هذا رأى فى هذه التحفة التى تمشى على أربع المسماة شاهين

**adel_edrees** · 02-03-2008 12:08 AM

أنا أمتلك سيارة شاهين مو 2001 كان سعرها وقتها 33700 جنيه على الزيرو و أعتقد أنها كانت تمثل أحسن أختيار فى وقتها و قمت بتركيب تكييف ساندن عليها من أول ما أشتريتها السيارة بالنسبة لسعرها وقتها كانت معقولة جدا جدا لكن يجب أن تحدد من الأول أنت عايز عربية رفاهية و ألا عايز صندوق بأربع عجلات بتكلفة معقولة فأنا عندما أركب السيارات الحديثة الأخرى مثل التويوتا كورولا و اللانسر و الأوكتافيا و الرينو ميجان و حتى اللانوس و الفيرنا تكتشف مدى سوء هذه السيارة و ستكتشف أن شركة النصر تبيع عجل أحسن لها أولا السيارة فى فترة الضمان و هى أقل فترة ضمان ممكنة لأى سيارة (خللى الزوزو الزبون يعيش مع نفسه مش هو اللى جالنا و ألا أحنا اللى جرناه و لا مؤاخذة) السيارة فى فترة الضمان يتم تغيير المساعين الأمامى و الخلفى و طبعا لازم تفتح دماغك و ألا ما فيش حاجة حتتغير و الأرضية الموكيت أنا مغيرها فى فترة الضمان خلصنا الضمان وبعدخمس سنين من شرائها أكتشفت ان العفشة باظت (50000كيلو من الأستخدام علىطرق سريعة) و روحت مغير العفشة بالكامل كل حاجة ممكن تتخيلها فى العفشة أنا غيرتها و فى التوكيل المهم ما علينا تيجى تفتح الباب تلاقى غطاء الأكرة الداخلية و قع تيجى تثبته أنسى أنت بتتكلم أزاى و خد عندك بقى الحاجات الصغيرة اللى تحرق الدم تقعد حد وراك يعتبرك بتعاقبه لا هو عارف يفرد رجله و لا عارف يقعد بيقعد بجنب و خد عندك أستهلاك عالى للبنزين بتعمل تقريبا 210 كيلو فى الصفيحة من الأخر عربية تدل على مدى الفوضى التى نعيشها و سمعت أن الأنجشكن بتاعها فى مشاكل ياما حد فك الأكصدام اللى أدام مافيهوش تحته حاجة خالص أبيض ياورد هى بس علشان الصاج بتاعها مافيهوش ألتواءت حد حاول يضغط على الجزء الأوسط من الرفرف الخلفى و الله عربية عجب أنا بأستغرب الناس اللى بتقوللك العربية دى صاجها جامد لا جامد و لا أحزنون (ملحوظة عربيتى مازالت بدوكو الفابريقة) كان عندنا عربية بيجو 304 مو 1977 لاحظ فارق السنوات تخش وتشغل الأضاءة من ذراع واحد فقط ألم تنتبه شركة توفاس الى هذه التقنية المتقدمة ألا فى سنة 2003 عندما غيروا التابلوه
أنا سمعت أنها بقت ب 58000 ألف نفسى أشوف المجنون اللى بيشتريها بالسعر ده و أمشى وراه و أقول عواد أشترى شاهين ياولاد شوفوا طوله و عرضه ياولاد يالا ياشباب عليكم وعلى الشاهين دى عربية ممتازة !!!!!!!!!!!!!!!!!!!!!!!!!!!!!!!!!

**فادى** · 02-03-2008 12:46 PM

"بس سعرها النهاردة مبالغ فيه كتييير قوى وأنا مش راضى عن سعرها ده و مش عارف ليه غليت كده؟"

سعرها قريب من سعر الفيرنا و اللانوس و الأفيو و هى أفضل منهم بمراحل فى الأداء و الثبات و قوة و التحمل و المتانة و جودة الصنع, أنا حرام أدفع 70 ألف فى عربية زى الفيرنا مثلا لكن مش حرام أدفع 80 و 90 ألف فى شاهين 1600. و يا ريت يا جماعة نبطل نقيم العربيات بالشكل و التكييف بتاعها.

**CryptonX** · 02-03-2008 01:57 PM

المشاركة الأصلية كتبت بواسطة فادى

"بس سعرها النهاردة مبالغ فيه كتييير قوى وأنا مش راضى عن سعرها ده و مش عارف ليه غليت كده؟"

سعرها قريب من سعر الفيرنا و اللانوس و الأفيو و هى أفضل منهم بمراحل فى الأداء و الثبات و قوة و التحمل و المتانة و جودة الصنع, أنا حرام أدفع 70 ألف فى عربية زى الفيرنا مثلا لكن مش حرام أدفع 80 و 90 ألف فى شاهين 1600. و يا ريت يا جماعة نبطل نقيم العربيات بالشكل و التكييف بتاعها.

حرام ادفغ 60 الف جنيه في اي من الفرنا و الانوس و الشاهين

**adel_edrees** · 02-03-2008 06:36 PM

يعنى أنتوا كلكوا شايفين أن أنا بأتجنى على العربية دى ماشى يا عم أنا موافق شايفين أن العربية صاجها جامد و بتستحمل و مريحة فى السواقة و أن التوكيل ممتاز جدا و أنها عربية جامدة جداو أن التعليق بتاعها رائع ماشى يا جماعة أنا متمسك بكل كلمة أنا قلتها عن هذه السيارة العربية دى تمثل حالة البلد

**Xpert** · 02-03-2008 06:53 PM

يا عم كل العربيات الجديده معفنه من الاخر .. الكوري عربيات مضروبه بالنار وزنها خفيف و مكنه كبيره و صاج مفيش .. الشاهين عربيه مش ركوب بس خشنه و حماله قاسيه من ناحيه انها لو اتخبطت .. وش فانوس ب 10 جنيه و اشاره ب 8 جنيه تلملك الليله .. انما عاوز تركب .. خليك في القديم .. انا كنت عملت بوست تقريباً في التوبيك ده او انت مكررهم الله اعلم .. انا راجل احب اركب العربيات القديمه .. البي ام بالذات عشان حلال فيه .. انما اي جديد .. مايسدش معايا ...

**tutankhamoun** · 02-03-2008 08:18 PM

المشاركة الأصلية كتبت بواسطة فادى

"بس سعرها النهاردة مبالغ فيه كتييير قوى وأنا مش راضى عن سعرها ده و مش عارف ليه غليت كده؟"

سعرها قريب من سعر الفيرنا و اللانوس و الأفيو و هى أفضل منهم بمراحل فى الأداء و الثبات و قوة و التحمل و المتانة و جودة الصنع, أنا حرام أدفع 70 ألف فى عربية زى الفيرنا مثلا لكن مش حرام أدفع 80 و 90 ألف فى شاهين 1600. و يا ريت يا جماعة نبطل نقيم العربيات بالشكل و التكييف بتاعها.

مش الشاهين بس اللي غالية في السوق

يعني الشاهين ما أتدفعش فيها أكثر من 55 ألف
و عندك التويوتا كورولا و ياريس سعرهما مبالغ فيه بدرجة أكبر من الشاهين و لكن بما أنهم ذوي تكنولوجيا عالية فلهم عملائهم و لو أني شخصيا لا ادفع في سيارة مثل الكورولا كل هذا المبلغ و أيضا الياريس
و يقاس على ذلك
سيارات كثيرة في السوق المصري مثل المرسيدس و البي ام الذين يرتفع أسعارهم لأرقام فلكية مبالغ فيها

**thegoodhacker** · 02-03-2008 10:16 PM

هو الصراحة فعلا ثمنها مبالغ فيه زيادة عن اللزوم ...... يعني عندك اللادا 2107 افضل منها بمراحل لانها اوسع و تتحمل اكثر منها و اقل استهلاكا للبنزين بس يعيبها ثقل الديريكسيون بس ممكن يتركبله باور ستيرينج ب2500 جنيه حتلاقي تمنها في حدود 47000 جنيه فقط......