الموضوع: مصيف مرسى مطروح - بعض الاستفسارات

الطريق
طريق مصر اسكندريه الصحراوى على طول ولما تلاقى الرست هاوس على ايدك الشمال تبدأ تركز عشان بعده بحوالى 25 كيلوا ( الكيلو 130 تقريبا ) هتلاقى علامه مكتوب عليها طريق العلمين الى هو الطريق الدولى هتروح واخد اليوترن وكانك راجع على مصر تانى وتمشى حوالى 50 متر وتروح داخل يمين وتفضل ماشى على طول برضه هتلاقى نفسك بقيت فى الجزء التالث من الطريق الى هو طريق الساحل وتلاقى نفسك اجبارى دخلت يمين ( على طريق الساحل ) تروح واخد اول يوترن وراجع وتمشى طوالى تلاقى نفسك فى مرسى مطروح

احسن الفسح
الشواطىء
عجيبه وده مظر رائع بس المياه خطر شويه خاصتا لو بتعرف تعوم وناوى تسيب الارض تبعد عن رجلك فهتلاقى سحب
الابيض (فيه ثلاث شواطى العام وده اقلهم وشاطى خاص وده معقول والشاطىء الثالث بتاع الجيش وده احلاهم والفرد ب 5 جنيه غير شمسبه و3 كراسى بعشرين جنيه ) طبعا رايق جدا وعائلى ونضيف وعيجيبه والابيض تقريبا 20 كيلو من مطروح وجمب بعض
وطريقهم هتمشى شارع الكورنيش على طول تلاقيهم ( طبعا لو ساءلت هناك مليون واحد هيدلك )

شاطىء الغرام
جميل قوى وحوالى 13 كيلوا من البلد وسعر الشمسيه والكراسى 15 اول صف و10 الصف الثانى

روميل
شاطىء رائع وداخل البلد تقريبا والشمسيه والاربع كراسى ب 10 جينه ولو اول صف هيقولك 15 بس زحمه جدا ومناسب لجميع الاعمار
يعنى فيه حتى غويطه جدا اسمها قناه السويس المياه فيها 15 متر عشان تدخل القطع الحربيه وفى نفس الوقت الميه بساط بدون تيارات يعنى لو بتعوم هتستمتع جدا وممكن تعدى الناحيه التانيه عوم وترجع
وفيه حته الميه تلاقيها وصلت لحد ركبتك بدون موج وحته نفس الوضع مع موج خفيف وحته الميه توصل لقصبه رجلك بعد ما تتعب مشى وديه مناسبه للاطفال سنتين وكده
عيبه اكثر شاطىء زحمه فى مطروح وخاصتا يوم الجمعه عشان اهل البلد بينضموا ورحلات اليوم الواحد

مجموعه شواطىء البوسيت والليدوا والعوام ودول كلهم شواطىء ليهم نفس النكهه والخصائص وجمب بعض وكانوا زمان ( من عشرين سنه ) هما البوسيت والليدوا دلوقتى قسموهم كل 200 - 300 متر بقى ليهم اسم أنا مش عارف الصراحه الاسماء ديه

فيه كمان شاطىء اسمه الفيروز بعد رومل وديه بحيره كبيره متوصله بروميل ومناسبه برضه للاطفال ( أحنا شقتنا قدامها وعلى فكره كنا بنسميها من عشرين سنه بحر الحمير عشان كان اهل البلد بيجيبوا الحمير يحموها فيها
طبعا دلوقتى الوضع اختلف وعليها زحمه وبقت مش عارف كام شاطى الفيروز والنيروز والبلبله والى مش عارف أيه
المهم كلهم تقريبا حاجه متشابهه جمب بعضيها واسمها الفيروز نسبه الى فندق الفيروز اول فندق اتعمل فى المنطقه ديه تقريبا سنه 95
واقلكم على حاجه جميله أننا كنا بستنى لما الحمير تطلع من الملاحه ديه عشان ننزل فيها والاغرب أن كان الى بينزل معانا فيروز ( كانت طفله عمره 7 سنين ) الشاطىء اتسمى على اسمها عشان هى بنت دكتور نبيل الشنوانى صاحب الفندق

فيه كمان منيه حشيش والرميله وعلم الروم ودول الناحيه التاينه خالص ومفتوحين على البحر الكبير وميتهم مش قد كده

تيجى بقى لأحلى مكان ممكن تشوفه فى حياتك
قبل مطروح ب 65 كيلوا تلاقى راس الحكمه على اليمين
بس لازم تأخذ تصريح من المخابرات الحربيه
هو بيطلع فى نص ساعه دلوقتى على ما اسمع
ممكن وأنت لسه رايح تخش تتفرج وتسأل
بس رائعه الى اقصى درجه
أنا رحتها من 25 سنه والله مش ناسى جمالها لحد دلوقتى ولا استراحه الملك فاروق الى كانت هناك
بس مش عارف دلوقتى أيه النظام لما الرئيس حسنى مبارك بقى ليه استراحه هنا
هل ده اثر على الاماكن هناك فبقت هناك فيه اماكن ممنوعه ولا ايه

لو عاوز نمره سماسره هناك ممكن اكتبلك
بس أنت مش هتبقى عارف المنطقه الى بيكلموك عليها عامله ازاى

طيب ممكن نعرف اسعار الشقق
و ايه افضل منطقه من ناحيه البحر و الهدوء و النظافه

ايه المزارات اللي موجوده في رأس الحكمه ؟

المشاركة الأصلية كتبت بواسطة 3mr farrag

طيب ممكن نعرف اسعار الشقق
و ايه افضل منطقه من ناحيه البحر و الهدوء و النظافه

الافضل ديه وجهات نظر
يعنى أنا مثلا بحب الهدوء فافضل مكان بالنسبه ليه هو الفيروز والحتت الى ابعد منه لحد ما توصل لقريه اندلسيه وديه اسعارها كانت فى بدايه الموسم 120 جنيه وأنت طالع دلوقتى مش اقل من 200 ( ده اذا لقيت ب ب 200) ده للشقه المتوسطه ثالث اور بع نمره على البحر تزيد لغايه ما ممكن توصل ل 700 جنيه امام البحر مباشرتا
فيه حته حلوه بس زحمه ناحيه العوام وديه معرفش الاسعار فيها كام بس
فيه شاليهات ناحيه الغرام والابيض وعجيبه وبرضه معرفش حاجه عن اسعارها الا بالسمع انها بتكون فى حدود 500جينه الى 1200 لو قدام البحر مباشرتا
طبعا الاسعار الى باقولها ديه اسعار تقريبه وبتختلف باختلاف الوقت من الموسم يعنى الاسبوع الى قبل رمضان ده هتلاقى الاسعار يمكن نزلت النص غير الاسبوع الى احنا فيه دلوقتى يمكن الاسعار تزيد عشان الموضوع عرض وطلب يعنى اول ما توصل وتدور على شقق ما تلاقيش اكيد لما هتلاقى شقه اخر اليوم هتلاقى سعرها عالى
غير لما تروح وتلاقى عشرين شقه ومحدش بيأجر
برضه العدد بيحدد السعر الى هتتأجر بيه الشقه
يعنى فيه ناس لما تلاقى زوجين وولدين ما يدققوش قوى فى السعر عشان استهلاكهم فى الميه مثلا مش هيكون كنير ( عربيه الميه بحوالى 200 جنيه وممكن الشقه لو عشر افراد يخلصوها فى اقل من اسبوع )

المشاركة الأصلية كتبت بواسطة yaserbasha2000

ايه المزارات اللي موجوده في رأس الحكمه ؟

على حسب ما اتذكر لأن الكلام ده كام من مده طويله جدا
رحنا شاطىء من اروع ما يكون وفى منتهى الهدوء
وروحنا استراحه للملك فاروق برضه فى منتهى الجمال
بس كل ما افتكر اليوم ده انبسط