الموضوع: مساعدين الهيونداى إكسيل

مفيش حد هنا ولا إيه

بص يا سيدى

اولا السوست لا علاقة لها بالكبالن

السوست جزء من نظام التعليق (العفشة) بينما الكبالن جزء من نظام الجر

كل العربيات اللى فى الدنيا على سوست بس بيختلف شكلها من نوع عربية لنوع تانى، يعنى مثلا العربية الصانى فيها سوست حلزونيه قدام وورا فى حين ان الفيات 128 مثلا فيها سوست حلزونية من قدام وسوستة ورق صلب بالعرض من ورا والعربية البيتلز القديمة موديلات ما قبل72 فيها سوست من نوع قضيب الإلتواء (تورشان بار) قدام وورا ومديلات ما بعد 72 الألمانى فيها سوست تورشن بار من ورا وسوت حلزونية من الأمام، فأى عربية فى الدنيا لازم يكون فيها سوست لان السوست هى جزء من منظومة امتصاص صدمة المطبات هى والمساعد

الكبالن هى جزء من نظام الجر ودائما تكون موجودة فى سيارات الجر الامامى ، كما تكون موجودة فى بعض انواع سيارات الدفع الخلفى التى تعمل بنظام التعليق الحر ، لكن شعبيا اصطلحنا على ان كلمة كبالن مرادفة لسيارات الجر الامامى

عموما خدها قاعدة، طالما انت مش راكب مرسيدس او بى إم دبليو او شاهين او لادا او سيارة دفع رباعى او سيارة قديمة من طراز فيات او بيجو(131، 132، 124، 125 ، بولينيز بيجو 504 او 505) فالسيارة اللى انت راكبها هى سيارة جر امامى بدون نقاش

يعنى سواء راكب هيونداى او كيا او بيجو حديث او تويوتا او فولكس فاجن او اى مراكة بعيد عن المجموعة اللى قلناها فى الأول دى فكل ده جر امامى(على كبالن يعنى كما يقول الناس)

يعنى من الآخر عربيتك فيها سوست للتعليق وفيها كبالن للجر الأمامى

مساعدين عربيتك مساعدين عادية جدا وموجودة فى السوق من ماركات متعددة ، لكن عموما لو عايز تغيرهم حاول تلاقى لها مساعدين من نوع كى واى بىkyb اليابانى لأنه نوع ممتاز