الموضوع: مشكلة السحب اتحلت والحمد لله

ازيكم يا شباب ,
العربية بقالها فترة سحبها ضعيف و لو شغلت التكييف تبقى زي البطة البلدي ,
المهم قلت يمكن من البوجيهات علشان عاملة 14 الف ك. و جبت بوجيهات ngk تيتانيوم من الوكيل (التوفيق) في السيدة زينب و سلوك بوجيهات كوري و فلتر هواء gm و قمت بتنظيف البوابة و تغيير الحاجات اللي جبتها و جربت , لقيت الاداء إتحسن شوية بس بره السحب ضعيف ,
المهم واحد صحابي كان بيشكرلي في ميكانيكي ناحية المنيل و انه بيسافر لكوريا يعني ميكانيكي جامد , المهم كنت معدي جنبه فقلت اعدي عليه و اشوفه ,
المهم رحتله و بص على العربية وأول ما جه يجربها قاللي ان طرمبة البنزين هيا اللي عاملة المشكلة دي و محتاجة تتغير , و لازم أجيب الاصلي مش الصيني و مجبش الإستيراد علشان هتبوظ على طول ,
ووصفلي واحد اسمه احمد الخواجة امام القرية الفرعونية علشان اجيب منه , فقلت أروح و أشوف اسعاره ايه , و لما وصلتله لقيته قافل فرحت لأبو الحسن و قلت أشوف الميكانيكي محمد هاشم ,
و لما وصلت و قلت لمحمد على مشكلة السحب و بص على العربية و جربها و هي واقفة و لقيته فك سير الكاتينة و فك طنبورة الكردان و ترس الكردان و قاللي ان المشكلة ان فيهم بوش و لازم يتغيروا و كمان سير الكتينة على الرغم من إنه عامل 12 الف ك. لكنه حالته اتأثرت من البوش اللي في الطنبورة ,
و بعد ما غيرهم و جربت لقيت العربية ما شاء الله بقت كويسة جداً ,

يعني لو كنت مشيت ورا الميكانيكي الأولاني كنت إتدبست في طلمبة تعدي الـ 500ج بدون داعي دا غير إنه ممكن يغير حاجات تانية و دا غير المصنعية ,,
معلش طولت عليكم بس قلت انقل معلومة للجميع.