الموضوع: رسوم النظافة ......... استعباط بالبقسماط

طبعا كلنا عارفين رسوم النظافة اللي على فاتورة الكهرباء
وبرغم انه سبق الغائها لعدم شرعيتها دستوريا ..... لكن الحكومة بتاعتنا لا يستعصي عليها اي شئ طالما فيه جمع اتاوات من الناس
ما علينا ..... كلنا رضخنا للأمر الواقع و بندفع غصب عننا وصابرين ومحتسبين
لكن البجاحة لها حدود
امبارح لقيت الباب بيحبط وشاب كدة معاة دفتر وشوية ورق
ايوه
احنا بتوع شركة النظافة
اهلا وسهلا
حضرتك احنا بنعمل مسح في المنطقة .... عامل النظافة بييجي كل يوم ياخد القمامة من امام الوحدة ( الشقة يعني )
ايون ... بييجي كل يوم تقريبا
فيه اي مشكلة منه
لأ مافيش .... بس تعالى قوللي الاول انتو شركة ايه بالظبط
احنا شركة النظافة اللي مسئولة عن الحي
انهي شركة يعني .... مش فاهم .... معلهش اصل انا بافهم على قدي شوية
يافندم الشركة بتاعت النظافة اللي الرسوم بتاعتها على الكهرباء
طب وانتو مالكو بالعامل بتاع القمامة .....؟؟؟
ماهم دول العمال بتوعنا
ازاي ؟؟؟ دول بتوع الزبالة اللي متفقين مع العمارة وبندفعلهم شهرية وفيه محصل من شركتهم بييجي اول الشهر ياخد الرسوم بتاعتهم ... 5 جنيه ف الشهر من كل شقة
لأ يا فندم دول تبعنا احنا و ...... وبعدين لقيت واحد اكبر منه واضح انه الرئيس بتاعه ظهر في الصورة وقاللي معلهش اصله جديد ومش عارف ....
عمال النظافة هما هما من غير تغيير من قبل شركتكم ما تظهر ومن قبل الرسوم اللي ع الكهرباء ومن بعدها .... والشهرية بتاعتهم زي ماهيا وبتزيد مع الزمن زي اي حاجة ..... كانت 3 جنية وبقت 4 وبعدين 5
حضرتك بتدفعلهم اكرامية .... مش رسوم نظافة
لأ انا بادفع مقابل خدماتهم وفيه محصل من عندهم بييجي يخبط ع الشقق ويقول عاوزين فلوس الزبالة لو سمحتم ...... ولما الرسوم نزلت على فاتورة الكهرباء لم يتغير شيء .... وبعدين كل السكان هنا بيدفعو واللي مش بيدفع مش بيشيلو القمامة بتاعته ... وبعدين تقوللي دول تبعنا واحنا بناخد رسوم نظافة مع الكهرباء ؟؟؟؟ هو انتم مش مصريين وعايشين معانا في نفس البلد ولا انتو منين بالظبط
يعني حضرتك عاوز تعمل شكوى ( بقرف )
طبعا ( بابتسامة صفراء)
خلاص اكتب اسم حضرتك هنا
وماله نكتب .... وبعدين هيا فين صناديق القمامة اللي في الشارع ...... الشارع بتاعنا كله فيه صندوق واحد وحلوه طن من القمامة لا تجد من يشيلها
حضرتك خد النمرة دي واشتكي
اكيد ح اشتكي ( النمرة مش بترد خالص ) لكن على مين ... وراهم ع النت والتليفونات لما اعملهم صداع نصفي مزمن
..
..
وقفلت الباب وروحت اكمل كوباية الـ على كافية

يعني رسوم في فاتورة الكهرباء وبدفع وساكتين
وشهرية للزبال وبندفع برضه وساكتين
لكن عاوزين كمان يظهروا الموضوع على ان الشركة بتجمع القمامة من الشقق من غير ما تاخد حاجة ..... والشيئ السخيف انهم بيسألوا الاسئلة باسلوب يخليك تعتقد انهم من الشركة اللي بتبعت الزبالين ... مش من الشركة الاجنبية اللي بتنهب رسوم النظافة بالملايين
يعني لو ماكنتش غلست وسألت بالتفصيل كان بقى كله تمام يافندم ومافيش شكاوي والمواطن مش بيتحمل اي اعباء غير الرسوم اللي على الفاتورة بتاعت الكهرباء .... هو مين بيضحك على مين ؟؟؟؟
بالذمة ده يبقى اسمه ايه ؟؟؟؟؟؟
هبل ع الجبل
ولا تهريج في النرويج
ولا استعباط بالبقسماط
حد يقوللي علشان انا فهمي بطيء شويتين