10 الاف كيلو و 10 الاف تيجو

**Hegazio** · 11-08-2010 01:30 PM

يتزامن اني عديت ال 10 الاف كيلو بسيارتي الثانية ( التيجو 1600 - 2010 ) مع وجود 10000 سيارة تيجو من جميع موديلاتها تجوب الشوارع المصرية
و الحمد لله 6 شهور مضت بالسيارة من سفر لمدقات لفوق الرصيف .. و الحمد الله ماشاء .. سعيد باختياري للسيارة .. لم يحزنني الا مهاجمة البعض للسيارة في المنتدي .. صورة لا أراها لا في الشارع ولا في المنتديات الأخري !!

خلاصة ما صادفني من عيوب أو عدم راحة ( حبدأ بالعيوب الأول )
الكراسي كانت بتعمل صوت مع المطبات .. 20 جنيه لواحد سروجي ظبطهم و عمل تخشينة بكاوتش
الابواب بتفتح و تقفل بصعوبة .............. تم حلها في أول صيانة الألف
خشونة عصا الفتيس في الأول ............ تم حلها بعد تغيير الزيت و تشحيم العصا
صوت مروحة التكييف عالي شوية ......... لسه ما شفتلهاش حل بس حأغير الفلتر ىو اشوف

خلاصة المميزات اللي اعجبت بيها
استلمت العربية بالظبط قبل سيول فبراير الماضي .. و حين توقفت سيارات كثيرة عن السير و المرور من نفق الدائري .. مرت التيجو كالوحش
اسكن بمدينة نصر و باحب اشتري من سوبر ماركت الراية و الركنة امامه مستحيلة .. بقيت اركن فوق الرصيف بكل سلاسة
في الزحمة شعوري و أنا مرتفع شوية بيديني احساس براحة نفسية شويتين
التكييف تلاجة و الحمد لله .. و ده عشمي عن السيارات الأسيوية
كنت جربت نفس السيارات في نفس الفئة و هما الفيتارا و التيريوس .. فيهم مميزات و التيجو فيها مميزات بصراحة ال Cost effectiveness يخلي التيجو تكسب

في محاولتي لكسر اقصي سرعة مكتوبة في الكتالوج جبت 172 ك / س و كنت فرحان لدرجة ماخدتش بالي من النقل اللي قدامي و اضطريت اخد غرزة علي السرعة دي .. و الله احسن مما تخيلت بكتير .. صحيح مش زي الميجان بتاعتي .. لكن احسن من التيريوس .. و احسن من الفيرنا و الأفيو .. اللي بيعتبروهم مفرمة المندوبين هنا في الشركة

و الله و أقسم بالله رحت الصيانة كده 3 مرات ( الصيانات الدورية ) أخر واحدة فيهم بيقولي العربية فيها ايه مش لاقي حاجة أقولها .. انا صحيح استنضفت اني اجيبها من أبو غالي عشان ال QC عندهم بيعمل double check و كمان الصيانة عندهم .. بس بعض الأعضاء عندهم مشكلة أو اتنين .. بس يعني بتفكرني بنفس المشاكل اللي كنا بنعملها انا وا ختي مع عربيتها مع منصور

انا مصدق ان بعض الناس حصل معاهم مشاكل في العربية مش مكدبهم .. و مين ماحصلوش .. زميلي في المكتب اللي جنبي استلم السيراتو بعلبة دركسيون بايظة

اثنين من زملائي في الشركة اشتروا عربيتين بعد التجربة الفعلية اكثر من مرة لسيارتي .. بس اشترو التيجو الاوتوماتيك

ياريت الناس تحاول تجرب بنفسها و بلاش مقصلة الصيني اياها دي .. بتفكرني أيام والدي ما كان ناوي يجيب الداتسون ( نيسان ) و قالولي ياباني ايه ياعم هو انت حتشتري تليفزيون !!! .. ولا أخويا و هو بيجيب هيونداي من 15 سنة و قالولو يا عم دي كوريا اخرها غسالات

المشكلة ان احنا ودنيين جدا و كلام القهاوي كتير جدا و حقيقي فيه زياطين في الزيطة اكتر .. لا يفهم في الميكانيكا اي شيء ولا يعلم عن السيارات غير كلام المنتديات و القهاوي و الفرجة ف الشارع و ما ساقش 10 عربيات علي بعض

اللهم وفق كل مؤمن لما تحبه و ترضاه و ابعد عنا الهم و الكرب و الحزن

**kholio2005** · 11-08-2010 02:32 PM

ربنا يباركلك فيها و تفضل مبسوط منها كدة على طول ان شاء الله و العربية فعلا تعتبر صفقة رابحة بالنسبة لسعرها

رمضان كريم و كل سنة وانت طيب

**esam722** · 11-08-2010 03:31 PM

رمضان كريم يااستاذى الفاضل وربنا يباركلك فيها ويكفيك شرها وعلى فكره موضوع الرصيف حصل معايا بس انا عديت الرصيف اللى بيتوسط الطريق لما لاقيت الطريق واقف وعديت الناحية الثانية ورجعت بصراحة عربية ماشاء الله عليها وربنا يكفينا شر العين

**odaoda** · 11-08-2010 03:33 PM

الف مبروك وربنا يديك كمان وكمان من خيرها

**hugan** · 11-08-2010 03:54 PM

ربنا يبارك لك فيها وتتم ال100000 كيلو رغم انف الكارهين
اظن ان انا العضو الوحيد في المنتدي اللي سيارته وصلت لل 50000 في عامان
والخمد لله حتي الان بدون اعطال وعيوب
وخرجت كمان من الضمان
لو الكل ركز بلاش الفيرنا والافيو
دعوه للدخول ال قسم كيا وشوفو المهازل اللي فيه من عربيات زيرو وكميه المشاكل اللي فيها
او بروتون حدث ولا حرج
ربنا يهدي الجميع
وكل عام وانتم بخير

**evram** · 11-08-2010 08:43 PM

انا بجد احتارت اوي اشوف تيجو اقول هي دي اشوف اسبرانزا 620 اقول هي دي و شم عارف اختار و محتار جدا جدا و بعد تجربتي الي نجحت مع 516 مش هفكر اجيب غير اسبرانزا مهما اتقال عنه