الموضوع: تهنئة من ام مريم وزوجه محمد جمعة الى اعضاء المنتدى

انا مش عارفه أقول ايه قبل اى حاجه كل عام وانتم بخير

أنا زوجه محمد جمعه أنا كنت بثق فى زوق محمد وإختياره لاى شئ من غير تردد بس تعرفوا عرفت أن زوقه راقى قوووووووووووووووووى تحديدا لما مات ولقيت فى ناس كتير قوى كدا عارفين أنه مات ومازالوا بيسألوا عن الباقى منه

اللى هوا انتم طبعا
بالمناسبه انا شوفت المواضيع اللى عملتوها
عن محمد أو مريم ومش عارفه اكتب ايه بس عايزه اقولكم شكرا
أنا عرفت محمد جمعه وأنا بدرس فى جامعه المنيا وكتبت كتابى سنتين واجوزت بعد الزفاف تسع شهور وكانوا أجمل تسع شهور المهم إن فى خلال الفتره دى عمرى مافكرت اقوله على حاجه لا او اعمل حاجه يكون نفسيا مضايق منها
فبعد أذنكم أسمحولى اشكركم مره تانيه واقولكم بلاش موضوع طلب فلوس او هدايا من اى حد لان دا هيزعل حمو حبيبى اصل انتم ماعندكمش فكره هو اقد ايه كان حساس وبرئ اسألواالأستاذ سامح والاستاذ هشام وغيرهم من الناس اللى كانوا بيجوا القصر العينى دا حتى التبرع بالدم كان رافض كنت بسأله ليه ياحمو مش دول صحابك ولازم يساعدوك كان يقولى وعشان هم صحابى مش عايز حد فيهم يتشك بأبره عشانى أصل مش عندك فكره أنا بحبهم أقد ايه ...........اللى اقصده إنى مش عايزه حد يكلف نفسه بحاجه غير لما لاقى نفسى فعلا محتاجه لها وبعد مازور حمو واستأذن منه أن هعمل كذا وتأكدا من دا كويس لأن أنا اصلا مليش حد بعد ربنا ثم أنتم نايل موتورز وكمان لأن حمو مش سامح لى أكلم حد غيركم وكلام محمد على رقبتى سيف
أنا قررت أنى أقعد فى المنيا بمريم فى شقتى لمده سنتين وبعدين أسافر الكويت لسببين عشان اشتغل وعشان أنا عندى أخ المهندس وليد مش موافق على وجودى فى المنيا بعد موت حمو ...........شايف ان خلاص مش لى حاجه تانى هنا الراجل ومات وأن 24سنه مش كتير على أنى أبدء حياه جديده ................أحتمال يكون كلامه صح بس مش قادر يفهم أن الراجل اللى مات سايب من الذكريات والمحبه اللى يغطى عمرى اللى فات وعمرى اللى جاى .................هو بس منتظر وفاه بابا عشان يبقى هو اللى يحكم على ..نفسى ربنا يهديه ويبعده عنى.فلما أبقى فى دوله تانيه مش هيقدر يوصلى لأنه جماعات أسلاميه وممنوع يسافر بره...........المهم أدعوا لى أن ربنا يباركلى فى مريم وأقدر اعمل معاها اللى ملحقتش اعمله مع حمو .........حاجات كتييييييييييييييييير كان نفسى فيها وعملها لى بس أنا مش لحقت أعمله أى حاجه يارب يكون مسامحنى قولوا ..........أمين.أبسط حاجه كان نفسه يسافر عند أهلى فى أسكندريه عشان كان جايب لهم هدايا من الكويت بس أنا رفضت لأنه كان بيسوق بسرعه جدا خوفت من مواصلات الطريق الصحراوى السريعه خوفت يعمل حادثه ويموت منى وأنا مليش غيره رفضت.........كان نفسه انقله من العنايه من على السرير اللى مات عليه عشان كان بيتشاءم منه لأنه بيفكره بالجرعه الاولى من الكيماوى وبرضه رفضت عشان العنايه جوها كويس وعشان المناعه ماتنزلش وياخد عدوه ويموت منى بس والله ماكان قصدى ازعله ..........كان نفسه يشوف ابنه بس معرفتش اولد فى السابع ........ياااااااااااااااااااا ااااااااااااه وكان وكان وكان بس مالحقتش ....... ادعولى ربنا يقدرنى على تربيه وتعليم مريم بالتربيه الحسنه عندى أمل أقابل محمد فى الجنه مش معقول أن ربنا هيحرمنى منه دنيا وأخره ..........هو الأكيد ان حمو هيدخل الجنه لأنه كان ملاك فى صوره إنسان والملاك عمره مايأذى حد لكن اللى مش متأكده منه إن أنا أدخل الجنه .................................المهم أنا بهنيكم تانى بالشهر الكريم....................ياجماعه كان في واحد من الزملاء جاء القصر العينى وأعطنى 500ج وقالى لما تخرجوا هبقى أخدهم أنا طبعا مش فاكره أسمه بس هو عارف نفسه ياريت يكلمنى على الموبايل ضرورى أو حتى يبعت لى عنوانه لرد الامانه ضرورى اصل ممكن محمد يكون بيتعذب بيهم وانتم عارفين هو أتعذب بما فيه الكفايه فى الدنيا وشكرا ليكم