الموضوع: ملاك بروتون برجاء عدم التجنى على السياره

المشاركة الأصلية كتبت بواسطة mygen2

طب لما العربيه عاجباك أوى كده وهى فعلا عربيه كويسه جدا وبتشكر فى التوكيل اللى كل الناس أجمعت على أنه توكيل سىء جدا عاوز تبيعها ليه؟
أنا معاك أن فى ناس بتضخم المشاكل اللى عندها وبتعمل مشاكل كبيره من حاجات صغيره بس ده مش معناه أن سعر إعادة البيع بيقل عشان كده العربيه لسه سوقها مش كبير فى مصر وبالرغم من أنها أبتدت تنتشر فى مصر إلا أن لسه فى ناس كتير متعرفش عنها حاجه والناس بتاخد رأيه من أصحاب العربيات دى وكلهم أجمعوا بما فيهم أنا أن التوكيل سىء جدا ولا يستحق أن يقوم بخدمة العربيه دى.
ربنا يوفقك وتقدر تبيع عربيتك بسعر كويس.

انا مقلتش انى عاوز ابيعها اانا قلت بثمنها تفرق كتير

المشاركة الأصلية كتبت بواسطة eslamkasem

سبحان الله انتا مبسوط من العربية طيب عاوز تبيعها ليه ؟

انا مبسوط من العربية بس عندي عيب بجد بيخلني احس اني راكب عربية موديل سنة 30 الا وهو التزيق من علبة الدركسيون والي التوكيل بيحله بتركيب ابزيم يمسك العلبة وطبعا مع اول طب بيرجع الصوت اسوء من الاول تفتكر اقول علي التوكيل ادائة ممتاز ولا اقول عليه توكيل متواضع الي ابعد الحدود ومستخسر يركب علبة دركسيون وعاوز يخسر في سمعة العريبة ومش فارق عندو

هما قالوا فى التوكيل ان التعديل جى :b4_048:

سيارات بروتون معادله صعبه لكن بالنسبه للمصريين عربيه وحشه ليه ؟ لانها معمره وقويه وراسيه على الطريق وبكده هيا عربيه وحشه

ولا حياة لمن تنادي " مناقشة للمرة المليون بعد المليون " و لا اكنك قلت اي حاجة خالص

أنا ماليش دماغ أدخل مناقشة زى دى فى رمضان عشان ما أخسرش صيامى للأيام الجاية بس باختصار عايز الناس تعرف إن غلطتنا الوحيدة كملاك محترمين إننا كنا صادقين زيادة عن اللزوم فى عرض عيوب العربية و كلمة زيادة عن اللزوم دى مش معناها اللى أقصده إننا كان المفروض نضحك على الناس و نخدعهم و احنا بنعرض المعلومة بس قصدى مبنى على نقطتين مهمين جدا:
الأولى النسبية اللى أغلبنا ماحطهاش فى اعتباره و هو بيقيم العربية بمعنى أوضح شوية لما رددنا ورا بعض من غير أدنى تفكير و قلنا أهم العيوب ضعف الخامات الداخلية يا ترى اللى قال كده و عن تجربة شخصية ما كانش زى أغلبنا بيردد الكلام ورا حد قارن بإيه بالظبط عشان يدى المعلومة دى يعنى قارن بالواجا مثلا اللى خامتها الداخلية أفضل بس شكلها أقل من الباقى و أعتقد دى نقطة اختلاف تسويقية عشان يفضل فى طلب على العربيتين و إلا الواجا مش هتتباع جنب الجين و البرسونا و لا الناس قارنت بموديلات عالية زى البى إم و المارسيدس مثلا مع إن الفئة السعرية ليهم تخلليهم بره المقارنة و لا قارنوا بالياريس اللى هى خاماتها الداخلية أفضل و لكن ثباتها و صاجها ضايع تماما مقارنة بالجين و هل قارنوها مثلا بالإبيزا الجديدة و حمدوا ربنا على جودة خامات البروتون مقارنة بيها و ده مش على لسانى لوحدى و اللى حابب يتأكد يروح أى معرض يشوف الإبيزا 2010 و 2011 خامتها الداخلية عاملة إزاى (دى النسبية اللى احنا كملاك ما راعيناهاش و احنا بنحكم على العربية و الكلام اتفسر بشكل مطلق)
النقطة التانية أهمية العيوب مقارنة بالأساسيات و المميزات هل العيب له قدر من الأهمية عشان يذكر مقارنة بمميزات العربية يعنى مثلا أنا ليا زميل فى الشغل قاللى إن عربيته فيها عيب جامد أوى فى ذراع الإضاءة و هى إنه ضعيف جدا و اتكسر منه أكتر من مرة و العربية و بدون ذكرها بعد إذن حضراتكم لأنى بس بدى مثال هى واحدة من أشهر و أفضل الماركات انتشارا و مبيعا فى مصر و أنا ألأول لما سمعت المعلومة اعتقدتها فردية لكن حظى فى إن ليا أكتر من صديق معاهم العربية خلانى عرفت إن الذراع ضعيف فعلا و عاوز معاملة خاصة و إلا كل استعمال هيبقى بكسر و احنا بنتكلم عن إيه ذراع الإضاءة يعنى مش حاجة تافهة أوى بس مافيش موضوع واحد مكتوب فى الموضوع ده على فورم العربية هنا فى نايل موتورز و لما كنت بسأل ملاكها كانوا بيردوا آه ضعيف اتكسر منى مرة و لا مرتين بس دلوقتى عارف إزاى أتعامل معاه عشان ما يتكسرش إيه بقى أهمية عيب تافه زى ده مقارنة بمميزات العربية الجامدة إنى أذكره و حد بيسألنى و طبعا ليهم وجهة نظر تحترم مع تحفظى على حجم العيب مقارنة بالعيوب اللى احنا بنتطوع و نذكرها عمال على بطال و ساعات كمان بنرددها ورا بعض من غير ما نبقى فاهمين كلامنا و لا جربناها أصلا و الدليل إن الناس لما بتتكلم عن عيوب العربية بتتكلم عموما مش بتذكر بس العيوب اللى طلعتلها فى عربياتها و ابقوا اسألوا أستاذ أسامة شحاتة بتاع الموضوع الأشهر لأى أسئلة عن البرسونا لأن الراجل واحد من المحظوظين اللى طلعلوا تقريبا كل عيوب التقفيل اللى بيطلعلنا منهم عيب واحد أو اتنين بالكتير و هو طلعولوا كلهم و رغم كده بيعشق العربية و بيحبها أكتر من ناس كتير مننا و ده مش لأنه شغال فى التوكيل و لا بيقبض نسبة من مبيعات العربية لكن لأنه حسبها بدماغه صح إيه العيوب دى مقارنة بمميزات العربية طبقا للسعر اللى دفعته فيها و دى المعادلة اللى لازم كلنا نطبقها و احنا بنقيم العربية
نقطتين تانيين بس احنا مش مسئولين عنهم: 1- العربية ماليزى و تحس و الواحد بيقولهالك إنه بيشتمها مثلا و كتير بيقول بعد الكلمة دى ياااااه يعنى مش كورى كمان و نسيوا إن من عشر سنين بس كان ده نفس كلامهم عن الكورى ناهيك بقى عن الناس اللى بتشبه الماليزى بالصينى لمجرد إنه مش كورى من غير ما يفهم مكونات العربية و صناعتها و ميزاتها.
2- التسويق و دى مشكلة خالصة للتوكيل أكيد كل الناس هترد العربية مسوقة نفسها و ده طبعا صحيح بس المشكلة فى عقلية كتير من المصريين اللى أغلبهم ما يتضحكش عليهم غير بإعلان يعنى مثلا السكر الأكثر مبيعا دلوقتى و بيتطلب بالاسم هو سكر الأسرة مش لأنه الأجود هو مش بيسكر أصلا بس لأن إعلاناته منتشرة جدا و الناس كلها بتشوفها و ما بتشوفش إعلانات لباقى المنتجات المنافسة. لازم التوكيل يراجع سياسته التسويقية و يعرف فرق المبيعات الرهيب اللى ممكن يحصل لو عمل حملة إعلانية واحدة و نام عليها أو لو حتى نزل معرض زى أوتوماك أو فورميولا مع مهندس فاهم يقدر يشرح للجمهور إيه العربية دى.
لو قدرنا نظبط النقط السابقة اللى تخصنا فيهم و التوكيل ظبط النقطة الآخيرة و عقلية المواطن المصرى عموما نفضت عنكبوت اليابانى و الأوروبى و الكورى و بصت لتقييم العربية بعيدا عن جنسيتها إن شاء الله العربية هتبقى الأولى فى كل حاجة و أهمها إعادة البيع اللى مضايقة صاحب الموضوع. آسف على الإطالة و كل رمضان و أنتوا ب1000 خير و سلامة

الحقيقه انا مش شايف ان ملاك العربيه اخطأوا لما اتكلموا علي عيوب العربيه يمكن اعضاء كتير استفادوا من المناقشات دي في مقرانتهم مع العربيات التانيه ونا شايف ان معظم الملاك اتكلموا بحيادية تامه عن العربيه وفي وجه تشابه كبير بين التقييمات وده يخليك تاخد صوره جزئيه عن العربيه من قبل حتى ماتشوفها او تعرفها ... وبصراحه اكبر ميزه انا شايفها لما الملاك يتكلموا عن عيوب العربيه الشائعه وعيوب التقفيل ان الناس اللي مقبلة علي الشراء هتاخد بالها كويس وهيا بتشتري وده انا شايف انو احتمال كبير يجبر التوكيل عن التدقيق في كل تفاصيل العربيه من تقفيل وغيره قبل مايطلعها للمستلم لانو هعيرف ان الزبون بقا عارف العيوب الشائعه في العربية..... وفي الاخر احب اقول انا استفدت كتير من تقييمات الملاك اللي هنا ونا بشكرهم كلهم علي تعبهم واتمني من المسئولين في التوكيل الاهتمام بكل تفاصيل العربيه قبل تسليمها واكيد لو ده حصل مش هنشوف الكلام عن العيوب البسيطه دي اللي برضوا بتستفز صاحبها اللي حد كبير ..... كل سنه ونتوا طيبين