الموضوع: وشربت_هي_حجرين ع الشيشــــــــة

انا لما دخلت المنتدي مؤخرا وقريت كمية المواضيع المتصدرة الصفحات الاولي قلت عليه العوض فيكي يا مصرمن كتر المواقف الغريبة اللي بتحكوها


وأضيفوا الموقف دا

من اسبوع تقريبا كنت قاعدة انا واخواتي فمكان عام وكان جنبنا ناس قاعدة فترابيزة عبارة عن 3 سيدات ..احم احم.. ومعاهم راجل شكله غريب فعلا عامل زي البودي جارد وهو طلع كدا فعلا

وطفلة صغيرة.. عمرها حوالي خمس او ست سنوات


فلبداية لفت انتباهي جدا السيدات دول لان كان فيهم شوية حاجات مريبة من طريقة لبسهم واسلوبهم

في الكلام والعشرتاشر كيلو بودرة علي وشهم دا غير علامات مميزة

زي مثلا واحدة واخدة مطوة فوشها والتانية عنيها ممسوحة... ربنا يعافينا ويشفي الجميع انا بس الموضوع دا لفت انتباهي...

بعد شوية لقيت نزلهم 4 شيشة.. قلت وماااااااالو ماهما 3 سيدات ورجل


وهنا كانت الفاجعة العظيمة

لقيت تلات شيشات للستات وشيشة للبنت الصغيرة نازلة مخصوص

اه والله مخصوص

انا عيني كانت هتخرج من محجرها ونفسي اقوم اشدها من ايديها وارقعها جوز اقلام

البنت بتشرب شيشة مش باسلوب طبيعي.. دي بتشرب ولا المعلملين الكبار

وخصلت الحجر وطلبت غيره ونا متنحالها وهي تبصلي وتشاور للي معاها وكأنها بتقولهم عليه اني ببص عليها بس بصراحة طظ فيها مش هتكسف اني ببصلها طالما هي واللي معاها مش مكسوفين علي دمهم

دا غير ان ال _طفلة _ دي كانت حطة ميكب كااااامل وكان كل دقيقة واحدة من الستات اللي معاهم تطلع علبة الميكب وتظبطلها وشها كله


احفظنا يارب

لدرجة اني شكيت في لحظة ان دي مش طفلة صغيرة وانها شابة كبيرة وعندها مرض معين زي فيلم Orphan

وكنت متأكدة مليون فلمية ان مستحيل واحدة من اللي قاعدين دول تكون مامتها مهما كانت بالسوء دا اكيد هتخاف ولو واحد فلمية علي بنتها

وهنا جائت الطامة الكبري


لقيت واحدة من اللي قاعدين معاها بتشد منها الشيشة وبتقولها.. يابنتي غلط كدا غللللللللط


انا قلت واحدة اختشت علي دمها


لقتها بتكمل وتقول: غلط كدا الشيشة تتحط فنب البق وونتي بتشربي ترفعي حاجبك الشمال وتقفلي عنيكي اليمين نص قفلة ونتي بتبصي للناس



ساعتها حسيت بريحة مش ولا بد

بصراحة يولعوا بجاز..بس البنت دي مستقبها ازاي وحاضرها اللي عايشاه شكله ايه؟؟


بعد ربع ساعة تقريبا لقيت البنت جات قعدت فكرسي ضهره فضهري وراحت مميلة عليه وقالتلي انتي بتبصيلي كدا ليه؟؟؟؟


قلتلها ونتي مالك انا ابص مكان منا عاوزة..

قالتلي لا انا عارفة انك بتبصيلي عشان انا طفلة ومش المفروض اضرب شيشة

قلتلها كويس انك فاكرة انك لسه طفلة... وبعدين تطفلت وسألتها اذا كانت مامتها منهم؟؟

قالتلي لا مامتي فلبيت ونا بخرج مع صحابي دول كل يوم

صحابها؟؟؟ دول قرشانات في اواخر التلاتينات

وقالتلي انتي اسمك ايه؟؟ قلتلها ضحي وانتي؟

قالتلي مريم... لالالالا استني انا اسمي فريدة.. معلش اصلي بتلخبط في اسمي


البنت اسلوب كلامها اسلوب كلام واحدة في الاربعين ولفة الدنيا شمال ويمين

حد فهم اللي انا فهمته؟؟ ولا حس انا عاوزة المح لانهي مصيبة؟؟