الموضوع: ايه احسن موديل في الفكترا بشكل عاااام

المشاركة الأصلية كتبت بواسطة srorr4ever

صباح الفل ياباشا ومعلش على التأخير...
هرد على كلامك بعد اذنك..
طيب وطالما انا قدامى اركب عربية ممكن تتصلح بسهولة عند اى حد...ليه اسيبها واروح لعربية عاوزة كتالوج عشان تتصلح؟؟؟ليه اسيبها واروح لعربية عشان اصلحها لازم ادوخ السبع دوخات عشان الاقى الشخص المناسب...ودليل كلامى هنا المنتدى كل شوية مواضيع عن كهربائى كويس وعن طلب ميكانيكى كويس او مركز صيانة كويس او او او....ده معناه ان العربية دى معقدة....طب وانا بالنسبة لى كراجل زى معظم المصريين بشتغل وكل وقتى محسوب...ليه اقرف نفسى بعربية تخلينى اضربلها مشوار مخصوص فى اخر الدنيا عشان اصلحها؟؟؟فى حين ان قدامى عربية تانى لو واحد تحت بيتنا هيصلحها زى الكورى واليابانى مثلا؟؟؟؟؟؟؟؟؟
بص ياباشا هنا فى المنتدى على قسم الاوبل هتلاقيه كله مشاكل وده بيشتكى من كذا وده من كذا وده من كذا....
اما بقى روح لقسم اى عربية من الكورى وليكن على سبيل المثال الهيونداى لأنى روحت القسم وشوفت بنفسى وشوف الناس بتتكلم عن ايه....
هتلاقيهم بيتكلموا عن طقم فوجات وزينون واسبويلر وكماليات وحاجات غريبة....مفيش فيهم حد اتكلم مثلا عن موتور قفش....او عن موتور سخن زى مامعظمنا كركاب اوبل بنتكلم.....كلنا هنا بنتكلم عن مشاكل فيزياء وهما هناك بيتكلموا ازاى يدلعوا العربية....مااعتقدش مثلا ان حضرتك قابلت واحد صاحب عربية كورى وقالك انها بتسخن...فى حين ان 90% من ركاب الاوبل بيشتكوا من مشاكل مالهاش اول من اخر ....
اما بالنسبة لجزئية برة بيركبوا الاوبل فتعقيب بسيط جدا انهم فعلا كل الدول دى بيركبوا الاوبل ماعدا المانيا نفسها بيكرهوا العربية دى جدا هنا وانا ليا زوج خالتى شغال هناك من 20 سنة تقريبا كل مرة ينزل فيها يقولى ويأكد عليا ان العربية دى محدش فى المانيا بيحبها بسبب مشاكلها الكتير وكتر احتياجها للصيانة.....ويفضل يزن على دماغى انى ابيع وانا اكبر دماغى....بس فعلا لما عاشرت عربيات تانية بدون مشاكل عرفت الفرق.....
كمان برة ياباشا العقلية والامكانيات وطبيعة الطرق اريح بحيث ان اللى يحب يركب عربية زى دى هناك هيلاقى 1000 مركز صيانة يصلحها والطرق نفسها هناك جميلة وممتعة وتحسسك بقيمة العربية غير عندنا...
بكرر تانى ان الاوبل عربية ممتازة لكن محتاجة عناية خاصة وطرق خاصة والكلام ده مش عملى مع اغلبنا كمصرين...
تحياتى لك

بص يا سرور باشا مين قالك ان اليابانى الجديد مش متاج ميكانيكى كويس ولا الكورى كل دول عايزين ميكانيكة كويسن مش ميكانيكى تحت بير السلم وعلى فكرة موضوع قفش المواتير الاوبل والكلام دة كل دى حاجات فردية لان الناس بتشترى وبتمشى وهى مش فاهمة فى اى حاجة او بتشترى عربية متهانة متهانة وزى ما انت قولتك عندى والله خالى عندىة اوبل فى الشغل فى شركة جاسكو اتفرج على العربية والله عاملة 550 الف ومعملتش عمرة واحدة ولا الماتور اتفك وعارف لاصيانة بتاعتها بتتعمل فين عند صابر بتاع ربعة يعنى ميكانيكى متخصص مش توكيل
ومشكلة مصر هنا انك هتلاقى عربيات اوبل كتير متهانة لان صحابها كانوا بيعملوها معملة 127 وبنزين 80 وميكانيكى تحت بير السلم فطبعا العربية خلاص بتيجى للمشترى اللى بعد كدة خلصانة
اما موضوع ان العربية الاوبل مش محبوبة فى المانيا الموضوع دة غلط خالص انا خالى عايش فى المانيا من اكتر من 50 سنة وقولتة اية رائيك فى الاوبل فى المانيا قالى عربية ممتاز والالمان بيحبوها وابنة اساسن معاه جنسية المانى ومولود فى المانى وبيركب والله اوبل وانت ادخل على اى موقع بيع فى المانيا وشوف كم العربيات الاوبل اللى موجودة هناك

للاسف الاوبل هنا الناس بتعملها زى 127 بل العن بكتير لو الناس اهتموا با الصيناة زى ما انت بتقول عند ناس متخصصة زى برة اتفرج على العربية بجد
وهقولك على حاجة مثلا عندك الفورد اية رائيك فيها دى عربية محترمة جدا جدا و واخدة المركز الاول فى الامان بتاعها
العربية دى مش موجود لية فى مصر عارف لية علشان الناس هنا بتهتم با الكمليات و عربية خفيفة
انا عن نفسى لا مقارنة بين الالمانى واليابانى و الكورى دة حاجة دة حاجة دة لية ناس بتركبة ودة لية ناس تانية خالص

وخد المقال دة يا سرور باشا واقراء كويس ودة مكتوب فية ان العربيات الاوبل حققت نجاح كبير جدا فى المانيا و عربيات عملية جدا موجود فى اول صفحة فى الموقع دة
Opel Vectra B - Opel Vectra B Pictures, Videos, Features And More

و لو على كلامك اللى انت بتقول علية ان الاوبل مش محبوب فى المانيا لية الحكومة الالمانية بتستخدم العربيات الاوبل بكل موديلاتها فى عربيات البوليس الالمانى وكمان انجلترا بتستخدم الاوبل فى عربيات الحكومة ودول كتير بتستخدم الاوبل واعتقد ان الدول دى بتستخدم العربيات العملية و القوية وقليلة الاعطال
ودى صور بتبين كلامى


..

..

..

..

..
..

..

..

..

انا بحب الفيكترا cdx موديل 2002 و2003

المشاركة الأصلية كتبت بواسطة srorr4ever

حاجة كمان نسيت اقولها....ان حضرتك متنساش ان الاوبل اللى بتنزل مصر هنا حاجة تانى خالص غير الى بتنزل برة...
دى مواصفات ودى مواصفات تانى خالص وطبعا انت عارف اننا هنا بتنزلنا ارداء واسوأ مواصفات فى العالم مع البرازيل....
سواء مواتير او دايرة تكييف متركبة بطريقة سيئة او تقفيل سىء...
وكمان وكيل حرامى فى الاسعار وقطع الغيار وتصليح زفت فى التوكيل...
كل دى عوامل بتخلى العربية هنا فى مصر مكروهة جدا ودى حقيقة اسأل عنها اى مواطن عادى راكب اى عربية عادية...
ويارب متكونش زعلان منى وانا مبسوط جدا بالكلام معاك

ياباشا ازعل من اية بس والله انا سعيد انى بتكلم معاك وعادى ياباشا كل واد لية رئ
بس انا عيز اقولك ان الاوبل مش سوء اللى انت كنت بتقول علية المهم
و الالمانى ركوبة و لايبانى و الكورى ركوبه تانية خالص انا اخويا معاه تويوتا كرولا 94 وسقت الكرولا دى اكتر من عربيتى الاوبل وعارف بقولك اية والله مش بستمتع غير من ركوبة الاوبل دى لها ناس ودى ليها ناس
انا بس كنت برد عليك فى جزئية اللى انت بتقول مفيش حد فى المانيا بيحب الاوبل او بيركبها
والله انا سعيد انى بتكلم معاك وكل واحد يقول وجهة نظرة

المشاركة الأصلية كتبت بواسطة tananybasha

والله كلامك منطقى و عقلانى
بس ده مش على الأوبل بس
على الأودى و البى ام و المرسيدس و الأوكتافيا و الفولكس
الناس بتدور على الأسهل و الأرخص و اللى يتباع بسرعه
اللى غاوى ركوب استحاله يركب كورى او يا بانى بعد ما ينزل من المانى
انا معايا الألنترا و معايا الفيكترا و قبلها النيسان الصنى
الوحيده اللى بحس براحه فيها الأوبل
ده رأى شخصى و مع اقتناعى التام برأى حضرتك فى عقلية الشعب المصرى
الناس اعداء ما يجهلون

وزى ما طنانى بيقول الكلام اللى انت بتقول علية دة على كل الاروبى الالمانى و فرنساوى ايطالى كلة
مش الاوبل بس بتدور على سهولة تصليح يبقى اليابانى و الكورى بدور على ركوبة يبقى المانى
انا ركبت عربيات يابانى كتير قديم وجديد بس عمرى والله ماستريت غير فى الاوبل وانت راكب الاوبل تحس انك مستمتع بالسواقة