اولا رمضان كريم
:biggrin2:
يا جماعه كلنا عيزين نعرف عيوب و مميزات الفكتر cc2000 & cc1600) b).
فياريت الي عنده اي معلومه عن هذا الموضوع ياريت يكتب فيه
اولا رمضان كريم
:biggrin2:
يا جماعه كلنا عيزين نعرف عيوب و مميزات الفكتر cc2000 & cc1600) b).
فياريت الي عنده اي معلومه عن هذا الموضوع ياريت يكتب فيه
لنتفق على حاجة الأول مفيش عربية كلها مميزات و عربية كلها عيوب
انا هاتكلم على الأوبل بوجة عام
1. عربية قوية جداً
2. عربية المانى بتكنولوجيا عالية
3. مواتير معمره لدرجة كبيره
4. عربية واسعه و عائلية و فخمه و شنطتها بحر
5. ثبات خيالى على الطريق
ده ما يخص الأوبل بوجة عام
تيجى للفيكترا البى
1. كماليات كتيره عمليه --- ازاز كهربا ( 2 فى ال 1600 و 4 فى ال 2000) تكييف لو صح تلاجة بمعنى الكلمه - Abs - EBD يعنى كماليات حديثه مش قديمه
2. قطع غيار متوافره و اكتر من الأيه عشان الموديل من 96 حتى 2003
3. عالية عن الأرض
4. طقم صوت جيد جداً
و كماليات انا مش فاكرها بس الزملا و خاصة فادى و تامر يدلوك اكتر منى بمراااااحل فيها
موتور 1600 الأسود 75 حصان
1600 ايكو تك 100 حصان
الموتور 2000 سى سى 115 حصان او 121 حصان
2000 ايكو تك 136 حصان
يعيب الأوبل صعوبة التشخيص
و يميزها سهولة التصليح اذا عرف العيب
اولا المميزات
1- ثبات عالي جدا و خصوصا في السرعات العاليه و الملفات غير باقي العربيات
2-شيك جدا و ركوبتها ممتعه خصوصا القياده
3-يوجد فيها جميع الامكانيات وهذه الامكانيات و التكنولوجيا سابقه عصرها
4-جسم و صاج العربيه قوي و ناشف
5-قطع الغيار اصبحت منتشره
6-.اعطالها ليست كثيره لمن يهتم بصيانت العربيه
7-العربيه عمرها طويل و مبتتبهدلش بسرعه ايضا لمن يهتم بالصيانه
8-لا يعلي علي جميع السيارات الالماني طبعا ولا يوجد مقارنه بين السيارات الالماني و (اليباني - الكوري )
والاوبل لا يعلي عليها لما تكون مهتم بالصيانه بتاعت العربيه
نتكلم عن العيوب
لا يوجد فيها عيوب كثيره لاكن هي عيوب قليله و منتشره عند بعض العربيات الفيكترا
1-التكيف
2-استهلاك البنزين في 2000cc
3-سخونت السياره
لاكن كل هذه العيوب لا تظهر الا لمن لا يهتم بصيانت السياره
و يا ريت نفيد بعض في الموضوع ده
و نريد مشاراكات اكثر لكي نستفيد
وشكرا يا طناني باشا
ده وصف هايل يا سيد طنانى ووائل مش هعرف اضيف حاجه كده
الاوبل عايزه اهتمام يعني لما حاجه تبوظ صلحها علطول واهتم بالصيانه بتاعتها واكيد وقتها مش هتلاقي فيها اي عيوب لان هي عربيه ممتازهجدا بس عايزه اهتمام لانها لما بتقع هتصرف كتير اوي عشان تقومها تاني.
اى عربية فى الدنيا تهملها تعذبك مش الأوبل بس
تماام يا جماعه
صعوبه التشخيص ف كل عربيات المانيه ومش بس الاوبل
سهوله التشخيص للناس اللى عندها خبره فيها وبزات الاوبل
سلام عليكم...
المميزات والعيوب...
اولا المميزات.:
ثبات رهيب جدا جدا بجد خرافى فعلا وفى نفس الوقت امان عالى بطريقة غير عادية...
اقتصادية جدا جدا فى البنزين ودى حاجة معايا شخصيا ومستغرب منها جدا يعنى انا معايا موتور ايكوتيك 2000 سى سى بيعمل فى الصفيحة على الطريق مابين 230-250 كيلو ودى حاجة مجننانى شخصيا....
فخامة عالية فى الركوب يعنى تكون قاعد فى العربية مرتاح جدا جواها...
شنطتها واسعة جدا وتشيل كتير ...
قطع غيارها متوافرة جدا حاليا سواء جديد او استيراد والاسعار اقل من زمان بمراحل...
سعرها حاليا رخيص عشان كدة تعتبر صفقة كويسة كسعر مقابل الاداء..
ثانيا العيوب:
اولا :صاج قابل للصدأ بطريقة غريبة والصدأ بيظهر فيها فى اماكن غريبة جدا...
ثانيا: مشاكل الكهرباء فيها لو مكنش دكتور بمعنى الكلمة بيصلحها فسورى يعنى هتخليك تبيع هدومك...
ثالثا التكييف بتاعها مش عملى ومشاكله كتير وبيبوظ بسرعة عند ناس كتير وتصليحه غالى ومكلف...
رابعا: العربية مستهلكة لقطع الغيار حتى لو اصلية ومش متلائمة مع طبيعة الطرق بتاعتنا عشان كدة بتستهلك قطع غيار كدة...
خامسا: العربية عاوزة اهتمام ورعاية خاصة جدا لو حضرتك فاضيلها ومعاك ميزانية جاهزة يبقى العيب ده بالنسبة لك اوكى ميفرقش
سادسا: العربية صعبة تشخيص العيب يعنى لما يحصل فيها حاجة هتخنقك لحد ماتعرف العيب فين وممكن تخليك مخطط استراتيجى وتعلمك فنون الحرب بسببها..
سابعا: لما تيجى تبيع هتخسر كتير من سعرها لأن سعرها كل يوم بينزل عن اللى قبله...يعنى مش العربية اللى تكسب فيها لما تيجى تبيعها...
انا قولت رأيى بما يرضى الله وبما يرضى ضميرى من التجارب اللى شفتها مع ناس كتير وبعض منها شفته معايا انا شخصيا والله اعلم..
بجد الاوبل عربيه ممتازه جدا كفايه ثباتها علي السرعات العاليه وتحس انك في امان لو حصل اي ظرف مفاجاه علي الطريق وشكلها جميل وشبابيه وعائليه في نفس الوقت وواسعه والتكيف كويس الي حد ما وعلي فكره حكايه انها بتسخن دي عادي يا جماعه هي اولا مش بتسخن الحراراه بتاعتها بتكون من 90 الي 95 ودا طبيعه الاوبل كلمه بتسخن دي يعني العربيه تقف منك وتضرب جوان وتبهدلك لكن الحراره بتكون 95 مثلا والعربيه ماشيه عادي انت مالك بقي ومال الحراره كام وبعدين الالماني كله كده ومن الاخر الالماني ليه ناسه
يا جماعه كل كلمكم صح يس تكيف الاوبل جميل جدا لما تهتم بيه
انا تكيف عربيتي رائع وشغال زي الفل
موضوع السخونيه في الاوبل ده عادي اساسا كل الاوبل بتسخن
بس مش السخونيه الرهيبه الي بتكون في بعض العربيات الاوبل المهمله
ولا عمري سمعت عن السخونه دي اصلا ف جميع موديلات الاوبل؟!!!!!!!!!!!
ياباشا حضرتك من الاردن...
يعنى زى ماقولتلك مواتير تانية ونظام تقفيل تانى وحاجة تانى خالص غير اللى موجود هنا فى مصر...
فى مصر كل مشاكل الدنيا والاخرة موجودة فى حكاية السخونة دى عند 90% من اللى راكبين العربية دى...
فمينفعش تقارن مواصفات بمواصفات تانى خالص زييها ولا توحد الرأى مابين الاتنين...
زى مثلا التويوتا 2010 نزل منها جنوب افريقى ونزل منها خليجى والاتنين واحد فى الشكل ....بس اتضح بعد كدة مشكلة الفتيس فى كل العربيات الجنوب افريقى وطلع ان ده فتيس وده فتيس تانى خالص وده موتور وده موتور تانى ودى عربية ودى عربية تانى...
نفس النظام كدة بالظبط هنا فى مصر فى الاوبل وعندك انت فى الاوبل دى عربية ودى عربية تانى خالص...
مفيش فرق ياباشا مابين اوبل مصر واوبل الاردن كله واحد وبنفس المواصفات
ما انا بقول كدة كل حاجة ياباشا جاية من المانيا مفيش حاجة اسمها تقفيل مصرى وتقفيل المانى كل واحد فى قطع الغيار بتفرق فى حاجات هبلة جدا ولا يمكن ان تفرق فى حاجة ميكانيكى ولا اى حاجة كل قطع الغيار واحد هنا زى المانيا زى الاردن و الماتور الاسود دة نازل فى بلاد كتير جدا مش مصر والبارزيل بس و موجود فى المانيا كمان سخونة الاوبل الحرارة مش بتعدى 91 ابدا ولول شغلت التكيف الحرارة بتبقى 85 فى عز الحر االاوروبى عموما عايز ناس فاهمة تشتغل فيه ودى هي ضريبة ركوب الاوروبى عموما و على اسهل عربية فى التصليح فى الاوربى تقريبا هى الاوبل
فى موصفات فى التقفيل مينفعش تقل عنها ابدا ولا تقولى منصور ولا مصر ولا حتى صين
كلام سليم ياباشا ومن الاخر
انا وغيري والله معمريش سمعت مشكله ف تكيف الاوبل او سخونه ف الاوبل
وزي ما قولت درجه الحراره الماتور مش بتعدي ال90 خاالص
مع العلم انه درجه الخراره هنا وصلت 46
ياباشا فيه فرق طبعا ازاى مفيش فرق؟؟؟؟
فرق كبير بين الاتنين ولما حضرتك تنزل مصر ابقى بص كويس على عربيات مصر...
كفاية قوى ان حضرتك باعترافك قبل كدة قولت انك اول مرة تسمع عن اوبل 1600 هنا فى مصر...
ده مجرد مثال والفرق موجود بين الاتنين وكبير جدا....
تقفيل المانيا غير تقفيل مصر...
المواصفات اللى بيقفل بيها منصور والكماليات اللى بينزلها غير اللى بتنزل من برة...
قول لأى واحد هنا تشترى اوبل تقفيل منصور ولا اوبل تقفيل المانيا وشوف هيقولك ايه...
مواتير -جودة تقفيل - فرق كماليات -حاجات تانى كتير..
فرق كبير صدقنى ولما تنزل ابقى شوف بنفسك
صح التقفيل المصرى غير اللمانى
و ده ظاهر اكتر ما بين الأيه و البى
تماام يا سرور يعني ايه تقفيل مصري؟؟؟
تجميع ولا ايه
ايه الحاجات المتقفه ف مصر
تقفيل مصرى سىء يعنى تجميع العربية كلها بجميع مكوناتها فى مصر والتقفيل المصرى طبعا حدث ولا حرج اسوأ من السوء..
يعنى موتور بينزل مصر اسمه 1600 و2000 كامة واحدة من اسوأ المواتير واكترهم مشاكل سواء سخونة او غيره...
يعنى موتور ايكوتيك معرفناش عنه حاجة هنا فى مصر غير من سنة 2002 وطبعا فارق قوة كبير بين الموتورين وطبعا فرق ضفيرة كهرباء كاملة بالتبعية ومعاها ضفيرة موتور وشريحة كومبيوتر..
يعنى عفشة موتور مختلفة طبعا عن اللى بتنزل عند حضرتك بسبب اختلاف المواتير واللى من مصر وعاوز يتأكد يروح يبص على العفشة الاستيراد ويقارنها بعفشة عربيته هيلاقى فرق كبير مابين دى ودى.....
يعنى تقفيل نظام فرامل مختلف ونظام abs مختلف مابين المصرى واللى بينزل برة....المصرى اسمه 415 والاوروبى واللى بينزل عند حضرتك اسمه 430 وطبعا مش محتاج اقولك اقد ايه كلنا هنا بنعانى من مشاكل الفرامل...انما لما قلبت فرامل عربيتى كلها بالجهاز على النظام الاوروبى حسيت بفرق كبير جدا سواء فى قوة الفرامل او انى ريحت دماغى من مشاكلها....
يعنى تكييف متقفل سىء جدا هنا فى مصر عشان كدة متلاقيش عربية اوبل واحدة فى مصر كلها تكييفها فبريكة مضربش قبل كدة الا لو واقفة من ساعة ماصاحبها اشتراها...
وغيرها حاجات كتير انا حبيت بس اقولك امثلة عشان تعرف ان عندنا عربية غير اللى حضرتك بتشكر فيها نهائى نهااااااااااااااائى
سرور باشا
انت متحامل شوية
يمكن انا مش حاسس بكم مشاكل الفيكترا بى لعدة اسباب
ان عربيتنا الفيكترا ايه المانى و اللى بتقفل فى مصر الأزاز بس و هى بتنزل من بره بازاز و بيغيروه عشان تبقى انتاج محلى
موتور عربيتنا اللى بره هو اللى جوه
العفشة و الشاسيه و الفتيس و التابلوه اللى موجود بره هو اللى عندنا
ان صاحب العربية القديم كان راجل محافظ عليها بغبا فى الأساسيات بس كان فيها كذا حكه على خبطه ( تحيا مصر )
على فكرة انا مش متحامل والله ولا حاجة انا قولت حقائق سهل جدا اى حد يتأكد منها لو راح عند اى محل استيراد عنده انصاص فيكترا بى كاملة من برة وهقولك ازاى...
اسأل اى ميكانيكى اوبل قوله لو عندى موتور اسود 1600 او 2000 وعاوز اشيله واحط موتور ايكوتيك 2 كامة قوله ايه اللى لازم اغيره؟؟
هيقولك موتور وعفشة وفتيس وفرامل وتابلوه وضفيرة موتور وكومبيوتر موتور وكومبيوتر فتيس وضفيرة فتيس وشوية حاجات تانى كدة...
لو بصيت لكل ده هتلاقى ان مجموعه ان العربية اللى بتنزل برة غير اللى بتنزل هنا خالص...بسبب ان كل ده مختلف...صدقنى فى الفيكترا بى التعقيد اكتر بكتير والحوارات اكتر طبعا بمراحل...وطبعا زيد على كل ده جودة التقفيل هنا بقى للحاجات اللى بقولك عليها دى هتلاقى ان المحصلة ان الاوبل عربية اتظلمت جامد جدا مع منصور والمواصفات اللى هو بيطلبها تنزل لمصر....
عشان كدة بقولك ان الاوبل مش عربية لمصر دى عربية لأوروبا وبلاد تقدر تفهمها مش لبلادنا...
اما الفيكترا ايه فكل اللى اعرفه عنها انها اقل فى التعقيد يشوية من الفيكترا بى ومشاكلها اقل وتقفيلها انضف طبعا...اللى اعرفه ان مشاكل الفيكترا ايه كلها عبارة عن فرامل وحرارة شوية بسيطة وبس....
طبعا زى مابقولك دى حاجة ودى حاجة تانى خالص...وعلى فكرة مانكرش ابدا انى ببقى مستمتع جدا وانا سايقها بس ايه فايدة الاستمتاع ده وانا لما بسوقها بسوقها عشان اوديها تتصلح؟؟؟وانا عشان اروح اصيف بيها مثلا بصلى قبلها 3 ساعات لربنا عشان متقفش بيا ؟؟وانا عشان اسافر بيها لازم اروح الاول اخد كورس عند ميكانيكى ويطمنلى عليها كويس؟؟؟
ياباشا زى ماقولتلك احنا بنركب عربيات عشان تشيلنا مش احنا اللى نشيلها ونروح نصلحها..
ياباشا كلامك كل دة مش صح لكذا سبب مش لان التقفيل المصرى و الكلام اللى انت بتقولة دة الماتور الاسود دة موجود فى بلاد كتير جدا مش مصر بس
وموضوع انك عايز تنزل الماتور 2000 على الماتور 1600 هتغير شوية حاجات زى مثلا مش العافشة كاملة بتغير سوست بس قدام لان حمل الماتور الجديد اكبر من الماتور القديم بس مش لان منصور هو اللى قال هتلقى عفشة تعبانة الكلام اللى انت بتقولة غلط جدا جدا بص على المساعد بتاع الاوبل 1600 هتلاقى مكتوب علية gm ومصنوع فى المانيا مش منصور هو اللى مصنعة
1-وموضوع تغير الطابلون دة مش موجود خالص خالص
2-و اى ماتور لازم يتسقط لازم بيبقى بالضفيرة بتاعتة و الكمبيوتر علشان دة ماتور تانى خالص مش نفس الماتور
3-ولازم هتغير فتيس لان الفتيس اللى عندك يستحمل 1600 مش هيستحمل 2000 خالص مش لان منصور هو اللى صنع الفتيس وعملة فتيس يستحمل ماتور 1600 بس
4-موضوع الفرامل اللى انت اتكلمت عنها دى لازم لان قدرة الماتور الجديد لازم تغير الفرامل وبص
مش منصور اللى طلب الموصفات دى اللى صمم العربية شاف ان 1600 حلو علية السوست دى
وشاف ان الفاتيس بتاع 1600 كويس كدة وهكذا
مش منصور و الموصفات دى نزلت كدة من المانيا
كل الكلام اللى انت بتقولة دى لازم يتغير لو هتغير الماتور لاكبر فى اى عربية
وواضح جدا انك فعلا متحمل على العربية جدا
ومش معنى ان واحد جاب عربية متهانة يبقى كل العربيات كدة
وهقولك اكبر مثل شوف محمد مختار مثلا مسقط ماتور 2000 شوف غير اية ولية سبب التغير دة وانت تعرف
عربية متهانة؟؟؟
طيب ياسيدى شكرا...
بس عموما شوف انت قولت هتغير ايه وايه وانت تعرف برده ان دى مواصفات ودى مواصفات
للأسف معنديش وقت اجادل تانى فى حاجة كله من جواه مقتنع بيها وبيدافع وخلاص
يا عم سرور انا مش اثصد اهانة انا لما افول عربية متهانة اية الاهانة اللى فيها
ومش عارف انت مقطنع بحاجة غريبة جدا
يا سيدى انت بتقارن بين عربية 1600 و عربية 2000 سى سى يعنى لازم ولا بد يبقى فى تغير فى الموصفات انت لية مش مقطنع كل الحاجات اللى انت بتقول عليها دى لازم تتغير فى اى عربية بتسقط ماتور من 1600 ال 2000 حتى لو bmw او تويوتا او مرسيدس لان العربية نازلة بماتور 75 حصان ووزنة خفيف غير لما تنزل بماتور 136 حصان هنا لازم الفرامل تتغير
و السوست علشان وزن الماتور و الكمبيوتر و الضفيرة علشان كل حاجة اختلفت فى التشغيل
مش معنى كدة ان دى حاجة عملتها اوبل لمصر بس عمر ما اوبل تغامر با اسمها ابدا
كلام سليم يا سرور باشا
العربيه دي بزات عايزه واحد يفهمها كويس ووللاسف مش موجود ف مصر
طيب يبقى محصلة كل ده ان دى عربية بمواصفات ودى عربية بمواصفات تانى..
ماهو لما يكون موتور مختلف وفتيس مختلف وكومبيوتر فتيس مختلف وعدادات مختلفة وفرامل مختلفة وعفشة مختلفة وضفيرة كومبيوتر فتيس مختلفة وضفيرة كومبيوتر موتور مختلفة...تبقى برده هى هى نفس العربية؟؟؟وخد بالك انى بتكلم عن الايكوتيك ال2000 سى والموتور الاسود برده 2000 سى سى يعنى فنس القوة لكن طبعا كل حاجة مختلفة
اما بالنسبة لحتة ال1600 فانا قولت الموتور الاسود وده فيه منه ال2000 سى سى....تقدر تقولى ليه الموتور الاسود ال2000 ده نزل مصر رغم ان الايكوتيك برده 2000 سى سى وكان ممكن ينزله مصر من الاول زى مانزل برة؟؟؟؟
وطبعا رغم ان ده 2000 سى سى وده 2000 سى سى انما كل حاجة قولتلك عليها فوق بتتغير مع التسقيط رغم انك كدة 2000 سى سى وكدة برده 2000 سى سى...لكن عشان دى مواصفات ودى مواصفات تانى فالامور بتفرق....
كمان خد بالك ان الطابلوه بيتغير لأن المواتير الايكوتيك كلها ماعدا 1600 عداد السرعه بتاعها 260 مش 220 زى الموتور الاسود العادى 2000 سى سى و1600....وعلى فكرة انا عربيتى معايا من زمان جدا جدا وتقدر تقول حافظ كل مسمار فيها كويس جدا ومسقط فيها موتور ايكوتيك وشيلت الموتور الاسود يعنى مش بتكلم كدة وخلاص....
حاجة كمان واخيرة.....برة اغلب الدول المحترمة اللى نزلتلها الاوبل نزلت بالمواصفات اللى بقول لحضرتك عليها من اول الموتور لحد الفرامل...و2000 سى سى برده....اشمعنى احنا هنا فى مصر نزلنا 2000 مختلف عن كل اللى نزل برة؟؟؟؟؟؟؟
حقيقى وكلام سليم جدا ومقتنع بيه ومتفق معاه....
وعاوز اقول كمان ان البى ام على سبيل المثال عربية اعقد بمراحل من الاوبل واعلى تكنولوجيا...
وعلى الرغم من كدة مشاكلها اقل بكتير جدا من الاوبل ومشوفناش كم المشاكل اللى بنشوفه فى العربية دى ...
عاوز تتأكد اكتر من كلامى روح عند اى مركز صيانة اوبل عادى وشوف كام عربية راكنة هناك بتتصلح عشان تعرف قد ايه العربية دى بتعانى فى مصر...
-----------------------------
حاجة كمان الاوبل 2009 واهى المفروض عربية زيرو تقدر تقولى ليه سعرها فى السوق المصرى حاليا بيتراوح مابين 80-100 الف جنيه فقط مستعملة رغم ان سعرها جديدة 150 تقريبا؟؟؟؟؟؟وليه كل اللى ركبها عاوز يبيعها ؟؟؟فكر كويس وانت تفهم انا قصدى ايه
-------------------
معلومة اخيرة...شركة اوبل حاليا بتنهار اقتصاديا زى ماالكل عارف ومش عارفين لسة خطط جى ام بالنسبة لها هتكون ايه خصوصا وان جى ام نفسها بتنهار ولولا دعم كبير من الحكومة الالمانية والامريكية كانت الشركة اعلنت افلاسها
بنسبه لموضوع bmw و الاعطال القليلة لان bm تكنولوجيا علية جدا و حساسات كتير و عربية سعرها غالى علشان كدة النماس بتصلح فى التوكيل علشان كدة اعطال قليلة
بص هات عربية واحدة bm من اللى انت بتتكلم عنهم وصلحة عند واحد من بتوع بير السلم وانت تعرف كم المشاكل و القرف الرهيب اللى هيبقى فى العربية
وعلى فكرة مين اللى قالك ان الفيكترا 2008 بتتباع بالسعر دة العربية دى بتعمل للحالات النضيفة اوى 100 لحد 140 حسب الكمليات
تانى حاجة انت بتقول ان العربية دى فيها مشاكل طب ازاى ودى تقفيل المانى و على كلامك ان التقفيل المانى بدون مشاكل
ومين اللى قالك على المعلومة الاخيرة اللى انت جيبها اللى هيا انهيرا اوبل اولا لو اوبل بتنهار لية الموديلات و العربيات الجديدة اوبل لسة بتصنعها زى انسجينا و gt و ميريفا و الاسترا و العربيات الكهربا و عربيات كتير جدا وبتنزل اشكال جديدة و عربيات جديدة
و على فكرة اللى كان بينها gm مش اوبل دليل على كلامى ان شركة ماجنا و fiat وشركات كتير جدا كان نفسها تشترى الاوبل و gm قررت تحتفظ بيها بسبب مبيعاتها
وفى الاخر سبب المشاكل اللى انت بتقول عليها دى بسبب الحالة و المعاملة
وانا والله اعرف ناس عربيتها عملة 550 الف من غير عمرة و لا غير حاجة فى التكيف ولا اى حاجة صيانة عدية عند ناس تخصص اوبل وبس
طب فين الرد على كل كلامى بتاع التعديل واختلاف المواصفات مابين مصر وبرة ؟؟؟؟
تانى حاجة البى ام ليها مراكز صيانة برة التوكيل كتير وناس بتصلحها كتير برة وعلى الرغم من كدة مالهاش كل المشاكل دى اللى عندنا...معلومة كمان البى ام تبريدها مروحة واحدة بس وعلى الرغم من كدة مالهاش اى علاقة بموضوع السخونة...احنا مروحتين وشوف الناس فى المنتدى هنا قد ايه بتصوت من السخونة....
معلومة كمان انزل السوق بتاع الجمعة وانت تشوف بنفسك ان اعلى فئة فى العربية ال2009 مستعملة لو فبريكة بالكامل سعرها 100 الف جنيه فقط لاغير ومفيش خالص 140 دى نهائى ........انزل سوق الجمعة وشوف بنفسك..وبعدين احكم وسعر براحتك....
يا استاذ سرور الموصفات مختلفة بسبب الماتورررررررررررر يعنى الكمبيوتر بتاع الماتور 1600 غير بتاع 1600 2 كامة و الاتنين دول غير 2000 و 2000 غير 2.5 غير 3.0 وهكذا و الفيرة كذالك و هقولك حاجة لية نظام الفرامل فى الاوبل 2.0 الماتور الايكوتيك مهتلف عن الماتور 2.5 كانو بيغشوا الناس ولا اية و العفشة بتاعت 2.5 غير العفشة بتاعت الماتور 2.0 الاتنين كامة و المبيوتر و الضفيرة لان النظام مختلف فى كل واحد و نظام تبريد مختلف فى كل ماتور و حاجات كتير جدا و المواتير وزنها اتخلف فى كل مرة
شركت اوبل عمرها ما تعرف دول علشان تنزل هنا حاجة وهناك حاجة على فكرة الماتور الاسود دة نازل فى دة كتير و على فكرة من انتاج شركة اوبل و صنع فى المانيا
ولما انت بتكره الاوبل اوى كدة ومليانه مشاكل لية لما جيبت العربية سقت المتور 2 كامة بفتيس المانوال و بعد كدة سقت الفاتيس الاوتو مش كنت ارتح من مشاكل وقرف الاوبل من الاول وبعت بدل التكليف والقرف دة
يا استاذى كل شركة وليها نظام ما التويوتا مروحتين وعربيات كتير موحتين كل شيخ ولية طريقة و الشخونة فى الاوبل بسبب الاهمال والله لا غير يوديها عند ميكانيكى وكهربائى يلعب فى اوم الضفيرة و يلعب فى الشجرة والعب ولا الزبون حاسس واتفرج بعد كدة
وزى ما قلتلك هات عربية bm ووديها عند الناس اللى معاها اوبل وبتصلح تت بير السلم و اتفرج والله العظيم هتكره حاجة اسماها bm طول حياتك
والاسعار اللى انت بتقول عليها دى انا عمرى ما شوفتها وقليل اوى اصلان لما تلاقى حد بيبع الاوبل الجديدة دى اصلا و الاسعار اللى انا قولتلك عليها دى شوفتها كتير جدا ولو عندك والله واحدة اوبل فيكترا الايزى ترونك الجديدة اللى كراسى كهربا و فتحست سقف اللى هى اعلى فئة وعلى 100 انا شارى فورا بس شرط الحالة
ياباشا ركز بس معايا انا قارن 2000 عادى ب2000 ايكوتيك...
وحضرتك فى الاول بتقولى اللى بينزل مصر هو هو اللى بينزل برة...
ازاى وده موتور بنظام وسيستم كام وده موتور تانى؟؟؟وليه اصلا من الاول منزلش الايكوتيك فى مصر 2000 سى سى وا1600 على طول بدل مانزلوا الموتور الاسود؟؟؟ لاحظ ان كل الكلام من البداية انك مكنتش مقتنع ان برة العربية دى حاجة وهنا حاجة تانى خالص....
اما بقى موضوع الاعطال وكدة فواضح ان حضرتك مش عايش فى الدنيا بتاعتنا...روح التوكيل اللى هو المفروض انضف مكان بيصلح وشوف كام عربية عنده بتتصلح كل يوم...روح اى مركز صيانة وشوف بتتصلح هناك كام عربية كل يوم..روح الحرفيين وشوف كام عربية بتتصلح هناك كل يوم....انزل امشى فى الشارع واسأل اى واحد راكب اوبل قوله رأيك ايه فى العربية وشوف هيطلع فاطر من رده ده ولا لأ.....اقف مع اى ميكانيكى فاهم وكبير او صاحب اى مركز صيانة اوبل وشوف هيقولك اشترى العربية دى ولا لأ...استحالة بقى ان كل العالم دى مبتفهمش حاجة وسورى يعنى ميفهموش حاجة فى الاوبل وكلام حضرتك عن الاوبل انها عربية مثالية وجميلة ومالهاش مشاكل هو الصح....اكيد يعنى كل الناس دى مش بتكره العربية زييى كدة عشان بينهم وبين بعض تار يعنى ...اكيد يعنى من اللى شافوه.....
حاجة تانى ...مش هيفيد حد لما نضحك على نفسنا ونقول اشعار فى عربية نطلعها سابع سما عشان احنا راكبينها ونحسس اللى بيقرا انها ولا المرسيدس فى حين كلنا بينا وبين نفسنا بنشكتى منها...دى متبقاش اسمها صراحة...
اما بالنسبة لمووضوع البيع فانا عاوز ابيع عندك حد يشترى؟؟؟
وعلى فكرة بتوصل لحد 160 الف كمان لو موديل 2008 و عاملة مثلا 40 الف توصل لحد 150 او 160
لو تعرف تجيبلى واحدة منها على 100 انا شارى فورااااااااااااااا
اولا على فكرة انا معايا الاوبل دى من 3 سنين تقريبا وعملت معايا 60 الف وعارف انا بقولك اية كويس جدا وعارف رئ النا س فى العربية و كل واحد عارف عربيتة
وبعدين انا تعبت من الكلام الصراحة فى الموضوع دة
وبعدين الاوبل مش عايزة حاد يشكر فيها و يعيب فيها لان اللى راكب اوبل او ركب عارف قيمة العربية دى
وزى ما قالتك العربيات حالات مش واحد يجيب حالة مهرية ويقول انا راكب اوبل ولا يجيب مرسيدس طالع عين اهلها ويقول انا راكب مرسيدس
وبعدين انت مرديتش عليا لية انت بتقول الاوبل مقرفة وعربية معفن لية بعد ما جيبتها وقعدت معاك سقط مكنة 2000 الايكو بالفتيس المانوال وبعد كدة سقت الفتيس الاوتو يعنى تقريبا مصاريف دخلت فى 10000 الف لية كل دة مابعتش لية من الاول وعلى الاقل تستريح من القرف دة
مابعتش لأنى ماكنتش فكرة البيع فى دماغى اساسا...ولأنى غاوى اساسا طول عمرى تسقيط وتعديل ولما لقيت قصة الموتور الايكوتيك بتعديلاته دى قولت اجرب...ولعلمك اساسا والله الحمدلله قصة الفلوس مش فارقة قوى..وحضرتك بتقول العربية بالتعديل تصرف حوالى 10000 جنيه...احب اقول لحضرتك انى غيرت فيها كل حاجة تقريبا وصرفت مايزيد عن 16 الف جنيه يعنى كاملة من الالف للياء.بس هى النظرية ان العربية الاوبل اساسا محتاجة واحد فاضيلها كل اسبوع يشيك عليها فى التوكيل او مركز صيانة مش زى باقى العربيات يركب ويمشى على طول....
وفعلا انا كمان زهقت من الكلام فى الموضوع ده لأنى كل مااتكلم فى حاجة الاقيك دخلت فى حاجة تانى ومردتش على ولا نقطة من اللى قولته من بداية النقاش وده طبعا مينفعش معايا لأنى عندى استعداد اناقشك لحد بكرة بس ترد على كلامى بطريقة واضحة ..
رمضان كريم وسلام عليكم وفى الاخر ده نقاش لايفسد للود قضية
بص ياباشا
كلامك مظبوط
بس خلي بالك المشاكل دي بس ف مصر ومشكلة التوكيل نفسه ومش الشركه
ادينا راكبين الاوبل وهيا فعلا قليله الاعطال هنا زيها زي البي ام اللى ف مصر
الحمدلله عندي استرا موديل ال 2003 ولحد دلوقتي العربيه ماشيه 300000 الف ك ومغيرتش حاجه خالص غير الزيوت والفلاتر والصيانه الدوريه بتاعتها