عربية موديل 2011...ادخل وشوف

**abo_lamar** · 09-08-2010 11:41 PM

السلام عليكم ورحمه الله يا شباب
النهاردة وانا راجع البيت عجبني موديل عربية شيك اوي وجديدة اسمها حــمـــارســـيــدس قودة 2 حمار والشاسية بتاعها خشب ابلاكاش ....!!
بالزمة ده منظر ... والله مفيش بلد في الدنيا ممكن تلاقي فيها المنظر ده , عربية كارو ماشيه وسط الشارع بين العربيات وطظ في المرور وفي الناس كلها مادام كل حاجة ماشية سمك لبن تمرهندي .

[aldl]http://www.9m.com/upfiles/FHw86396.jpg[/aldl]

**slim_shika** · 09-08-2010 11:59 PM

طول مامفيش مصلحة إنهم يلغوا الكارو مش هيلغوه...

ممكن يعملوا رادارت ويغلوا العربيات والبنزين كده يعني مصالح.

**abokoko** · 10-08-2010 12:22 AM

معايش وارزاق

هى صحيح عطله شديده لمرور ومنظر غير حضارى
واكيد ضرورى التغيير

بس معايش وارزاق

**تامر.محمد** · 10-08-2010 03:27 PM

و على الدائري كمان موجود يا باشا

**MOK3336** · 10-08-2010 09:43 PM

المشاركة الأصلية كتبت بواسطة beautiful0mind

تفتكر اللى راكب العربية الكارو ده حابب يعنى انه يركبها او يشتغل عليها او حتى يبقى صحبها
ده رزقة ورزق عياله واهله ومش بايده انه يشتغل اى شئ تانى ..دى ناس فتحت عنيها ع كدة ومتعرفش تعيش غير كدة

العيب كل العيب ع اللى مفتحلهومش باب رزق تانى ....وصل حلنا لكدة

عندك حق
و ممكن تلاقيه كمان عنده أمانه مش عند رجل أعمال
بس ده ميمنعش ان ده غير حضاري و لكن الغير حضاري ان الدوله تنظف من علي الوش بس و تسيب ( الوساخة ) معلش هي ملهاس اسم غير كده مداريه تحت

يعني كلنا عارفين ان الشوارع المهمة بس هي ايلي بتتجمل و تتنظف و تترصف علي أعلي مستوى ولكن بقي الشوارع الغير مهمة و مش في خط سير كبار الدوله تتساب زي ما هى ( ولا حد عنده إعتراض )
و أقولكم أقرب مثال
الشارع ايلي انا ساكن فين فين مش مرصوف لحد دلوقت ليييه
عشان حظة الأسود واقع بين حيين
الحي الأول يقول ده مش تبعي و انا مش هصرف عليه
الحي الثاني يقول نفس الكلام
لدرجة ان كل الشوارع و الحواري ايلي في المنطقة مرصوفه إلا هو ..؟

ههه و طبعا غير المجاري ايلي كانت لسه ضاربه فيه من يومين و تقريباً كده كانت ماسورة مياه شرب
و البلاعة ايلي حطين عليها كوم من الخشب و الطوب عشان مفيش حد يقع فيها
مع ان و الله الشارع في نص البلد
ياتري بقي لو الشارع ده بيعدي منه حد مهم ولا في مصلحة حكومية مهمة كان ده بقي الحال
فنسيب الراجل الشقيان ده في حالة كفاية انه مأخدش قروض من البنوك و هرب أو دخلنا مواد غير صالحة للإستخدام الأدمي ( طيب ده حتي بيساهم في تنظيف الشوارع من الزباله ) عشان بجد البلد بقيت مليانه زباله و ياريت تنظف بقي
و اللبيب بالإشارة ...

**MASERATI** · 10-08-2010 10:25 PM

السلام عليكم ورحمة الله وبركاته

و كل عام و أنتم بخير

الحكومة هنا فى مصر - و لا بلاش لحسن أتوقف - لو بتفهم , كانت لمت العربيات الكارو دى من الناس و ادتهم بدل منها عربيات نقل الصغيرة اللى هى السوزوكى دى بس بالتقسيط المريح و من غير فوايد زى مشروع احلال التاكسى و أهو يبقى حلت كااااااااااام مشكلة مع بعض من مظهر غير حضارى لاختناق المرور و كمان حسنت من الأحوال المعيشية للناس دول, بس تقول ايه , هيفضل الحال على ماهو عليه لحد ما رجل أعمال كبييييييييير ياخد باله من السبوبة دى و يجيب صفقة عربيات نقل بايظة من بره عشان يكسبله فيها كام مليار , ساعتها هتلاقى بتوع المرور و المرافق ماشيين فى الشارع يقفشوا فى العربجية و يصادروا عربياتهم و الحمير و اللى مش عاجبه ينضرب بالكرباج و أودام الناس كلها عشان يبقى عبرة لكل العربجية التانيين و يدوهم بالاجبار العربيات النقل اللى الراجل اياها جايبهم و بأغلى من أى مكان تانى و تلاقى قرار ظهر فجأة , أن العربيات دى بالدات ممنوع استيرادها لأشخاص أو مثلا يقولك أن اللى عاوز يستوردها لنفسه , لازم يكون بيستورد موديل السنة اللى بعد اللى بعد الجاية, يعنى لو احنا لو فى 2010 , اللى عاوز يستورد , لازم يجيب موديل 2013 ماينفعش موديل 2012 ( شرط تعجيزى بقه ).

غير كده , هتفضل العربيات الكارو فى الشوارع و هتفضل أزمات المرور و هتفضل الحمير و الخيول تقضى حاجتها فى نص الشارع و أمام كل المارين فى الشارع , و يجعله عامر .

آسف للاطالة

مازيراتى كواتروبورتيه