تجربتى الكاملة مع مرايات 505 موديل 1984

**blackmirror** · 08-08-2010 09:05 PM

كان عندى مشكلة فى المرايا الشمال فى بيجو 505 موديل 1984 ،،
فكرت وقولت أجيب المرايات بتاعة الموديل إللى أحدث بالمرة لان شكلها أجمل وأجيب جوز بالمرة

نزلت شارع مجلس الأمة لقيت هناك مرايات صينى الجوز ب 110 (الشكل الجديد) والمتعارف عليها عند المحلات (بدراع) ، ومرايات تيوانى الجوز ب 150 (الشكل القديم) والمتعارف عليه عن المحلات (ببكر) وملقتش حاجة إسمها أندونيسى خالص
المهم فكرت وقلت أجيب الصينى وده بيتكسر وده بيتكسر
خت جوز صينى وجيت أركبهم
بغض النظر عن إن أماكن الفتحات مش هيه هيه بالظبط زى إللى عندى بس ظبطهم وكده
لقيت المرايات زباااااااالة زبالة الزبالة والزجاجة مستويه مش محدبة وبالتالى حجم الرؤية محدود جدا،،
والبلاستيك تعبان ومتلخلخة من بعض فضلت اركب وأعافر لغاية مابوظت واحده منهم
حلفت منا جايب غير الشكل القديم بتاعها
رجعت للمحل ورجعتلو المرايا السليمة وخت واحدة تيوانى الشكل القديم ب75 جنيه وركبتها وممتازة جدا والزجاجة محدبة
والرؤية 100 100
نصيحة بقى :
ماتجيبش مرايات 505 صينى حتى لو ببلاش
ولو عربيتك موديل 84 فيما أقل هاتلها المرايات بتاعتها (البكر) علشان لو جيبتلها الشكل الجديد (بدراع) البلستكة إللى بره مش هتعرف تثبتها وهتضطر تخبط وتخرم فى الباب لان فى إختلاف حقيقى بين الباب الجديد والقديم
وخليك فى المرايات التيوانى (أو الفرنسى طبعا)
وربنا يوفق الجميع واشكركم على المساعدة

**kisho55555** · 08-08-2010 10:29 PM

الف شكر على المعلومة يا باشا ...

**أحمد علوان** · 10-08-2010 03:19 AM

شكرا على المعلومة ياشا واكيد كلنا هاناخد بيه
ولو ممكن سؤال بالنسبة للبيجو 305 متعرفش مرايا يمين تعمل كام؟
او لو معاك رقم المحل اللي جبت منه تديهوني اكلمة

**MASERATI** · 10-08-2010 04:17 AM

السلام عليكم و رحمة الله و بركاته

و كل عام و أنتم بخير بمناسبة شهر رمضان الكريم , أعاده الله عليكم بالخير و اليمن و البركات

فكرتنى بمرايات البيجو ال 505 بتاعتنا الموديل 1980 , هى أصلا كانت نازلة من المصنع بمراية واحدة بس فى باب السواق لأنها كانت GR مش SR , المهم , المراية باظت ييجى من 15 سنة و أنا عملت فيها فالح و حاولت أفور المكنة بتاعتها عشان أصلحها , قامت باظت خااااااااااااااااالص , المهم خلعتها و كنت ماشى بالمراية بتاع الصالون بس لأنها كانت طوييييييييييييييييييييييي ييلة و مش مخليانى محتاج اللى فى الباب و فضلت مدة طويلة ماشى بالعربية من غير مرايات عالباب و كان طبعا شكلها مقرف جدا , زى مايكون الواحد ماشى فى الشارع و ودانه مقطوعين , لحد مجيت فى مرة كنت فى ادارة مرور الدقهلية عندنا هنا فى المنصورة عشان أفحص و اجدد الترخيص 3 سنين و المهندس عمل فيها خضرة الشريفة و مارضاش يوقع لأن العربية ماكانش فيها مراية على باب السواق و لا مساحاااااااااااااات !!!!!!!!!!!!!!!!!!!! .

قمت أنا راكن فى جمب و مشبط المراية بتاع الباب و مساحة واحدة و كملت الفحص , مهندس طيب مش كده ؟؟؟؟؟

و بعدها روحت جبت مرايتين استيراد من عند واحد بتاع بيجو مشهووووووووووووور أوى عندنا فى المنصورة اسمه ( عادل سراج ) و أنا فاكر أن المرايتين الفرنساوى الاستيراد اللى مكنتهم كانت شغالة زى الفل و الحمد لله لحد دلوقتى - ماشاء الله - شغالين زى الحلاوة , كانوا ب 120 جنيه باين , و الله مانا فاكر .

الكلام ده كان من 10 سنين .

هيه , كانت أياااااااااااااام .

آسف للاطالة .

مازيراتى كواتروبورتيه