الحمد لله كنت هاموت...حادثة بسيطة ...

**medo20000** · 28-07-2010 01:16 PM

اولا أزيكو يأحلى رجالة منتدى فى الدنيا ...

عايز أحكيلكو اللى حصل معايا علشان كل واحد يأخذ عظة وعبرة ....ويقولى رأيه ..

إمبارح كنت رايح الجيم ..ولسه طالع من البيت وماشى فى طريقى عادى بسرعة 70 - 80 كم وخير اللهم اجعله خير األقيلك عربية ماتريكس فى وشى (الباشا ماشى عكس الإتجاه) والمسافة بينى وبينه والله لا تتعدى 3 أمتار

طبعا والله العظيم لا إراديا وبدون أى نوع من أنواع الحرفنة ولا المهارة انحرفت إنحراف غير عادى ناحية اليمين علشان افادية وكانت النتيجة غير متوقعة بالمرة ومذهلة ....العربية عرضت ومشيت بجنبها لحد الرصيف ووووووووووووووووووووووووط ااااااااااااااااااااااااا ااااااااااااااااخ عينك ماشوف الا النور ....

لدرجة إنى اقعدت اتشاهد والعربية ماشية بجنبها ....(أشهد أن لا إله إلا الله.....)

المهم نزلت لقيت الجنط اليمين فى الحلاوة (جنط سبور) والكاوتش فى الباى باى وطبعا شكلها كدة مش ولا بد

الباشمهندس اللى كان ماشى عكس نازل بيقولى (بس أنت كنت ماشى بسرعة ....وانت كنت بتتكلم فى الموبايل .....,وووووووووو خدووهم بالصوت قبل مايغلبكواا......)

طبعا ماتكلمتش معاة ولا كلمه غير (لو سمحت روح أقعد فى عربيتك وماتتكلمش معايا خالص ......)
وبعد مهاترارت ومناقشات جت الحكومة ...النجدة اللى فى بلدنا تكسف والله
نعمل محضر ..الراجل جاب وراء وقعد يتحايل عليا ويتأسف لى ويقولى أصلحهالك .....

هاكملكو بعدين بقى لانى كل لما بفتكر بضايق جداااااا

الخساير :
- جنط (مش لاقيه)
- كاوتش
- مقص جديد
- شمعدان
- بارات دركسيون

ده غير المرمطة واللف والدوران فى الحر على الحاجة

**gebreel** · 28-07-2010 01:36 PM

حمد الله على سلامتك دي اهم حاجة

نيجي بقى للبهوات اللي بيجو عكس و ماشين بسرعة يعني اذا بوليتم فاستتروا و يقوم نازل مزعقلك دي حصلت معايا ماشي في الشارع و فيه يوترن من الشارع العكس على الشارع بتاعنا و فيه فتحة قبل اليوترن بس عكس الناس بتخطفها علشان ميروحوش لأخر الشارع و واحد ببيكانتو راح خاطفها و انا شايفو من بعيد و عمال اقلبلو نور و في لانسر خارجة من الشارع اللي عاوز يدخلو هوة عكس و ولا اكني بقلبلو ولا حاجة كابس بنزين و داخل لولا اني كنت متوقع حاجة زي كدة و فراملي ما شاء الله كويسة كان زماني انا و العربية في البايباي

و لما والدي يكون معايا واحجر قدام واحد من دول علشان يرجع و يمشي عدل والدي يزعقلي و يقلي مش هتغير الكون و يالا علشان منتعطلش

**tameraast** · 28-07-2010 02:38 PM

حمد الله على السلامه و الراجل ده خليه يصلحلك كل حاجه فيها يا اما تعملو محضر الناس الى زى دى خاربين البلد

**M.Mostafa80** · 28-07-2010 02:39 PM

حمد الله على سلامتك مهى مولد من زمان ومش لاقينلو صاحب واللى يفقع انهم كمان بيقاوحو
انا فى الحالات دى بتحول لكائن اخر غير محترم بالمره

**medo20000** · 28-07-2010 03:24 PM

شكرا ياجماعة ..

انا لو حكيتلكو ايه اللى حصل بعد كده هاتحسو فعلاً ان فى بلدنا دى أى حاجة عايز تعملها بتعملها بالفلوس طبعاً ....تخيلوا أمين الشرطة لما جة علشان يعمل محضر شايف (خطين زحف العربية على الأرض ) قالى يااااااااااااااااااه كل دى فرامل ؟؟!!
فأنا بصيتله بإستغراب وقواتلوا دى مش فرامل دى أثار زحف العربية لان العربية مشيت بجنبها كتير لانى فديت الراجل بسرعة جامدة جداًً
فرد عليا وقالى بس دة معناه انك كنت ماشى مش أأقل من 130 كم !!!
وقالى انك كده ممكن يكون عليك نسبة كبيرة من الخطا!!!!!!!!!!!!!1 يانهار بنى ياجدعان ..

طبعاً كلمت واحد صحبى ضابط جه وضبط أمين الشرطة بسرعة ...(عينيا ليكو ياباشا دانا هاظبطلكوا الراجل التانى بس أنت خليك ماسك على أنك تعمل محضر ...) ده كان رد أمين الشرطة بعد ماصاحبى جه ....هاهاهاها

طبعا طلع ورقة وقلم وبدا يكتب ..الراجل بدا يخاف وفى الأخر قالى أنا اسف وقعد يبوس راسى .....طبعاً قولتلو خلاص بس لازم تصلح العربية ....(من افسد شيئاً فعليه إصلاحه) صح ؟؟

وهابقى حكيلكو الفصل الثالث من المسرحية الهزلية دى ...لانى برضو إضايقت تانى ...هاهاهاه بهزر طبعاً

**Abody1985** · 28-07-2010 04:17 PM

الحمدلله على سلامتك
وعلى فكرة مش حرام ولا حد يقولك ده عوض والكلام الفارغ ده
من افسد شيء فعليه اصلاحه

**OSaMa.GHaMrY** · 28-07-2010 05:48 PM

احنا عندنا نفس الحته دى وياما كانت ناس بتاخدها عكس مع ان القسم بيبقى فى وشهم والتكاتك بتتشقلب عندنا فى الشوارع

يلا الحمد لله على كل شئ وربنا يهدى الناس وربنا معاك