اعترافات فيـــتـــاوي :D
هي العربيه معقوله بس السعر مبالغ فيه كتير
اكثر شئ تعبنى فيها فتيس خشن جدا ومن وهو جديد تسمع صوت بلية الدريك
تغيرها ومفيش فايده
فى المطبات تسمع صوت الابواب
استهلاك بنزين عالى جدا مهما تظبط الفوانى
نظام الفرامل الامامى سئ وبسخن التيل غلبت معاه وملوش حل
التكييف كان اصلى فى عربيتى الدوجان وبردو زفت تبريد تعبان وبيحبط الموتور جدا
غير متزنه فوق ال 100 كيلو وصوتها بيبقى مريع وكنت بخاف منها فى السرعات دى
اكسات تثبيت الكارونه مصنوعه من صاج خفيف جدا مرة قطمت احداها وكان يوم لم انساه
الابواب لاتغلق الا بالقوه ومن عدة مرات
قال ايه قطع غيار رخيصه ومتوفره وايه يعنى
عربيه سيئه جدا جدا جدا ......................الخ
هذا رأى فى هذه التحفة التى تمشى على أربع المسماة شاهين
-----------------------------------
اظن ان العنوان صادق ومضبوط جدا فهى فعلا تحفه(زيها زى الكباش اللى فى طريق الكباش فى الاقصر)
ووطبعا دا بياكد انها تمشى على اربع لان الكباش من ذوات الاربع
و الله يا شباب العربيات فى مصر اسعارها مبالغ فيها جدا و للاسف مفيش اى رقابه على الموضوع دة انا واثق ان شركة النصر مكسبها 100% على الاقل فى العربيه دى بس مش هى بس لو شفنا اللانوس و الافيو ايه الفرق الكبير اللى بينهم علشان يكون فى فرق السعر الكبير دة بين الاتنين
و كمان الاوبترا و النوبيرا ده غير عربيات تانيه كتير عربيه زى النيسان صنى بكل امكانيتها و سعرها اقل من عربيات كتير اقل منها امكانيات يعنى الصنى احسن بكتير من الياريس و الالنترا و حاجات تانيه كتير بالرغم من انها ممكن متكونش نفس الفئه كذلك عربيه زى الجين 2 كعربيه رياضيه شبابيه احسن بكتير من عربيات زى الجيتز و الماتريكس و الكوبيه اذا قارنا على اساس كماليات و جوده مش على مستوى الفئه
ناهيك عن العربيات الصينى الى بتوصل لارقام فوق ال 100000 الف بدون سبب.
عربيه زى الجالينا ليه تبدا من 140000 موتور ميتسوبيشى قديم مع شويه كماليات صينى بس ارفع الكبوت و بص على الحوض مش ممكن ادفع فيها فلوس اصلا انا اتفرجت عليها فيها امكانيات حلوة جدا بس رفعت الكبوت غيرت وجهة نظرى و انتهت العربيه بالنسبه الى و السكوربيو دى تابلوه السيات موديل 79 احسن من التابلوه بتاعها انا حسيت انى بتفرج على عربيه لعبه
المفترض ان التجميع المحلى يرخص سعر العربيه مش يغليها بس حنقول ايه هى دى مصر و لا تعليق
الشاهين تبقى عربية معقولة لو سعرها إتظبط لكن للاسف تسعير السيارات فيه استهبال جامد مش بس الشاهين........ بس حكاية ٩٠ ألف في شاهين ديه صعبة إلا لو نزلوا نسخة مرصعة بالياقوت و الالماظ :pاقتباس:
لكن مش حرام أدفع 80 و 90 ألف فى شاهين 1600
ماتنسوش إنها حمالة أسية ، وتكلفة تشغيلها بسيطة جداً ، شوفوا قطع الغيار بكام ، والأجزاء مش معقدة والصيانة سهلة مش لازم توكيل و كمبيوتر ويتعمل عليك شغل ، ودفع خلفى مش جر أمامى وتغيير كبالن وتعويم على السرعات ، ويوم ما هتبيعها هتلاقى 100 واحد ياخدوها منك ، ويوم ما تتخبط لا قدر الله هتغير ربع العربية ب 2000 جنيه !!
يعنى هى من الآخر إستثمار ! لأنها أكتر عربية زيرو فى مصر بتحافظ على فلوسك (عدا البنزين) عشان كدة ليها زبونها ولسة بتتباع برغم السعر المرتفع نسبياً
كان عندى موديل 1996 - 1300 سى سى (كانت ب 39.800 الف الميتاليك بفارق 800 جنيه عن البوية العادى !!) وإشتغلت 10 سنين بأقل صيانة تذكر وبإتباع جميع أساليب الإهمال اللى تيجى فى كابوس أى سيارة ! ومجموعة ظريفة من الحوادث ، وبعتها 2006 بمنتهى السلاسة وكانت بتجيب 160 كم/س بسهولة حتى تاريخ البيع بدون عمرة
عيبها الأكبر كان إستهلاك البنزين (موديل 1996 كاربيراتير) ، وبالنسبة لموضوع الصاج كان عادى ومايعتبرش نقطة تفوق ويعيبه عدم وجود (عضم) كتير و ثنيات (سوكة) وده كان بيخلى الصاج يتعوج بسهولة طبعاً إنما نرجع تانى نقول إنك بتلم العربية تانى بأقل التكاليف غير باقى العربيات اللى فى السوق وهى دى الميزة
أعتقد لو سعرها نزل 5 الاف جنيه بس ، مكانتش تخلى الفيرنا واللانوس والأكسنت يبيعوا عربية واحدة ، إنما تقارب السعر هو اللى فتح الباب للمنافسة نظراً لضعف الشاهين فى الكماليات والرفاهية
"و ليه ادفع 80 ولا 90 الف جنيه في شاهين ؟لاقي فلوسي مثلا علشان ادفع في عربيه متصممه سنه 1973 ومن غير اي كماليات 90 الف جنيه؟؟؟
ليه يعني؟؟
جر خلفي؟؟و الله انا مش بدخل صحرا كل يوم و اراهنك لو ركبت عربيه جديده و عرفت تفرق بين الجر الخلفي و الامامي؟؟
متينه؟؟؟"
أنا كان كل قصدى انك لما تدفع 60 و 70 ألف فى عربيات زى اللانوس و الفيرنا, يبقى مش حرام تدفع 90 ألف فى الشاهين, لكن الحق يقال, كل العربيات دى سعرها مبالغ فيه بدرجة كبيرة, زى كل السيارات الى فى السوق المصرى تقريبا.
بس ملحوظة يا أستاذ حازم صحيح انو هيكل الشاهين و الشاسيه يرجع تصميمها الى سنة 1973(131) و لكن لا تنسى أن المحرك ينتمى الى التمبرا الأحدث و التى ظلت تنتج الى ان استبدلت بالبرافو/برافا, يعنى المحرك تقنيته ترجع الى اواخر الثمانينات و أوائل التسعينات.
معاك حق فى حكاية الدفع الخلفى, فى حالة القيادة الهادئة لا تشعر بالفرق و هذا هو السبب الذى يدعوا الشركات الى اعتماد تقنية الدفع الأمامى بس الدفع الخلفى يعطيك احساسا مميزا فى المنعطفات لن تشعر به مع أى سيارة دفع أمامى.
حتى الماروتى و الألتو و ال128 سعرهم مبالغ فيهم, لكن لما أقارن ال128 بالماروتى, يبقى ال128 أكثر قيمة بالنسبة لسعرها.