السلام عليكم و رحمة الله و بركاته
و كل عام و أنتم بخير
المعهد الثقافى البريطانى اللى فى القاهرة , موجود فى العجوزة , على الكورنيش , جمب مسرح البالون , لكن اللى فى الاسكندرية , أنا مش عارف مكانه بصراحة .
أنا هبعتلك اللينك بتاعته و ممكن تتصل بيه و تسأله على اللى أنت عاوزه و هما ناس محترميييييييييييين جداااااااا و هيردوا عليك سواء بالتليفون أو لو بعتلهم ايميل و لو أنت من القاهرة , ممكن تخطف رجلك لحد هناك .
أنا مكنتش أخدت فيه كورسات بصراحة , بس اللى كانت أخدت فيه كورسات كانت أختى لأنها كانت بتجهز لبعثة و قالتلى أن الكورسات مش هتخليك شكسبير فى الانجليزى لأن ده مابيحصلش فى الشهرين أو التلاتة بتوع الكورس, بس الكورس هيعرفك ازاى تجاوب صح فى الامتحان و تجيب سكور عالى و هيعرفك ايه التكات اللى ممكن تقع فيها و أنت بتحل و المطلوب منك قبل و خلال و بعد الكورس أنك تدرب نفسك على اللغة و أحسن حاجة تعمل بيها الموضوع ده أنك تتفرج على نشرات الأخبار الانجليزى و الأفلام اللى بدون ترجمة و تتعلم و تدرب نفسك أنك تلقط الكلام و تفهمه , أما بالنسبة للكلام , فده , أنا مش عارف أنت ممكن تعمله ازاى , انا اللى ساعدنى فى الموضوع ده , انى كنت فى السعودية و كانوا كل الممرضات اللى فى المستشفى فلبينيات و هنود و كان فيه الأطباء غير العرب, بيبقوا هنود و باكستانيين و كنا بنضطر أننا نتكلم معاهم انجليزى لأنهم مابيفهموش العربى أوى .
أنا كنت امتحنت انجليزى IELTSجنرال فى المركز الثقافى البريطانى اللى فى جدة فى السعودية أيام ماكنت بخلص اجراءات الهجرة .
الموقع بتاع المركز الثقافى اللى فى القاهرة أهوه :
http://www.britishcouncil.org/egypt
و كمان اللينك الجاى ده فيه كمية كتب وهمية خاصة بالأيلتس و كل الشهادات التانية بتاع الانجليزى زى التويفل , الكتب دى كلها امتحانات و هتفيدك كتيييييييييييييييييير أوى و المركز أعتقد مش هيديهالك و تنزيلها سهل جدا من الموقع ده و المطلوب أنك تنزلها و تحلها كلها و تحل كتييييييييييييييير قبل الامتحان عشان تجتاز امتحان الايلتس بسهولة لأنها زى الامتحان بتاع الأيلتس بالظبط فى كل شئ .
الكتب هتلاقيها PDF و تلاقى كل كتاب الجزء بتاع الListening عبارة عن مقاطع صوت , الكتب دى مهمة جدا , أنا لما جيت أمتحن أيلتس ماعملتش حاجة غير ان اشتريت طابعة رخيصة و كنت بطبع امتحان بامتحان و أحله و لما أخلصه , اصححه لنفسى و بعد كده أطبع غيره و هكدا , لكن ماكنتش أخدت دورات هناك ولا حاجة لأن مكنشى عندى وقت و الحمد لله جبت السكور اللى أنا كنت عاوزه عشان الهجرة .
للمرة التالتة , الموقع ده فيه كتب مهمة جدا و احدث الاصدارات هتلاقيها فيه .
http://englishtips.org/index.php?newsid=1150805451
شكرا و آسف للاطالة
مازيراتى كواتروبورتيه
المفضلات