الموضوع: من فضلك:مقارنة بين هيونداى سوناتا,هوندا سيفيك و سكودا أوكتافيا A5

بص يا باشا بالنسبة الاوكتافيا من غير كلام
بص انتا عندك السوناتا 2000 سي سي و ب150 الف جنيه
و الاوكتافيا 1600 سي سي و ب153 الف جنيه
و السيفيك 1600 سي سي و ب140 الف جنيه
من ناحية الشكل الاوكتافيا تكسب
من ناحية ملائمة الطرق المصرية السيفيك تخسر جدا و علشان كده طلعها من المقارنة
مش عارف اقولك ايه
بس المقارنة حتبقى بين عربية كوري و عربية الماني او تشيكي المهم عربية اوروبي
بمواصفات الفولكس واجن
توكل على الله و جيب الاوكتافيا احنا عندنا واحدة و اي استفسار انا في الخدمة

من ناحية الشكل الاوكتافيا تكسب

دا موضوع ازواق و كل واحد و زوقه ممكن انت تعجبك الcivic و هو يعجبه الِِA5 و أنا تعجبنى السوناتا

من ناحية ملائمة الطرق المصرية السيفيك تخسر جدا و علشان كده طلعها من المقارنة

ليه تخسر؟؟
أنا رايى الِA5 خسر علشان هى أضعفهم , الcivic 140 حصان و السوناتا 144 حصان اما الA5 105 حصان يعنى تخسر.

بس المقارنة حتبقى بين عربية كوري و عربية الماني او تشيكي المهم عربية اوروبي

صحيح كوى و يابانى و تشيكى المانى بس التشيك لسه حتى منضمتش للأتحاد الأوروبى
و كمان يا جماعة العربيات مش بالبلد ماعدا الصينى
يعنى مينفعش أقارن الماروتى ب الHyundai genesis و أقول الماروتى تكسب علشان يابانى المقارنة بين العربيات نفسها يعنى الopel زى المرسيدس؟؟؟؟؟؟؟
و لا الهيونداى السانتا فى زى ال اللانوس؟؟؟
المقارنة بين السوناتا و السيفيك و A5
و طبعا منغير ماحتاج اقول حتى السوناتا تكسب وش.
السوناتا بتنافس ال Accord يعنى عيب نقارن السوناتا بالسيفيك !!!!!!!
أما الِA5 دى بتنافس نفسها يعنى بره خالص (منتنزلش أمريكا اساسا بره خالص)
معظم الwebsites االى بنقرأ عليها reviews عن العربيات بتبقى أمريكية .

أقرأ ردى هنا

كود:

http://www.nilemotors.net/Nile/showt...t=17014&page=3

السيفيك تخسر بالنسبة للطرق في مصر
علشان السيفيك واطية من الارض
مع احترامي الكامل اللي يحكم على الاوكتافيا و على موتورها اللي ركبها و جربها
بتقول ان A5 مش موجودة في امريكا بس مين قالك ان ده مقياس
عاوز اقولك ان الاوكتافيا منتشرة بهبل في الاسواق الاوروبية
و على فكرة انا شوفت عربيات في مصر و لبنان اوكتافيا تاكسي
السوناتا فيها مشكلة خطيرة جدا محدش واخد باله نها
التوكيل بتاعها و قرفه
بص يا باشا مشكلة مصر انها تفرق عن اي دولة تانية خالص
يعني مثلا لما جينا نقارن ما بين السيفيك و الاوكتافيا طلعنا السيفيك علطول برة علشان مشكلتها مع الطرق المصرية
احنا لما بنييجي نشتري عربية الفروض نبص على قطع الغيار و ملائمة الطرق المصرية و التوكيل و سعر اعادة البييع
سعر اعادة البيع للاوكتافيا احسن بكتير
توكيل سكودا ارتوك اوتو احسن من توكيل هيونداي
بالنسبة للاقاليم قطع غيار الاوكتافيا منتشرة عن السوناتا
غير كده العزم بتاع الاوكتافيا عالي اوي يعني عمر ما الموتور ياثر معاك
الاوكتافيا في السحب مش ضعيف و غير كده
الاوكتافيا و السيفيك ليهم ثقة في السوق المصري

اقولك حاجة كنت بكلم واحد صاحبي عن السوناتا قالي جملة غريبة جدا
ادفع 150 الف جنيه في عربية هيونداي
اخيرا مش معنى ان السكودا تشيكي ان الاوكتافيا مش الماني
زي السيات اسباني لكنها الماني
لان التصنيع و الاختبارات و الجودة تبع شركة اودي و فولكس واجن
يكفي ان اقولك ان الشاسيهات واحدة

صدقني موضوع الموتور ده متضخم اكتر من اللزم
و في الاول و الاخر دي اراء
واختلاف في الراي لا يفسد في الود قضية

أحب أن أشكر جميع الأخوة ممن قامو بالتعليق و الملاحظ اختلاف الاراء.
و اكن الملاحظ ايضا اجماع التعليقات علي عدم ملائمة الهوندا للطرق المصرية.
ارجو المساعدة في المقارنة بين السوناتا و الأوكتافيا بالنسبة لاسعار قطع الغيار ,استهلاك البنزين,التسارع و قوة الموتور,الأحتفاظ بالسعر بعد البيع.
و لكم جزيل الشكرز

قطع الغيار في الاقاليم منتشرة اكثر اكيد
العربية منتشرة جدا عن السوناتا
اما في التوكيل فالعربيتين متوففرة قطع الغيار
اما استهلاك الوقود فالاوكتافيا تكسب طبعا
عايز اقولك ان استهلاها احسن من عربيتي سكودا فيفوريت 1300 سي سي كبراتير بمراحل
قوة الموتور و متانته الاوكتافيا طبعا
التسارع اكيد السوناتا بس الاوكتافيا مش بطة ماشية
الاحتفاظ بالسعر بعد البيع اكيد طبع الاوكتافيا بدون مناقشة
اما موضوع اسعار قطع الغيار فمعرفش
و حد يفيدنا في الموضوع ده

قطع الغيار في الاقاليم منتشرة اكثر اكيد

معلش برده انا مختلف معاك 100000% , السوناتا تبع توكيل غبور اللى هو توكيل هيونداى فأكيد مراكز خدمة غبور فى كل مصر عندها قطع الغيار بتاعت السوناتا و كل الهيونداى حتى لو مش عندهم يقدروا يجيبوها من القاهرة فى يوم اما السكودا فبتبيع هنا فى مصر الأوكتافيا بس و دى عربية غالية يعنى أكيد مفيش انتشار فى مراكز الخدمة و قطع الغيار بعكس هيونداى اللى 30% من مبيعات العربيات فى مصر ليها فاكيد ليها انتشار

العربية منتشرة جدا عن السوناتا

علشان العربية نازلة من زماااان جدا و الnew shape بتاعها نازل 2010 ان شاء الله اما السوناتا لسه مجمعينها مفيش 7-8 شهور و انا استلمت اول دفعة

اما في التوكيل فالعربيتين متوففرة قطع الغيار

صح

اما استهلاك الوقود فالاوكتافيا تكسب طبعا

دى جبتها منين ؟ أرجو التوضيح بالأرقام
السوناتا معروف الاستهلاك بتاعها و التنك بياخد كام و الكلام دا
www.fueleconomy.gov/feg/noframes/22843.shtml

السوناتا التنك بتاعها بياخد حوالى 67 لتر و دول يمشوك حوالى 611 كيلو و كل دا بيبقى مكتوب فى التابلوه يعنى ممكن اقولك جوه البلد average الاستهلاك اد ايه لو تحب.

قوة الموتور و متانته الاوكتافيا طبعا

لا تعليق على النقطة دى خالص !!!!!!!!!!!!!!!!!!!!!!!!!!!
قصدك ايه بالمتانة؟
يعنى لو قصدك التقفيل الداخلى اقولك اه اما غير كده لأ طبعا و شرحتلك موضوع التاكسى اما قوة الموتور مش قادر ارد من كتر الضحك :D

التسارع اكيد السوناتا بس الاوكتافيا مش بطة ماشية

شوف حجم الأوكتافيا و قولى ينفع الموتور دا او دا؟
1.6 - 75 bhp (56 kW) / 100 bhp (75 kW) / 102 bhp (76 kW) (8v)
1.6L DOHC engine can hit from 0 to 100 km/h in 12.0 sec., and reach 187 km/h as top speed MT.
1.6L DOHC engine can hit from 0 to 100 km/h in 13.9 sec., and reach 181 km/h as top speed AT.

الاحتفاظ بالسعر بعد البيع اكيد طبع الاوكتافيا بدون مناقشة

دى الحقيقة معرفش الأوكافيا بتحافظ على السعر و لا لأ و طبعا السوناتا لسه متجربتش بس بالنظر لسرعة انتشارها اعتقد انه هيكون ممتاز.

اما موضوع اسعار قطع الغيار فمعرفش

أنا معرفش الأوكافيا بس عندى فكرة بسيطة عن السوناتا
غالية جداااااا (مثال أنا غيرت تيل الفرامل من أسبوع تقريبا و دفعت 1000 جنيه بالضربية و المصنعية و دا مبالغ فيه جدا خصوصا ان سعره فى امريكا ميكملش 300 جنيه و سعر تيل الفيكترا الجديدة 1000 جنيه برده و كوريا عملتها معتمدة على الدولار اما ألمانيا يورو طبعا .
سبب تغيير التيل علشان الناس اللى ممكن تقول دا عيب صناعة لأ العربية معايا بقالها 8 شهور تقريبا و عامل بيها حوالى 19000 كيلو فمفيش عيب و لا حاجة.

السوناتا ضمانها 100000 كيلو أو 3 سنين.

بالمناسبة احنا ناقشنا نقط كتير معظمها ميهمنيش و سبنا النقط الأساسية
أولا السوناتا فئة أعلى من الأوكتافيا (بتنافس الكامرى و الأكورد)
أعتمديتها اعلى طبعا من الأوكتافيا من غير كلام بدليل أنها تاكسى فى العالم كله و بدليل نزولها و منافستها بشدة فى السوق الأمريكى اللى هو أكبر سوق عربيات فى العالم و اللى هو هدف كل صناع العربيات يبيعوا هناك و السكودا كمركة كلها مش موجودة فى امريكا اصلا!!!
اما من ناحية القوة فمفيش أى مجال للمقارنة السوناتا اللى فمصر 2000cc-144 حصان أو 2400cc-162حصان و للعلم كمان 6 شهور بالكتير التغيرات الجديدة اللى فى السوناتا هتنزل مصر زى الموتور 24000cc-175حصان و معرفش ال2000 حتبقى كام حصان.
أما الأوكتافيا 105 حصان مانيوال و 115 حصان أوتوماتيك يعنى الألنترا اقوى منها!!!
من ناحية الoptions أعتقد السوناتا أعلى ال2000 مانيوال فرش جلد - multifuction - mp3 - جنوط - تكيف أوتوماتيك.

من ناحية الشكل دى أزواق انا رايى السوناتا احلى و انت رأيك الأوكتافيا احلى

أهم حاجة كمان التكييييف السوناتا االى فيها دا مش تكييف دا فريزر!!!!!!!!
بجد دى أهم مميزات العربية دى تكيفها عمرى ماشوفت زيه , ليه؟ علشان أنا سمعت ان قوة التكييف بتعتمد على قوة الموتور بس الصراحة أنا مش متأكد من المعلومة دى و السوال ليك الأوكتافيا تكيفها شكله ايه؟

من ناحية السعر زى بعض
موضوع تجميع لبعربية فى مصر دا بيخلى الجمرك 10% بس و الباقى بيبقى فى جيب غبور (يقولك تكاليف انتاج المصنع زى العمالة و الكلام دا)
أنا لسه عند رايى لا مجال للمقارنة نهائيا !!!!!!

انا مش قصدي ان موتور السوناتا انه اضعف من الاوكتافيا و الدليل اني قولت ان التسارع اكيد للسوناتا و ربنا يضحكك كمان و كمان و اشوفك سعيد علطول
انا بتكلم بالنسبة لعندي في الزقازيق مثلا من ناحية توافر قطع الغيار
اه هيونداي واخدة 30 من حجم السوق
لكن في فئة الصالون المتوسط واخدة كام و سكودا كام
اقولك كفاية تفتح كبوت الاوكتافيا بس و تشوف الانبهار
صدقني بجد موتور الاوكتافيا جامد و مش مقصر مع العربية و الناس دي مش بتهزر
الاوبشن لأ خالص شوف الاليجانس فيها اوبشنز لدرجة الهبل بمعنى الكلمة
حتة التوكيل ده انا سمعت انه زحمة جدا و دي مشكلة
مراكز الخدمة للهيونداي اكتر من السكودا مفيش مناقشة
بس المهم انك تاخد خدمتك بسرعة ورضا و بكل سهولة
التكييف بتاعها تحفة و اكبر دليل ان موتورها جامد انه على استعداد لتشغيل ثلاث تلاجات تقوم بتسقيع اللي جوا التلاجة و ليس الحفاظ على برودتها
استهلاك البنزين اكيد واضح كفاية السعة اللترية و Hp
على فكرة انا كنت محتار نجيب السوناتا ولا الاوكتافيا و لا الاوبل الاوكتافيا
و باذن الله هاجيب عربية جديدة و شكلها حترسي على جين 2 و حييجي استاذ برضه حيقولي و يقولي الياريس بتاعتي احلى و انا اقوله لأ

في الاول و الاخر احلى حاجة ان الواحد يبقى مقتنع بعربيته و مؤمن بيها
انا مقتنع بعربيتي و حضرتك مقتنع بعربيتك
المهم ان التنافس و الاختلاف في الراي ده باقي الاعضاء يستفيدوا منه
و ده اساس قيام المنتدى
ان الكل يستفيد
و ياريت حضرتك تعمل لينا توبيك تجربة قيادة للهيونداي سوناتا

انا مش قصدي ان موتور السوناتا انه اضعف من الاوكتافيا و الدليل اني قولت ان التسارع اكيد للسوناتا و ربنا يضحكك كمان و كمان

معلش يبقى انا فهمت غلط بس دا اللى انا فهمته من كلامك دا

قوة الموتور و متانته الاوكتافيا طبعا

انا بتكلم بالنسبة لعندي في الزقازيق مثلا من ناحية توافر قطع الغيار
اه هيونداي واخدة 30 من حجم السوق
لكن في فئة الصالون المتوسط واخدة كام و سكودا كام

م انا قلتلك علشان الأوكتافيا نازلة من 2004 اما السوناتا لسه مجمعينها من أقل من 7-8 شهور و كمان السوناتا مجمعة فى مصر يعنى المصنع بتاع غبور له طاقة انتاجية و هو مصنع صغير اوى كمان يعنى له انتاج محدود فى السنة اما الاوكتافيا مستوردة يعنى لو السوق المصرى يستوعب كانوا استوردوا كتيييييييير , استنى كده كمان سنتيت تلاتة و قولى مين فيهم منتشر اكتر;).
كمان دا مالوش علاقة خالص بقطع الغيار انا قصدى ان هيونداى بتبيع عربيا كتيييييير اوى علشان كده لها مراكز خدمة فى كل حتة فمصر و بالتالى هتلاقى قطع غيار السوناتا فى كل حتة فى مصر اكتر بكتير مت السكودا اللى مبيعتها الاجمالية فى مصر قليلة فهمت قصدى؟

موتور الاوكتافيا جامد و مش مقصر مع العربية و الناس دي مش بتهزر

فى واحد اعرفه عنده الأوكتافيا قالى غير كده خالص و ياريت لو حد عنده العربية يقولنا رايه بصراحة , الراجل قالى لما العربية تيجى تنطلق تحس انها بتاخد وقت شوية و دا منطقى و طبيعى لما عربية بالحجم دا على موتور 105 و لا 115 حصان اوتوماتيك يبقى طبيعى تكون ضعيفة و زى مقولتلك الشركات الكبيرة ذى تيوتا و bmw عمرهم ميضحوا بسمعتهم و يبيعوا عربية بالحجم دا اوتوماتيك .

الاوبشن لأ خالص شوف الاليجانس فيها اوبشنز لدرجة الهبل بمعنى الكلمة

أنا بقارن الoptions بالنسبة للسعر بمعنى قارن كده بين السوناتا ال2000 مانيوال و الأوكتافيا المانيوال و لا السوناتا 2000 اوتوماتيك و الأوكتافيا الأوتوماتيك و لا السوناتا ال2400 و الأوكتافيا الاوتوماتيك اللى سعرها 185000 لا مجال نهائى للمقارنة و انا كتبت الفرق فوق و الاليجانس بتوصل ل 230000 يعنى اغلى من السوناتا ال2400 ب 45000 فالمقارنة بالنسبة للسعر.

حتة التوكيل ده انا سمعت انه زحمة جدا و دي مشكلة
مراكز الخدمة للهيونداي اكتر من السكودا مفيش مناقشة
بس المهم انك تاخد خدمتك بسرعة ورضا و بكل سهولة

أه فعلا التوكيل زحمة جدا بس منظم جدا بمعنى انك لما تتكلم تحجز بالتليفون و تكون هناك فى معادك بتخش فى معادك و يقولك الساعة كذا تبقى خلصانة و فى اتوبيسات توديك اماكن معينة لو عايز تمشى و تيجى بعد متخلص و كمان عندهم ممكن تدفع 1000 جنيه مرة واحدة فى العمر و يعملولك الصيانة تحت البيت لو تحب و كمان بيفتحوا كذا فرع جداد و برده ممكن تروح لمركز من مراكز الوكلاء المعتمدين تعمل عنده الصيانة بسيطة يعنى انا مشوفتش اى مشكلة خالصصصصص من ماحية الموضوع دا.

التكييف بتاعها تحفة و اكبر دليل ان موتورها جامد انه على استعداد لتشغيل ثلاث تلاجات تقوم بتسقيع اللي جوا التلاجة و ليس الحفاظ على برودتها

فكرتنى بموضوع التلاجة دى كمان يعنى ناس بتهزر (التلاجة دى بتنزل بره فى العربيات اللى سعاتها اللترية جامدة ) و بعدين قوى ازاى مانت عندك قوة الموتور و عندك حجم العربية و عارف كام حصان يبقى القوة حتيجى منين؟؟؟؟؟

استهلاك البنزين اكيد واضح كفاية السعة اللترية و Hp

معلش اسال و قولى برده انا اديتك site عرف من عليه كل تفاصيل استهلاك بنزين السوناتا علشان الناس تستفيد.

على فكرة انا كنت محتار نجيب السوناتا ولا الاوكتافيا و لا الاوبل الاوكتافيا
و باذن الله هاجيب عربية جديدة و شكلها حترسي على جين 2 و حييجي استاذ برضه حيقولي و يقولي الياريس بتاعتي احلى و انا اقوله لأ

الف مبروك مقدما و لا طبعا انت حر هات العربية اللى انت عايزها و انا معنديش يارس و انا حاسس بنبرة تريقة مش عارف ليه؟؟؟؟؟ دا احنا بنقارن بين عربيتين ايه لزمتها التربقة

في الاول و الاخر احلى حاجة ان الواحد يبقى مقتنع بعربيته و مؤمن بيها
انا مقتنع بعربيتي و حضرتك مقتنع بعربيتك
المهم ان التنافس و الاختلاف في الراي ده باقي الاعضاء يستفيدوا منه
و ده اساس قيام المنتدى
ان الكل يستفيد

بالظبط كده صدقنى اللى خلانى اكتب الرد المطول دا و دفاعى باستماتة عن السوناتا انى بحب اتابع اخبار العربيات و اسعارها و امكانياتها و الحاجات دى فلقيت الناس بتقارن السوناتا بالبيجو 407 و الاوكتافيا و الفكترا فدا عصبنى لأن العربية اقوى و اعلى فى الامكانيات من كل دول و أنا فعلا كنت فحيرة قبل مايجمعوا السوناتا بين الجيتا و الأوكتافيا بس لما جمعوا السوناتا لا مجال للمقارنة خالص اشتريتها علطول .
اللى مساقش عربية 2000cc أو اقوى من فضلك اعمل test drive للسوناتا و قول بعديها اى حاجة تانية.
ازاى نقارن عربية 1600 بعربية 2000 ولا 2400 دا كلام ؟
لأ و كمان ايه امكانيتها اكتر بالمقارنة للسعر و عربية معروفة عنهم برة مصر و عربية اقتحمت اكبر سوق سيارات فى العالم و ننافسها بعربيات مستحيل تدخل السوق دا حتى مش تنافس فيه؟؟ كمان اتا ردودى معاها ادلة من كذا site أمريكى او اوروبى و النت عندك دور بنفسك و شوف ينفع دى تتقارن بدى ولا لأ.

و على فكرة انا شوفت عربيات في مصر و لبنان اوكتافيا تاكسي

أنا عمرى ماشوفت اوكتافيا تاكسى فى مصر ولا سوناتا لاننا بنسترخص

احنا لما بنييجي نشتري عربية الفروض نبص على قطع الغيار و ملائمة الطرق المصرية و التوكيل و سعر اعادة البييع

كل دا يبقى السوناتا

غير كده العزم بتاع الاوكتافيا عالي اوي يعني عمر ما الموتور ياثر معاك

و اكيد السوناتا موتورها احسن 100 مرة

الاوكتافيا و السيفيك ليهم ثقة في السوق المصري
اقولك حاجة كنت بكلم واحد صاحبي عن السوناتا قالي جملة غريبة جدا
ادفع 150 الف جنيه في عربية هيونداي

أنت كده جبت الخلاصة !!!!!
معلش صاحبك دا عنده جهل فى مجال السيارات و انا اوعى تفهمنى غلط انا مثلا عندى جهل فى مجال كرة القدم كده كل واحد اكيد جاهل فى حاجات كتير.
السوناتا ليها ثقة عالمية و اسم كبير يعنى انت عاجبك العربية اللى لها ثقة فى مصر و سايب العربية اللى لها ثقة فى العالم كله و اوله امريكا؟؟ لو صاحبك كان بيقرا عن العربيات عالميا و ايه كويس و ايه لا كان عرف ان السوناتا عربية لا تقارن بالسيفسك حتى لانها تقارن بالفئة الاعلى منها و هى ال accord. و ادى فيديو مقارنة بينهم , سيبك ان السوناتا كسبت لان بيقولك كانوا مظبطين السواق بس شوف دى المقارنة بين عربيتين بينافسوا بعض.
www.youtube.com/watch?v=kBhiB_qH1KY&feature=related

أكتب على youtube:octavia a5 حتلاقى video واحد بس , اكتب سوناتا هتلاقى كتييييييير.
بقولك عربية معرفة عالميا و موضوع يدفع 150 الف فى عربية كورى ايوه حسب العربية نفسها محنا مينفعش نقول السوناتا وحشة علشان الفرنا فيها عيوب مثلا دى بتلات اضعاف دى زى السكودا الفيليشيا ينفع نقارنها ب الa5.
طب الsuzuki يابانى يعنى نقارن السوزوكى باللكسس؟؟ و بعدين اللكسس ملهاش ثقة فى مصر و لا حد يعرفها مع انها بتنافس مرسيدس و bmw منافسة شديدة جداااا بس مبتتجمعش فى مصر فجماركها غالية. يعنى بذمتك السانتافيه و لا الاوبل الكورسا دى ب400 و دى ب80 مع ان دى المانى و دى كورى.
بعدين سكودا صحيح المانى بس قطع منها بتتصنع فى التشيك و العربية بتتجمع فى التشيك!!!!!!!!!
فهمت قصدى؟

و ياريت حضرتك تعمل لينا توبيك تجربة قيادة للهيونداي سوناتا

السوناتا مش محتاجة و دا اللى انا بقول عليه العربية دى معروفة و محترمة عالميا و تقدر تشوف reviews عنها فى اى site بتاع عربيات فى اى حتة فى العالم مثلا هنا
autos.yahoo.com/2008_hyundai_sonata-reviews_user/
يا رب يكون الناس اللى بتسال و بتقارن استفادت

و متشكر جدا على ردودك و وقتك ربنا يخيك الصراحة