محور صفط اللبن ... الحل الممتاز لاختناق محور26 ولكن ....

**tarekabosdera** · 01-08-2010 03:37 AM

محور صفط خلص خلاص من فترة

مش عارف ليه لحد دلوقتي مأعلنوش حتى عن معاد الافتتاح لحد النهارده ؟!!!!!!!!!!!؟

المهم ندخل في الموضوع

وزارة النقل ووزاة الاسكان بيقولوا ان المحور ده هيحل أزمة مرورية كبيرة في القاهرة الكبرى ويعد بمثابة منقذ لمن يريد الانتقال من غرب القاهرة الى شرقها دون استخدام محور 26 يوليو .

وبيقولوا انه هيخفف الضغط على محور 26 يوليو بنسبة 25 - 30 %

طيب تعالوا نحسبها بالنسبة لسكان اكتوبر والشيخ زايد والقادم من اسكندرية الصحراوي والقادم من طريق الواحات .
كل دول لو عازين ينزلوا الجيزة او الدقي او المهندسين او الزمالك او التحرير مكنش في طريق الا محور 26 وطبعا معروف بأختناقه المضني عند فتحة الدائري وبنقف بالنص ساعة عشان بس نعدي مسافة من اول فتحة الدائري لحد ما بعد ميدان لبنان .

لو جينا للمحور الجديد ( صفط اللبن ) وهو محور موازي لمحور 26 وفعلا يعتبر محور هام جدا والمفترض انه هيفك العديد من الأزمات .

لكن ...........
لو هربنا من زحمة نهاية المحور عشان نروح المحور الجديد هناك لعنة اخرى وهي الاختناق المروري الدائم في الطريق الدائري عند مطلع اسكندرية الصحراوي بسبب ضيق الطريق بشكل كبير جدا جدا ( بيوصل ان عربية واحدة بتعدي ) في حتة معينة . وغير كده سوء الطريق ووجود تكسيرات شديدة في الحتة ده بتخلي العربيات تهدي بشكل كبير .
يعني عشان نوصل لبداية محور صفط لازم نمر بالمنطقة المختنقة ده وملهاش بديل للاسف الشديد.

للاسف كان المفروض وزارة النقل لو عايزة تحل مشكلة الزحام المروري للقادم والذاهب الى 6 اكتوبر لازم تحل مشكلة الطريق الدائري في المنطقة المشار اليها . عن طريق انها توسع الدائري عند مطلع اسكندرية الصحرواي وانها تسفلته من جديد لان حالته صعبة جدا ومع الزمن عفشة العربيات هتتكسر لو فضل الوضع زي ماهو .

فعلا سكان مدينة 6 اكتوبر والشيخ زايد بيعانوا وانا منهم . للاسف عشان ننزل القاهرة بنعاني معاناة شديدة سواء اخدنا المحور او حتى الدائري .

**elfashn** · 01-08-2010 03:48 AM

وصلة صفط اللبن هتتفتح النهارده ابسط يا سيدى انا سمعت ان الريس هيفتحها النهارده

**م. عصام مهنى** · 01-08-2010 11:14 AM

الوصلة دى خنقت شارع السودان من عند البحوث لغاية بعد الجامعة
ومن كوبرى فيصل لغاية كوبرى ثروت دى مشكلة كبيرة جدا
يحلوا مشكلة ويعملوا مشكلة فى مكان تانى

ربنا يسترها

**A.Saad** · 01-08-2010 08:22 PM

الوصلة هتخنق المحور من نزلة الدائرى او من مطلع الدائرى منه
ولازم زى ما طارق قال يتعمل توسعة لمطالع الدائرى على الصحراوى

**fadod** · 01-08-2010 10:48 PM

مفيش ياجماعه خريطة توضح الطرق الرئيسية في القاهره الكبري ذي المحور والدائري و الحلزوني و- يوليو والمنيب .وكل الحاجات ديه بمطالعهم ومنازلهم لواحد مغترب عن مصر لفتره وعايز لما ينزل ميقدهاش توهان..
هو لما سبت مصر كان محور ٢٦ يوليو لسه فاتح جديد وكنت بتوه فيه كمان ، أنا فكرت في gps بس مش عارف الحاجات ديه بتنزل أول باول ولا بتاخد وقت

**tutankhamoun** · 03-08-2010 05:20 AM

كل المحاور دي هجص في هجص علشان دي حلول وقتية مش جذرية .
الحلول الجذرية هي الآتي :

-وقف النمو السكاني في القاهرة الكبرى ووقف البناء تماما و تحسين الأحوال .
-الأهتمام بالمواصلات الجماعية و تحسينها .
- الضرب بيد من حديد على قائدي السيارات المتهورين ( يعني كل السواقين ) .
- فرض النظام ( يعني كل واحد يسوق في حارته طبقا للسرعات المقررة - النقل يمشي يمين بس - اعدام سواقين الميكروباظ رميا بالرصاص و معاهم سواقين النقل الصغير و الكبير )
- وقف المركزية و توسيع العمل بنظام شبكات الحاسب الآلي في الحكومة .
- توفير الخدمات التي يذهب بسببها الناس إلى القاهرة في مدنهم الأصلية .

غير كدا ....... كل اللي الحكومة بتعمله عبث في عبث
علشان الناس بتزيد و عربياتهم بتزيد ....................... و كل اللي بيحصل حلول مؤقتى بتنفجر معاها مشاكل تانية .

**Ralliart** · 03-08-2010 05:46 AM

انا حضرت البتاع ده وهو بيتبني حته حته وللاسف المحور ده كارثه بكل المقاييس ومصممه لا يمت بصله للمهندسين
مبدئياً التخطيط والتنفيذ كأنها فلوس ابوهم وبيشتغلو في عزبة ابوهم ! وانا شفت بعيني كمية حديد كبيره وعربيات خرسانه كتير بعد ما صبو منزل كان هيبقى كارثه اصلاً راحو مكسرين كل اللي اتعمل تاني بطريقه مستفزه للمشاعر لان الخرسانه اللي اترمت كانت تبني بيوت بحالها

المطالع والمنازل كابوس كبيييير جداً لان الحته اللي عند بين السريات دايماً مقفوله لسببين وهما الطلبه اللي بيعدو الشارع ودول مش فاهم ليه ما اتعملهمش كوبري مشاه
والسبب التاني وهو دخلة شارع السودان اللي كانت بتقفل كوبري ثروت بالساعات دلوقتي ضيقوها اكتر!! بالاضافه لشارع المرور

على الجانب الآخر اللي هييجي من الدايري ورايح الجامعه هيشوف ذكاء المصمم اللي واضح انه عمره ما راح المنطقه انه عمل طريق المترو من فوق الكوبري وبالتالي هيقابل تكاتك وميكروباصات مصديه بدون ازاز ولا فوانيس ولا نمر ولا اخلاق وعربيات كارو وموتسيكلات ماشيين عكس ومتقولش في مرور لانهم بيضربو الظباط!!!!!
ولسه من شويه كان في اسعاف طالع الكوبري جنبي ولقا تكتك نازل الكوبري عكس واقف في وشه وسواق التكتك بيشتمه ....ولسه

دا غير الدايري عند الحته بتاعت طريق اسكندريه بتبقى واقفه خلقه

دا غير ان الدنيا تحت سلطه خالص تخيل علشان اطلع من مساكن الجامعه واروح الجامعه همشي في شارع مش عارفين اتجاهه اصلاً وهخش تحت الكوبري في وش اللي جايين من صفت اللبن!! والف يوترنن في وش اللي جايين من صفت واطلع في مطلع بياخد عربيتين بالعافيه
دا كوبري ثروت كان بياخد 3 عربيات ومطلعه واسع وكنت بقف الصبح ييجي ساعه

بجد البتاع ده اهدار للمال العام وكفايه انه 9 كيلو ب900 مليون جنيه !!

**م. عصام مهنى** · 03-08-2010 09:24 AM

الايام هتثبت ان محور صفط اللبن مكانه اساسا غلط
والوصلة اللى نازلة على الجامعة دى اخطر حتة ، دى فى وش الميكروباصات اللى بتركب شارع فيصل ، طيب لو منعوا الميكروباصات تقف امام الجامعة وبعدين اللى هينزل عند مترو الجامعة أو الطلبة والموظفين اللى فى الجامعة وعاوز يركب شارع فيصل هيعمل اية....!!

دى غير لو بتكلم عن العربيات وانه ضيق الحارات فى شارع السودان اللى كانت ثلاث حارات وكانت زحمة جدا دلوقتى بقت حارتين والشارع بيبقى واقف من قبل ما تتطلع كوبرى فيصل والله امبارح الكوبرى واقف من عند اشارة اول فيصل لحد بعد كوبرى ثروت وبالتالى كوبرى فيصل كله واقف اللى رايح السودان واللى رايح الجيزة .

والله دى حرام اللى بيعملوه دى