الموضوع: بتفول ببنزين اية؟

المشاركة الأصلية كتبت بواسطة MTMX

انا اسمع ان 80 افضل للموتسكلات ودا من صاحب محطة بنزين

ده راجل اهبل و ابن تييييييييييييت

بص يا باشا

في اي عربية او موتوسيكل

عشان تعرف انت محتاج اوكتان كام يبقى تشوف معدل الانضغاط بتاع المحرك

Compression Ratio

و ده موجود في المانيوال

كل ما المعدل يعلى تحتاج اوكتان اعلى

انا مثلا معدل انضغاط المحرك عندي 9.6 : 1

لو حطيت 80 في موتور زي ده هيسقف و ده اكيد بلا شك

ليه بقى؟

مواتير البايكات الجديدة كلها و كذلك العربيات هي مواتير رباعية الأشواط

يعني ايه؟

دلوقتي السلندر بيبقى عليه صبابات valves لمخلوط البنزين و الهواء و صبابات للعادم

انا عندي صبابين بنزين و هوا و صباب عادم

اللي بيحصل ان عن طريق ال timing belt او سير الكاتينة في العربية (معرفش فيه حاجة زيها في البايك و لا مشابهة) الصبابات بتتفتح لجوة السلندر و تتقفل في اوقات معينة

ازاي:

الشوط الأول: Intake او ادخال الوقود

حالة السلندر: مفتوح (البستم على باب السلندر)

حالة الصبابات : صباب مخلوط البنزين و الهواء مفتوح
صباب العادم مغلق

و يتم فيه بخ او رش خليط البنزين و الهواء القادم من الكاربراتير او الرشاشات

الشوط الثاني: Compression او الانضغاط

حالة السلندر: جاري اغلاقه (البستم يتحرك في اتجاه داخل السلندر)

حالة الصبابات: صباب مخلوط البنزين و الهواء ينغلق مع حركة البستم (بحيث انهم ما يخبطوش في بعض) ....
صباب العادم مغلق

و يتم في هذا الشوط ضغط مخلوط الوقود و الهواء ... ليه؟ لان عشان ناخد من البنزين طاقة حركية لازم نولع فيه تحت ضغط ..... عشان ينفجر و يديني طاقة حركية

و هنا نفهم يعني ايه معامل الانضغاط ....... يعني السلندر بيضغط مخلوط البنزين و الهواء بهذا المعامل .... يعني في حالتي انا (9.6:1) يتم ضغط المخلوط الى 1/9.6 من حجمه .... يعني لو السلندر بيتبخ فيه 100 ملليلتر بنزين و هواء هينضغطوا ليصبح حجمهم 10.4 ملليلتر

الشوط الثالث: الاشعال Combustion

حالة السلندر : منغلق تماما ... ثم ينفتح تماما تحت تأثير انفجار خليط الوقود

حالة الصبابات: جميع الصبابات مغلقة

اللي بيحصل ان البوجيه بيضرب شرارة يفجر البنزين يقوم البنزين زاقق البستم على اخره يخرجه لبرة خالص .....

الشوط الرابع: Exhaust او اخراج العادم

حالة السلندر : مفتوح و ينغلق

حالة الصبابات: صبابات الوقود و الهواء مغلقة

صبابات العادم مفتوحة و تنغلق تدريجيا مع حركة البستم لمنع اصطدامهم

باختصار حصل حريق و عايزين نطرد ناتج الحرق من العادم .... بنفتح صباب العادم و نزق العادم لبرة عن طريق البستم

-----------

ليه بقى الحكاية الطويلة العريضة دي و ايه علاقتها بالاوكتان؟


البنزين فيه خاصية فيزيقية سخيفة و هي Spontaneous Detonation (الانفجار التلقائي) أو Pre-ignition detonation (الانفجار قبل الاشعال)

اي بنزين في الدنيا لو حطيته تحت ضغط معين بينفجر بدون حرارة و لا شرارة اشعال

و وجد العلماء ان ارتفاع الاوكتين بيقلل الخاصية دي او ياخرها

يعني كل ما الاوكتين نمبر يعلى .... البنزين يستحمل ضغط اكتر

طيب ايه العلاقة؟

كل ما معامل انضغاط المحرك يعلى معناها انه بيضغط البنزين اكتر

يعني بيعرضه لضغط اعلى

طيب لو انت حطيت بنزين رقمه الاوكتيني ما يستحملش انضغاط المحرك

هيحصل تسقيف

عارف يعني ايه تسقيف؟

يعني في الشوط التاني اعلاه .... البستم ماشي في مشواره للاخر عشان يضغط البنزين و بعدها الشوط التالت البوجيه يضرب يخليه ينفجر

لا ده قبل ما الشوط التاني يبتدي البنزين هينفجر و البستم هيتزق بالعافية لبرة و هو اصلا ماشي لجوة و هيزق عمود الكرنك

شفت بقى انت بتضر موتورك ازاي في الحالة دي؟



الحكم دايما لنوع البنزين بمعامل الانضغاط .... معامل الانضغاط من 9 لحد 11 لازم تحط بنزين 92 عالاقل ..... اكتر من 11 يفضل تحط 95 ..... اكتر من 12 او 13 لاااااازم 95 .... الخ

80 ده ينفع المواتير القديمة اللي معاملات انضغاطها 7 او اقل .... او الموتور كده كده مفوت فبيهرب بنزين و ما بيضغطوش بكفاءة ......