نعم لتقليب النور
انا مش بقول كدة عشان غاوى جرى مثلا.. انا بخاف من الجرى على الطرق السريعة لان الغلطة بجون... طيب ايه الحكمة انى بساند التقليب؟؟
اولا التقليب يؤدى الى نتيجة مباشرة و هى التزام السائقين فى الاتجاه المعاكس بالسرعة المقررة و يمكن اقل منها اذا التقليب حقق المطلوب و هو الزام السائقين بالسرعة المقررة
ثانيا الحكومة بتعاقب على التقليب لانه من انواع قطع الرزق بالنسبة ليها لانها مش بتدور على سلامة المواطنين و الكلام المتزوق دة... الحكومة عايزة فلوووس و لما تقطع رزق الحكومة هى حتقطع ايدك
ثالثا الحكومة بتتصيد لالخطاء مش بتحافظ على الارواح... يعنى تلاقى الرادار محطوت فى حتة لا هى خطر و لا يحزنون لكن فرصة انك تعدى السرعة القانونية حتى عن غير قصد بتبقى كبيرة جدا زى كورنيش المعادى و الاتوستراد و طريق السندباد و طريق FBI و دول السرعة فيهم 60 على اعتبار انها طرق داخل المدينة... مين فيكم بيمشى 60 لو الطريق فاضى؟؟... انا مش بقول نمشى 190 زى المجانين بس 60 على الطرق دى هبل رسمى
رابعا انت ممكن تتمسك رادار على 2 او 3 كيلو... و انت ايه عرفك ان الرادار مضبوط او بيستخدم بطريقة صح؟؟... اى زاوية ميل حتغير فى القرائه و دا غالبا اللى بيحصل لانهم بيحطوا الرادار فى ملفات و حاجات كدة عشان يبقى مستخبى اكنهم بيعملوا كبسة على تجار مخدرات
خامسا هل لو فيه باشا فى عربية و بيجرى حتتسحب رخصة؟؟ طبعا لا... حصلت قدامى بس مش رادار... فى اللجنة اللى على الاوتوستراد و انت خارج من المعادى فى اتجاه القلعة... عربية 128 بدون لوحات و متفيمة تماما... انا قلت دا حيتنفخ... الضابط وقفها و لما القزاز اتفتح راح مبتسم و سلم على اللى جواها و مشاه... و سلملى على القانون و سلامة المواطن و سلامتها ام حسن
سادسا ايه حوار سحب الرخصة؟؟؟ الرخصة دى بتاعتى و محدش له يسحبها...تتطلع عليها اه لكن تاخدها ليه؟؟؟ حتعمل مخالفة؟؟ طيب ما ام الرخصة فى ايدك اكتب بيانتها و اديهالى... ولا هو وجع قلب و لف فى المرور ورا الرخصة و الله اعلم حتوصل ولا تضيع ولا ايه... نظام متخلف تماما
انا شخصيا بقلب لما اشوف رادار و لما بلاقى تقليب من الناحية التانية بهدى عن السرعة القانوية... الحكومة مش بتخاف على المواطنين... الحكومة بتخوف المواطنين
MMamdouh