المشاركة الأصلية كتبت بواسطة khaled ayman
الف شكر يا جماعه ...
وشكر خاص لسياده العقيد خالد ...والله انا بعتبره اخويه الكبير و يكفى فقط استقباله لينا كان عامل ازاى ..فعلا مبقاش فى ناس كده ..
انا كل ده ناسى احكى تفاصيل الحادثه معلش ..
المهم ...
المكان : طريق المنصوره ..وانت داخل على كوبرى دمياط و بندخل من تحت الكوبرى على المنصوره ..
انا قبلها بشويه ..
الوقت: الساعه على ما اذكر 9ونص
التفاصيل:
داخل على ملف يمين قاسى ..بصيت فى العداد لقيته 80 ..العربيه على النقله السادسه و لسه بتسحب بس سحب ضعيف جدا لانها على السادس ...
خدت الملف بشكل هادى و طبيعى و من اليمين ...
بعد الملف مباشره و انا فى اليمين بردو
لقيت وش العربيه نزل لتحت ..جامد ...
ورايحه "بوشها على السور الى فى منتصف الطريق...
و لمن لا يعرف شكل الصور ..هو عباره عن بلوكات خرسانه كبيره جدااااا بيكون طولها حوالى 2 متر و ارتفاعها متر و نص تقريبا ..
المهم لما لقيتها رايحه بوشها ..
كسرت علجلى يمين على الاخر ..
لقيت وشها رايحه ناحيه الاراضى الزراعيه و هتقع فيها ...
كسرت شمال تانى ..
بدات افقد السيطره تماما على العربيه ..قامت زاحفه بجمبها الشمال و داخله بجمبها فى السور "وانا كاسر شمال" ..دخلت بجمبا طبعا صدمه كبيره جدا جدا جداااااااوانا خدت ما فيه الكفايه من الخبطات فى اللحظه دى ...الشرار طالع من احتكاك العربيه بالسور ..ودخان..المرايه على ما اذكر انها شايطه !!وفى اثناء ما هى بتحك فى السور ..العجله الشمال طارت من العربيه خالص ....
بعد كده لفت 360 درجه فى نص الطريق و راجت على السور بوشها ...من قوتها ..دخلت فى بلوك من السور "طيرته" الناحيه التانيه فى نص الطريق ...وطالعت بوشها فوق السور ...
ونزلت لفت تانى فى الطريق ...
ونزلت بضهرها فى الاراضى الزراعيه...
اول ما العربيه وقفت انا نزلت منها ..لقيت دخان كثيف جدا من الموتور و كل انواع الزيوت بتنزل من العربيه ...و الطريق غرقان ازاز و زيت و قطع من العربيه ..الناس اتلمت علينا ..وفصلو كابل البطاريه والاسعاف جه ...
ملحوظات:سرعه العربيه قبل التصادم كانت على اقصى تقدير 100 كم ..
سبب الحادث والله اعلم ..وجود قطع فى العجله الشمال حوالى 25 سم ...
الحمد لله