-
شكرا جزيلاا اخوانى الكرام كلكم وبالاخص سبعاوى بك
النهاردة رحت كبست الموتور فى بنزينة شل نادى السكة على الاتوستراد
النتيجة .
كبس الموتور 70 % العامل قلى كدة كويس جدا على موتور عامل فوق 100.000 ك
وقالى اعمل الاتى
1-سرفيس للمحرك ( غير الزيت و البوجيهات وجوان وش السلندر ) لانه طبعا هيفك وش الموتور من فوق
2-تغير اويل سيل صباب لان هو دة الى بخيلى العربية تأكل زيت كتير وبتخلينى اقدر اعدى 120ك بصعوبة . لانها بتسرب زيت على البستم .
3-تغير كوتشة وش مجموعة الانجيكشن ( خرطوم جلد جاى من فلتر الهوا وداخل على منافول الماتور من فوق ) لانها فيها قطع صغير من عند الكلبس الى مساكها من عند الانجيكشن من فوق ) ودة بيخليه يكتم العربية ويكل بنزين كتير
نفس الصنايعى عرض عليها اعمل الشغلانة دة كلها عندة فى البنزينة بمصنعية حوالى 200 ج
ولو عايز اعملها فى ورشته فى دار السلام هيبقى فى حدود 120 ج
مش عارف كدة كويس على المصنعية ولا اية
تانى حاجة برضه الحاجة دية كدة حاجة جامدة فى العربية ( يعنى ابعها واخلص منها ) ولا حاجة بسيطة وممكن اعملها والعربية تعيش معايا كويس ( مع العلم انى بحب العربية دية قوى )
تالت حاجة ممكن اخلى الصنايعى يعمل الشغل دة ولا اوديها مركز خدمة بتاع هيوانداى احسن لو هتبقى فى حدود نفس التكاليف ؟؟
وشكرا اخوانى ويا ريت حد يطمنى .
اخوكم
محمد
-
و الله مش عارف اقولك اة اكيد التوكيل احسن بس المشكلة الوحيدة انو غبور
-
النهاردة اتصلت بمركز خدمة ل هيوانداى فى الزيتون امة جيسكو وقلت اشوف ايه اخبار المصنعيات
المهم المهندس رد عليا وقلى انه هيعمل طقم شنبر للعربية وهيغير كمان طقم صباب وبيستم للعربية قلتلة لية يا عم الحج قلى لان العربية عاملة 100.000 ك واكيد البساتم والصبابات اتكلت ..
المهم التكلفة كام يابا قلى حوالى 2000 : 2400 جنية . طبعا انا اتصدمت
كل دة علشان العربية بتاكل زيت ؟؟
مع العلم ان العربية كويسة يعنى السحب والشد كويس ومش حاساس خالص ان الموتور خفيف ..
اخوانى انا خلاص زهقت ومش عارف اعمل اية
يا ترى اعمل زى عامل البنزينة ما قال اغير اويل سيل صباب واعمل جوان لوش السلندر وخلاص كدة مصنعية حوالى 200 ج
ولا كلام مركز الخدمة صح ولازم اغير البساتم والصبابات كمان ...
ولا اتعايش كدة مع العربية وكل 3 او 4 ايام اكشف على الزيت و ازود لو نقص وكبر دماغى ومعملش حاجة فى الموتور.. وهى حلوة كدة
ولو كبرت دماغى موضوع الموتور ممكن مشاكل اكبر تحصل للموتور
ارجو المشورة
-
يا رجاله حد يقلى اية ممكن يتعمل فى الموضوع دة ؟؟
-
انا زعلان علشان محدش عايز يرد عليا ومضرب عن الطعام كمان
-
يا عم لا تضرب عن الطعام ولا حاجة
اولا التوكيل حيقولك عايز يغير كل حاجة فى الدنيا... ادفعى يللى انتى مش غارمانة
اتفقنا ان الزيت بيتاكل كتير و بما انك معندكش تسريب خارجى يبقى فيه فقد ناتج عن تسرب داخلى الى غرفة الحريق
هل طرف الشكمان من ورا مزيت؟؟ هل البوزيهات مزيتة؟؟
لو مزيتين يبقى كلامى صح و العربية بتحرق زيت... كبس الموتور 70 على 100000 كيلو كويس حسب ما الراجل قال يبقى حوار البساتم و الشميز و الشنابر و كل ما يخص النص التحتانى للموتور كويس... و كمان الصبابات حاكمة نفسها و مفيش تهريب للكبس يبقى برضة تغيير الصبابات ملوش لزمة
كدة فاضل كاوتش الصباب زى ما قال سبعاوى... انا عمرى ما عملت القصة دى قبل كدة بي حسب معرفتى حتفك الوش و بالتالى حتشوف الصبابات و البساتم و الدنيا كلها بعينك عشان تطمن... حسب حالتك حتلاقى ان شاء الله البساتم كويسة و مفيهاش مشاكل
اعمل طقم رودييه للصبابات بالمرة و انت فاكك و نضف الوش فقط متقشطوش الا اذا كان مقفع... غير كاوتش الصباب مع جوان وش السلندر طبعا و نضف المنافول كويس جدا و انت فاكك و غير زيت و بوجيهات و ميه تبريد و ان شاء الله حتلاقى الحياه اختلفت تماما
MMamdouh
-
سؤال من مبتدئ يا شباب
هو كل الحاجات دي اخونا هايعملها عشان الموتور خفيف ولا عشان تسريب الزيت؟
وسؤال آخر
إزاي الواحد يعرف إن الموتور خفيف
يعني إيه هي الأعراض
وايه خطورة ده
وازاي يمكن معالجته؟
اسف على كثرة الاسئلة بس زي ما وضحت دي أسئلة مبتدئ :)
-
صاحبنا موتورة مش خفيف... بياكل زيت نتيجة تسريب من كاوتش الصبابات
الاعراض هى ضعف القدرة على التسارع و الوصول الى سرعات عالية
استهلاك زائد للزيت
ضعف كبس الموتور عند اجراء اختبار الضغط
MMamdouh
-
ياسلام يا محمد بية يا ممدوح ريحتنى يا راجل ربنا يخليك يارب
على طول انت فى المقدمة ياباشا . شكرا جزيلا
على العموم انا هعمل زى ما انت قلتلى بالضبط بس يعنى اية اعمل طقم رودييه ؟؟
معلش انا لازم اكون فاهم انا بتكلم عن اية علشان الصنايعى ميحسش انى مش فاهم فيشتغلنى .
اسف على اسئلتى الكتير بس انا عارف اننا كلنا هنا اخوات واكتر
وفعلا زى مانتا قلت الشكمان من ورة بيدخن لما ازود السرعة وفى ريحه زيت محروق من الشكمان والعادم فعلا مزيت ..
شكرا اخى الكريم
-
روديية بيبقى زى مطابقة اسطح التلامس بتاعت الصبابات مع الوش عشان يبقوا محكمين تمام
انت ممكن متكونش محتاج دة دلوقتى بس طالما فكيت الوش و الصبابات يبقى اعملها بالمرة بدل ما تحتاجها كمان 20 ولا 25 الف و تفك الدنيا دى تانى
انت عندك ميكانيكى كويس و ثقة ولا لا؟؟
MMamdouh
Content Relevant URLs by
vBSEO 3.6.0 PL2