الواحد بيخرج من بيته شايل روحه على كفه
النهاردة نازلة من البيت زي كل يوم أركب من على الكورنيش.. باعدي الكورنيش يوميا بقالي 4 سنين عشان آخد تاكسي لحد الشغل او لو قابلت الCTA بانط فيه.. برضه من على الكورنيش.. النهاردة عايزة اعدي و طبعا مركزة انتباهي ناحية اتجاه العربيات اللي جاية ناحيتي عشان انتهز الفرصة و اعدي لما الطريق يروق نسبيا.. و بالفعل الطريق راق شوية.. لسه باستعد عشان أعدي فوجئت بموتوسيكل جاي من الاتجاه المعاكس و ماشي على آخر سرعة و كان الفاصل بيني و بينه ملليمترات و جزء من الثانية كنت هاخطي خطوة كنت هلاقيه شايلني :eek:
الحمد لله ربنا ستر و فرقت زي ما بقول لكوا جزء من الثانية.. و من شدة سرعة الموتوسيكل و قربه مني حسيت اني هاطير من الهوا اللي سببه سرعته العالية اوي كده.. و حسبي الله و نعم الوكيل.. كان بيني و بين الموت لحظات.. احساس مرعب :eek:
طبعا بعد ما رحت الشغل و هديت كده قعدت افكر مع نفسي.. سبحان الله.. ربنا كتب لي عمر جديد.. اكيد دي رسالة لية.. لسه لية عمر.. لسه عندي وقت.. لسه عندي فرصة تانية.. ياااااااه انا لسه عايشة :o