الموضوع: مساعده لانى هشترى لانوس جديد وكاش ايهما افضل معرض ام المصنع

المشاركة الأصلية كتبت بواسطة محمد الشامي

انا تحت امر حضرتك والله وبحاول بس اساعدك :-)
انا لو مكانك وفعلا بحب اللانوس هشتري دايو لانوس 2007 او 2008 مثلا هتكون زي الزيرو الى حد ما, وانا بقول كده لان من خلال متابعتي للمشاكل اللي بتواجه الاعضاء هنا فواضح فعلا ان الشيفروليه اصبحت شبه سمعه سيئه لكلمه لانوس

وبالتالي حضرتك ممكن تدور على حاجه دايو لانوس محترمه وتكون موديل قريب قبل الشيفروليه ما تنزل وان شاء الله هترتاح معاها لانها فيها كل اللي حضرتك عايزه , من رخص قطع غيار لسهوله صيانه , اقتصاديه , عمليه , الخ

وحتى يطمئن قلبك هقولك رأيي فيها بكل حياديه , وده مجرد رأيي الشخصي
اهم مميزات العربيه :-
1- استهلاك بنزين اقتصادي , مع امكانيه التعامل مع بنزين 80 بعد تعديل فيشه الاوكتين لتتوافق من نوع البنزين المستخدم
2- عربيه عفشتها ناعمه ومريحه
3- سحب العربيه كويس , لكن بمنتهى الامانه الفيرنا مثلا من نفس فئتها لكن سحبها اقوي
4- الصيانه بتاعتها سهله جدا , وانا عن نفسي بعملها بإيدي (الصيانه العاديه) , لكن في بعض امور صعبه ومجهده اكيد بتحتاج ميكانيكي
5- عربيه بتستحمل الظروف القاسيه للحراره و و و و يعني هتستحملك
6- قطع غيارها موجوده في كل حته في الدنيا (بتفكرني بالفيات 128 كده) وموجود منها الاصلي والتقليد والجديد والاستيراد
7- التكييف بتاعها حلو مش وحش , لكن مع تشغيل التكييف العربيه بتتكتف شويه لو عايز تقرص وتجري وكده , وفيما بعد هقولك حاجه ظبطتلي اداء العربيه مع تشغيل التكييف :-)
8- الموتور بتاعها قوي ومناسب لحجمها , ويمكن تعديله الى فئات اعلى في السعه اللتريه

اهم عيوبها :-
1- صاجها خفيف مقارنه بالعربيات التانيه
2- مع تحميل اوزان اكتر من طاقه العربيه بتحس انها هبطت بشكل ملحوظ , وده لان عفشتها ناعمه , ولكن يمكن تعديل المساعدين والسوست حسب رغبتك
3- فراملها في المواقف الصعبه ممكن تحرجك , لكنها افضل مليون مره من فرامل الشاهين , وموجود هنا في اهم موضوعات القسم تعديل فرامل كامل امامي وخلفي للاستاذ عصام غنايم واستاذ محمد ممدوح
4- مع الاستخدام (10 سنين مثلا) الرشاشات بتبدأ تعطي نسب اعلى من الطبيعي وده بيزود استهلاك البنزين مع ضعف سحب العربيه و و و , وتم حل المشكله على يد اساتذه المنتدى بتركيب رشاشات بي ام دبليو والحصول على نتائج ممتازه


وبردو هقول لحضرتك حاجه تطمنك اكتر , كل مشاكل العربيه تقريبا تم القضاء عليها على يد اساتذتنا الخبراء والمبتكرين , وده هيبان ادام حضرتك لو دخلت على اهم موضوع القسم وهتلاقي على سبيل المثال
1- تعديل الفرامل الاماميه والخلفه بالكامل , للحصول على قوه فرمليه محترمه
2- تسقيط مواتير ذات سعات لتريه اعلى
3- تعديل فيشه الاوكتين الموجوده بالسياره لتناسب نوع البنزين اللي حضرتك عايز تستعمله , بيصاحب التعديل زياده في قوه اداء العربيه , والسحب , وهدوء في الصوت , و تقليل استهلاك البنزين , وانا عن نفسي فرق معايا جدا اثناء تشغيل التكييف , يعني لما بكون مشغل التكييف ولا بيكون ليه تاثر ملحوظ على اداء العربيه او تكتيفها
4- ازاي تحول العربيه من المانيوال للاوتوماتيك
5- ازاي تعمل صيانه لعربيتك بنفسك والحصول على نتائج ممتازه
تقدر تقول ان الدايو لانوس مشاكلها كلها قتلت بحثاً في المنتدى و تم القضاء فعلا على 99% منها والحمد لله

انت بس لما تنزل من الشاهين وتركب لانوس هتحس ان العربيه منخفضه لكن مع الوقت هتلاقي العربيه طبيعيه جدا :-) انا عن نفسي كنت نازل من الدوجان وركبت اللانوس , فجاه حسيت اني قاعد على الارض , بس ده طبعا لان الدوجان هي اللي تصميمها غلط , مش اللانوس هي اللي غلط لان ده حال كل العربيات الجديده :-) عشان الثبات والسرعه

وانا تحت امر حضرتك في اي استفسار وربنا يقدرني واقدر افيدك من خلال معلوماتي القليله , وحتى لو انا مش عارف حاجه فتأكد ان المنتدى هنا فيه ناس جباااااااااارين :-)

ملحوظه :- انا عن نفسي مش عامل تعديل فرامل ولا مسقط موتور ولا اي تعديل في قطع العربيه ومكوناتها , والحمد لله مش تعبان من اي حاجه , مع اني بحب الجري والقرص والسرعات العاليه و و وو لكن طبعا كل حاجه بعملها بحذر , خاصه عشان الفرامل , لكن مع الاستخدام العادي والهادي مش هتكون محتاج تعديل فرامل او اي تعديل بشكل عام

اتمنالك التوفيق بإذن الله ويارب اكون وُفقت في توضيح الامر

MMamdouh