هي وصلت لكده
طيب
انا ححكيلكم بقي حكايتي مع الزمان
قصدي حكايتي مع الفيران
زمان
كان عندي بندقيه رش وكانت بصحتها
وانا كنت الحمد لله كويس في النشان ولحد دلوقتي
عندنا بلكونه في اخر الشقه هي المتنفس الوحيد وسبب دخول الهوا للبيت ومن غيرها في الصيف نموت
فمره دخل فار
من حوالي 15 سنه
وانا قاعد في الصاله لقيته دخل علي اوضتي
وانا اوضتي لو دخل فيها تمساح كايمان ومحدش حيعرف يلاقيه من كتر الحاجات اللي فيها
المهم امي دخلت نامت وقفلت علي نفسها
واختي نفس الموضوع
وانا قعدت استنيته يطلع والبندقيه في ايدي ورقبتي ملووحه مستنيه
الكلام ده كان الساعه 11
المهم طلع الساعه 2 جيت اضربه لقيت الاضاه ضعيفه وانا مش شايف فمجاتش فيه وجري دخل الكهف بتاعي تاني
طلع تاني الساعه 5 الصبح كنت نورت نور الطرقه والحمام
ضربته مات روحت راميه
------------------------------------------------------
يمر الزمن بقي والبنادق تبوظ
ومن ستنين تقريبا كنت خالع الفاط بتاع المطبخ علي امل اني حنضفه وسادد مكانه بكرتونه نتيجه وحاططلها مسامير كتير
طبعا انا خالعه من سنتين تانين ولا اتنضف ولا اتنيل ولا حتي هزيت طولي واشتريت غيره
ما علينا
في مره قاعد انا وامي وسمعنا حاجه بتخروش في المطبخ
فتحت الور لقيته واقف بيبصلي من فوق البترينه
روحت قافل عليا وعليه الباب واستمرت المعركه حوالي نص ساعه
استعملت فيها سكينه مخصصه لقتل الديناصورات
وفي اخر المعركه زنقته ورا فترينه كبييييييييييييييييره لما كتفي اتخلع
وروحت مخلي امي تملا حله ميه سخنه من السخان وحطيت سيخ علي النار وانا زانقه ورا الفترينه ومش شايفه
وروحت دالق فوقه الميه السخنه لحد ما سلقته
وجسيت نبضه بالسيخ المحمر من النار
وطلع جثه هامده
فرميته والحياه بقت قشطه وطلعت اتفرج علي التليفزيون وماما نامت
شويه ولقيت واحد تاني بيجري من قدامي
ولما جيت اجري وراه دخل المطبخ وكنت تعبت والوقت اتاخر
فدخلت نمت
وتاني يوم بالليل كملت المعركه وانتهت بقتله بالسكينه طعنا حتي الموت
هي السكينه طولها حوالي 50 سنتي والفار طوله بتاع 15 سنتي من غير الديل
واقمنا الافراح ونضفنا المطبخ من اثار العدوان واثار الفيران
والحياه بقت زي الفل وروحنا عند اختي وسيبت ماما هناك تبات عندهم
ورجعت علي البيت
داخل المطبخ لقيت واحد كمان
قولتله الله يخربيتك هي قبيله عندنا ولا ايه
روحت حاطط الحله علي النار (ما انا بقيت خبره بقي)
وقولتله استني علي ما ارجعلك
فجيبت باقي العده
بس ده ما اخدش وقت علشان انا بقيت معتاد الاجرام ومتمرس
يا دوب بعد ساعه كده
نزل تحت البوتاجاز وكانت الميه غليت
روحت مديله دفعه طلع يجري
مسلوق مشعث الشعر مبعثر الكرامه
فطعنته طعنه نجلاء لو اصابت ليث لجندلته
وكنت مثل عنتره العبسي في حومه الوغي
ايه الي انا بقوله ده
المهم مات الفار
ورجع الامن والامان للبيت من تاني
وطبعا البيت كله اتنضف علشان الفيران بتعمل بيبي(زي الناس) كتييييييييييير في كل حته (زي الفيران)
ومن اول يوم وانا عرفت انهم دخلوا من فتحه الشفاط وسديتها كويس قبل المعارك
واشترينا شفاط جديد وعيشنا في تبات ونبات واكلنا زغاليل وزغلولات
حرام عليك يشنوري
مية سخنة وسيخ
بجد حرام عليك
المفضلات