الحلقه الاولى (بودرة ركب النمل)
كلنا طبعا للاسف عندنا الداء اللى اسمه دش
وكلنا بنتفرج عليه كمحاوله لنسف اى بقيه باقيه من معدل الذكاء اللى عندنا بس مش دة الموضوع
الموضوع حاجه خطيرة وجت فى بالى دلوقتى اما شفت اعلان مستفز
مش عارف بودرة ايه تعالجك من العقم لا وبودرة للسيدات وبوردة للرجاله
تخصص يعنى
الكارثه فى الاعلان دة كمثال حاجتين ان المعلن بيلعب على وتر حساس جدا بالنسبه للناس اللى عندها عقم لاقدر الله ودى كارثه كبيرة
والكارثه الاكبر انه مجهول المكونات يعنى متعرفش ايه على ايه وهل انت جسمك معندوش حسااسيه تجاة اى من المكونات او فى مكون هيتفاعل مع دوا انت بتاخدة او مش مناسب لسنك او او او والاحتمالات كتير جدا
ودة قطعا معمول تحت بير السلم لانه لا عليه موافقه وزارة الصحه ولا التموين يعرف عنه حاجه لانه مش معرفو هو مصنف كدواء ولا كسلعه غذائيه
لان دى حاجه ودى حاجه
هنقوزل واحد ونصاب
لا وحاطط نمر تليفونات وبيعمل اعلان كل 4 ثوانى ومحدش قله انت بتعمل ايه واللى انا واثق منه انه بيكسب كتير والا مكنش كمل فى حملات الدعايه الضخمه دى واللى انا واثق انها بتعدى ملايين كل شهر
السؤال المنطقى هو متساب ازاى وبيدفع المعلوم لمين لانه مش مقنع انه متساب كدة علشان مش واخدين بالهم منه لاسمح الله
ثم فى حاجه تانى عدم الوعى ومش هقلك الجهل لان للاسف ناس متعلمه بتروح وتشترى منه
وانا كلمت واحد بالصدفه وهو محاسب وشغال فى وظيفه محترمه فى بنك اجنبى
الرد بتاعه غاظنى
بيقلى حتى لو منفعش اهو مش هيضر دى اعشاب
وطبعا مقتنعنش انه ممكن تركيبه اعشاب تقصف عمرة بدرى بدرى
وقيش على كدة بقى علاج السكر والجدرى والايدز وكل الامراض طيب انا كصيدلى هشتغل ايه فى وجود المنتج دة وبرضه الدكتور هيشتغل ليه ادام المنتدى العبقرى دة بيعالج من البرد لمرض السكر مرورا بالكلى وباقى لسته الامراض المستعصيه فى مصر
هل انتشار الاعلانات دى دليل على جهل الحكومه عنها ولا دليل على تفشى الفساد لاقصى الدرجات فى الاجهزة الرقابيه
:dعلى فكرة عندى بودرة هايه عبارة عن ركب نمل وشنب صرصار مراهق وجناح حمامه مريضه نفسيا وديل هدهد يتيم بيعالجح كل حاجه وبسعر خاص جدا 199 جنيه