الموضوع: كل عام وأنتم بخير استشاره بسيطه من الاخوه الكرام

المشاركة الأصلية كتبت بواسطة محمد الشامي

والله يا استاذ مصطفى اللانوس والنوبيرا الاتنين احسن من بعضهم , لكن كل واحده ليها ظروفها من حيث طبيعه الاستخدام وطلباتك من العربيه ايه


لكن بشكل عام اكيد النوبيرا افضل لان عزم موتورها حلو ماشاء الله , وكمان عربيه واسعه وكبيره وثابته على الطريق لغايه 180 كم او اكتر , واظن استهلاكها في البنزين حلو , وبشكل عام مشاكلها مش كتير

لكن اهم حاجه ان ربنا يوفقك في عربيه تكون استخدام راقي ويكون صاحبها كان بيتعامل معاها بنوع من الوعي والرقي ,, لان العربيات دي حساسه ولما صاحبها بيعاملها وحش هي كمان بتعامله وحش بجد

اتمنالك التوفيق والف مبروك مقدماً :-)

اولا كل سنه و انت طيب
ثانيا انا قدامي نوبيرا2006 عامله 40 الف و صياناتها بالتوكيل كلها و ال 40 الف دول كلهم مشواير سفر بالعربيه و جوه البلد مش كتير لان صاحب العربيه عنده واحده تانيه عاملها للبلد بس و طالب فيها 54 الف جنيه
هل ده كتير ؟؟
و قدامي نوبيرا اتوماتيك 2004 صاحبها طالب فيها 46 الف جنيه

وقدامي لانوس 2006 ب 50 الف

معلش حتعبك معايا

المشاركة الأصلية كتبت بواسطة محمد الشامي

كل سنه وحضرتك طيب يا استاذ مصطفى :-)

انا من رأيي حضرتك تفكر في الـ 2006 لان كمان 40 الف كم مش كتير , وكمان انا شايف ان سعرها مناسب لكن ممكن تحاول تنزل منها 1000 جنيه كمان , بس اهم حاجه حاله العربيه تكون محترمه , وانا حاسس من كلام حضرتك ان العربيه كويسه , بس بردو من دواعي الامان حضرتك اكشف على العربيه في بنزينه كويسه , ولتكن بنزينه شيل في اول الهرم , وهي اول بنزينه هتقابلك على يمينك وانت جاي من ناحيه النفق , وهتلاقي اتنين شيل ادام بعض , هي اللي على اليمين , ومواعيد العمل من 9 الصبح لـ 9 بالليل , وسعر الكشف 100 جنيه , وبمنتهى الامانه مش هيخلو مللى في العربيه غير لما يكشفوا عليه , صاج , عفشه , موتور , كل حاجه , وهتاخد منهم تقرير مطبوع عن حاله العربيه والاعطال الموجوده او المشاكل اللي فيها ان وجدت , واحيانا بيقولك تكلفه اصلاح المشاكل دي هتكون اد ايه تقريبا , يعني هتدفع 100 جنيه وتريح بالك بجد لان الناس دي كلامهم ثقه

انا بقول لحضرتك فكر في النوبيرا دي لانك لو حطيتها في مقارنه مع اللانوس المذكوره (مع انها مقارنه غير عادله) هتلاقي الفرق مش كبير في السعر , لكن الفرق كبير في الراحه والاداء لصالح النوبيرا , والفرق المادي لا يذكر , 4 الاف جنيه مقابل شياكه واناقه وعزم وقوه و و وو

توكل على الله واكشف على النوبيرا 2006 وان شاء الله ربنا يكرمك , وده مجرد رأيي واتمنى انك تستفيد اكتر كمان من رأي ملاك النوبيرا

على فكره انا واحد من الناس اللي نفسهم يلاقوا نوبيرا بحاله متميزه :-) ومتخافش من سوق النوبيرا لانه كويس ومش وحش , هو بس اللانوس (دايو وشيفروليه) عشان بقت اكتر من النوبيرا فـ دايما الواحد شايف ان النوبيرا مش منتشره , يعني النوبيرا تاهت وسط عدد اللانوس الموجود :-) , لكن زي ما بيقولو النوبيرا بيكون ليها دايما زبونها اللي بيقدرها

وطالما العربيه حالتها نضيفه فاتوقع ان حضرتك مش هتفكر تبيعها قبل 5 سنين كمان و وقتها يحلها ربنا في موضوع البيع :-)

بالتوفيق ان شاء الله يا استاذي

وحضرتك طيب يا استاذ محمد
انا فعلا بفكر في النوبيرا تفكير جدي و بالنسبه للعربيه الي انا بتكلم عليها مافيهاش خربوش واحد صاحبها بيطلع المشوار و بيرجع يغطيها في الجراج
بس في حاجه في كلامك انا مش حعرف اعملها انا ساكن في اسكندريه و صعب قوي اخد العربيه من صاحبها علشان اروح اكشف عليها في اسكندريه متعرفش مكان في اسكندريه اروح اكشف عليها كزياده في الاطمئنان مش اكتر

انا باذن الله بعرض عربيتي الي معايا للبيع و قربت ابيعها خلاص و حشوف النوبيرا دي و باذن الله ابقي من ملاك النوبيرا عن قريب

شكرا لك ياباشا و كل سنه و انت طيب ورمضان كريم

المشاركة الأصلية كتبت بواسطة محمد الشامي

طيب مش تقول ان حضرتك من اسكندريه :-) اجدع ناس والله

بس للاسف انا معرفش مكان معين في اليكس بيكشف بنفس الطريقه اللي بقولك عليها , وطبعا مش منطقى انك تيجي لغايه القاهره عشان تكشف على العربيه :-)

عالعموم بإذن الله حد من الاخوه الاعضاء سكان الإسكندريه يكون يعرف مكان كويس ويقولك عليه , ولو فرضنا ان مفيش مكان قريب منك تكشف على العربيه فيه , فأهم حاجه انك تكون مرتاح للعربيه و واثق في كلام صاحبها , وخلي حتى اي ميكانيكي امين يبصلك عليها وان شاء الله خير

الف مبروك مقدماً ومرحبا بيك فرد جديد في اسره الدايو بإذن الله :-)

و اهل القاهره احسن ناس يا محمد
طب سؤال صغير بقي
هل ينفع اروح التوكيل و اكشف علي العربيه
اشوف الموتور و العفشه و كده طب ولو روحت التكلفه كام
معلش تاعبك معايا

المشاركة الأصلية كتبت بواسطة mmamdouh

واحد صاحبى جاب من 3 شهور نوبيرا 2007 عاملة 45 الف على 57 الف جنية و حالة نضيفة جدا جدا... انا شايف ان السعر دة مناسب جدا و توكل على الله

فى شراء المستعمل الللى بيشترى هو الكسبان طالما حالة العربية نضيفة

mmamdouh

يعني السعر الي معايا حلو علي نضافه العربيه
باذن الله حخلص عربيتي و اتوكل علي الله و اجيب العربيه دي