لو سهل اننا ندخله
او لو فى عربية جيباله بضاعة هينزلها ازاى
يعنى لازم نراعى ان مش كل الناس شباب لاء فى كبار فى السن فى حوامل مش كل الناس بتعرف تعمل شقلبظات
علشان تعرف تطلع عمارتها او تشترى حاجة
معلش طولت عليكم بس كان لازم اقول الظروف اللى بتخلي الواحد يعمل حديد امام عمارته او محله
وشكرا
------------------
محمد سالم