اكسنت اوتوماتيك

**malta** · 10-08-2010 09:12 PM

السلام عليكم و كل عام و انتم بخير و رمضان كريم
انا كنت عايزة استشيركم فى الاكسنت الاوتوماتيك انا كانت عاجبانى و طبعا قريت عنها هنا فى قسم الهيونداى و لقيت الناس كلها عمالة تقول ناشفة و بتتنطط و كمان سالت واحدة كانت معاها قالتلى مش ثابتة بعد 100 ارجوكم اللى معاه العربية يقول بجد تستاهل اجيبهاو لا لا خصوصا بعد ما غليت انا كنت فى موال اللانوس و لا اللوجان و قلت خلاص استلف من اخواتى و اجيب الاكسنت و هل مصاريف صيانتها و قطع غيارها و استهلاك البنزين فى المتناول ولا ممكن تبقى عبء زى اللوجان و شكرا

**malta** · 10-08-2010 09:18 PM

ارجوكم يا جماعة انا عايزة الرد بسرعة لانى محتاجاها ضرورى وهل ممكن ترخص عن كدة لما الفيرنا الجديدة تنزل

**Ayman-Ahmed** · 10-08-2010 11:19 PM

وعليكم السلام ورحمة الله وبركاته:

العربية بسم الله ما شاء الله مريحة فى سواقتها.

اخر سرعة جبتها كانت 160 ومحستش بعدم ثبات بس حسيت برهبة شوية لانها جراية جدا ومجربتش اخد بيها غروة على اكتر من 120 وكانت ثابتة.

مصاريف صيانتها معقولة يعنى صيانة الالف بحوالى 270 وال 10000 بحوالى 360

مش نشفان عفشة,الموضوع كله ان العفشة الخلفية على دونجل او بمعنى اصح ماسورة واحدة واصلة العجلتين اللى ورا وكمان مساعدينها غاز.لكن مش متعبة يعنى الا اذا مشيتى فى طريق مكسر بتحسى بكل تفاصيله.واعتقد ان معظم العربيات السيدان كدة.

استهلاك البنزين حسب طريقة السواقة بس معدلها معايا جوا البلد 9ل10 لتر لكل 100 كم وبرة البلد على سفر من غير تكييف 11ل12 لتر.

وفقك الله لما يحبه ويرضاه.

**ahmed72247** · 10-08-2010 11:48 PM

العربية ثابتة بدام مفيش أي تاثيرات خارجية يعني مفيش هوا جامد عالطريق ,يعني أنا شخصيا وصلت بيها 190 في ال منوال و 180 فل اوتوماتيك و بصراحة هي خفيفة لو لوحدك في ال عربية يعني بتبان بعد ال 150 و بنسبة للعفشه فـهي ناشفة فعلا شوية بس بتقل النشوفية مع الوقت وكمان لو حاطة نيتروجين في العجل بيفرق قوي.
بس بصراحة العربية متستاهلش سعرها الجديد خالص.أنا بصراحة ماعرفش اسعار قطع غيرها.واسعار صيانتها أغلى صيانة عملتها كانت ال 20,000 بحوالي 850 جنيه.

**mohabelnegm** · 11-08-2010 12:08 AM

أنا العربيه معايا من 2006 فى منتهى الجودة و تستاهل تمنها, العفشه بتاعتها ممتازة (بفضل الله عمرى ما ربطت عفشة أو غيرت حاجة فيها) العربية عامل بيها أكتر من 130 ألف كيلو و بسم الله ما شاء الله زى الفل و اللى بيقول العفشه ناشفه شوية دة صحيح بس بدون مبالغه لأن المساعدين غاز و النشوفيه دى أمان أكتر و العربية دى عمرها ما تحك فى مطب لو مركب حد ورا . اللى عايز يشتريها يتوكل على الله و مش هايندم , عربيه قويه, رياضيه, موتور بتكنولوجى حديث, تكييف ثلاجة بدون أى تأثير على سحب العربيه(112حصان), صالون فى منتهى الجمال, قطع غيار متوفرة و أسعارها مش غالية....جرب بس تدخل جوة العربية و تقعد على كرسى السواق و هاتحس و تعرف أنا بتكلم فى أيه و مش هقول عن نعومة العلربية دى لما تسوقها.

**malta** · 11-08-2010 07:58 AM

اشكركم يا جماعة على ردودكم و كل من ساهم فى افادتى عن السيارة .شكرا جزيلا

**marmoraessam** · 11-08-2010 11:36 AM

شكرا على موضوع حضرتك (malta)
انا كمان كنت حابه اعرف اكتر عن العربيه دى
بس ليا سؤال ساذج ومحدش يضحك عليا
يعنى ايه (عفشه ناشفه)
هاحس بيها ازاى او هاتفرق معايا فى ايه
هل ده معناه انى بحس باللى فى الشارع من مطبات وكده ومش هاحس انها ناعمه على الارض وكانها طايره عن الارض
؟؟؟؟؟؟؟؟؟؟؟؟
ممكن طلب تانى
ممكن اعرف الاسعار الجديده للنيو اكسنت اتوماتيك2011 و الاكسنت الاسبورت 2011اتوماتيك

**fawzyyyy** · 11-08-2010 11:37 AM

توكلي علي الله لان العربية جميلة و الناس بتشكر فيها
و ربنا يوفقك في الاختيار ان شاء الله

**شارلي شابلن** · 11-08-2010 04:44 PM

المشاركة الأصلية كتبت بواسطة mohabelnegm

أنا العربيه معايا من 2006 فى منتهى الجودة و تستاهل تمنها, العفشه بتاعتها ممتازة (بفضل الله عمرى ما ربطت عفشة أو غيرت حاجة فيها) العربية عامل بيها أكتر من 130 ألف كيلو و بسم الله ما شاء الله زى الفل و اللى بيقول العفشه ناشفه شوية دة صحيح بس بدون مبالغه لأن المساعدين غاز و النشوفيه دى أمان أكتر و العربية دى عمرها ما تحك فى مطب لو مركب حد ورا . اللى عايز يشتريها يتوكل على الله و مش هايندم , عربيه قويه, رياضيه, موتور بتكنولوجى حديث, تكييف ثلاجة بدون أى تأثير على سحب العربيه(112حصان), صالون فى منتهى الجمال, قطع غيار متوفرة و أسعارها مش غالية....جرب بس تدخل جوة العربية و تقعد على كرسى السواق و هاتحس و تعرف أنا بتكلم فى أيه و مش هقول عن نعومة العلربية دى لما تسوقها.

طيب ياجماعة بالنسبه للوكيل غبور بسمع انه توكيل سييء جدا ومقرف هل الكلام دة صحيح

**mohabelnegm** · 11-08-2010 06:00 PM

المشاركة الأصلية كتبت بواسطة hfhfhf

طيب ياجماعة بالنسبه للوكيل غبور بسمع انه توكيل سييء جدا ومقرف هل الكلام دة صحيح

الوكيل مش بالسوء دة و ممكن أقول أنه كويس بالمقارنه بأى وكيل تانى لأن أسعار المصنعيات و قطع الغيار معقولة جدا و مش مبالغ فيها زى وكلاء تانيين لأن الوكيل عارف أن قطع غيار الهيونداى موجودة برة التوكيل و أى ميكانيكى شاطر بيشتغل فى الهيونداى بدون أى مشاكل و علشان كدة الوكيل بيدى أسعار كويسة جدا للمصنعيات و قطع الغيار(على الرغم من أنى بشترى قطع الغيار من التوكيل-سيور فلاتر تيل فرامل- و بركيها برة عند الميكانيكى بتاعى) بس برضة لو أحيانا عملت حاجة فى التوكيل ماكنش عندى شكوى أو مشكلة معاهم.