الموضوع: العربية بتحس فعلا والله العظيم

انا عارف كدا من الاول الكل ممكن يتريق علي الموضوع ده بس والله ده انا اللي حسيته فعلا من عربيتي
الموضوع بدأ لما ابدتيت افكر في مميزات المازدا ال 3 واخدت رأي ناس كتيرة هنا وخصوصا ان الجديدة بتاعتها جامدة بجد
وقلت التغيير فرقه كبيرة فعلا ماديأ ومعنويا بالنسبة للعربية نفسها حبقي جبت زيرو وامكانيات تانية الكل عارفها لان ده مش موضوعي
المهم رحت معرض سيارات وركنت عربيتي ادامه وكان معايا صاحبي ونزلت انا وهو نتفرج علي المازدا ال 3 وشفتها وعرفت سعر الفئة اللي حخلص فيها لقيتها ب 143 ماع علينا
شكرت مدير المعرض وانصرفت انا وصاحبي وبدوس علي زرار السنتر عشان عربيتي تفتح ونمشي لقيته مش مستجيب من اول مرة محطتش في دماغي وضغط عليه تاني فتحت
ركبت العربية وهي عمرها ما كانت بتتأخر في الدوارة اصلا حلفت ما هي دايرة زي ما يكون مفهاش بنزين مثلا
لحد ما طلعت المفتاح من الكونكت وقلتلها في ايه يا سوسو ( دلع اللانسر ) دوري بقي وراي مواعيد وحطيت المفتاح في الكونتكنت ومن اول مرة دارت
خلصت اللي ورايا وبرده محطتش في دماغي وصاحبي يتريق ويقولي يا ابو سوسو
روحت وركنت العربية في مكانها وهي علي فكرة بيبقي ادماها امن علي العمارة كلها فتبقي ادمهم برده ومفيش لا قطط ولا كلاب ولا الكلام ده هنا
وفجأة الانذار الساعه 3 الفجر يضرب ويصحي الناس كلها
خرجت ببص اي عربيه اللي بتضرب لقيتها عربيتي جريت اجيب المفاتيح من جوه وطفيتها
سألت بتوع الامن حد جه جنبها بصوت عالي لاني ساكن في الدور الثامن قالولي لا قلت يمكن قطة - رغم اني عارف ان مفيش لا قطط ولا بتاع - بس محبتش اركز
الساعه 4 ضربت تاني بس المرة دي كنت متوقعها قلت لا كدا في حاجة بقي ونزلت لحد تحت اشوف في ايه فتحتها وقعدت فيها وقلتلها خلاص انا مش حبيعك ولو المازدا دي حتعمل فيكي كدا صدقيني مش حبيعك وحشتريها لوحدها ( رغم استحالة كلامي ماديا ) ونزلت منها وقفلتها وطلعت البيت تاني
ومن ساعتها فعلا لغيت تفكير في المازدا والعربية عقلت تاني وبطلت تتجن عليا
حد يقدر يفسرلي اللي حصل ده؟؟؟؟؟؟؟؟؟؟؟؟؟؟؟

طب تصدق بايه عربيتي الكلاكس بتاعها علق مره واحده و كنت مربتهاش بقالي 3 ايام نزلت عملته و مدورتهاش يدوب لسه طالع و انا ساكن في الدور الخامس راحت مزمره تاني نزلت ضربت كلاكس راح مبطل بعد كده لسه هدخل

مدخل العماره راحت مزمره رجعت ليها و قبل اما قرب كانت بطلت عرفت ساعتها انها زعلانه عشان مدورتهاش ركبت و دورتها بقت تمام و كل اما افتكر الموقف اقعد اضحك