شركه فودافون وعروضها الهزيله والمريضه يجب على عملائها محاسبتها

عرض فودافون من الساعه 1 ص الى 8 ص تاخد ساعه مجانا عند الشحن بقى ده عرض فى رمضان
مين اللى هايتصل بوالده او عمه او احد اقاربه او زملائه الساعه 1 ص هايقول ايه علينا
دا لو الواحد اتصل به اى واحد الساعه 11م بيبقى قلقلان ليكون لاقدر الله فى حاجه مش كويسه
فيها ايه لو فى عرض او نظام جديد الواحد يتصل من الساعه 8 ص الى 11 م بسعر منخفض للدقيقه مش هاتخسر حاجه بجوار عروض الشركات المنافسه ولا هما مش بيشوفوا ولا بيسمعوا هذه العروض
ولو انت وافقت على العرض تبص تلاقى الرصيد انتهى طيب ازاى
تتصل بالشركه لكى يرد عليك احد عملائها بعد ربع ساعه وطبعا ده على حسابك بعد سماع قصه حياة الشركه وعروضها التعبانه
ويقللك معلش علشان العروض فالشبكه عليه ضغط
دا انا اتصلت الساعه 1.30ص فين الضغط امال لو اتصلت الساعه 12 ظهرا ماكانش حد هايرد على ولا ايه هى فين العروض ده باين كده ان الشركه نايمه فى العسل
سالته على رصيدى انتهى ازاى شوف بقه الاستخفاف بالعملاء
يقلى اصل مش باين عندى استنى 24 ساعه علشان وكلمنى تانى علشان يبان المكالمات اللى انت اتصلت بيها
الله يرحم الشركه فين ايام ماكانت شركه كليك هى المسئوله عن الشبكه المحمول هذه قبل بيعها
وتتصل بالشركه يرد احد ممثلى الخدمه حالا ...من غير ماتسمع الاغانى والعروض اللى مالهاش لازمه
الناس اللى مصبرهم على الشركه بسبب عملهم فقط لا اكثر والا كانوا رموا نمرهم
اولا : لازم شركه فوادفون تحترم عملائها لانهم هم السبب فى انتشارها وهى من غيرهم ولا حاجه
ثانيا : الشركه لازم ترد على عملائها عند الاتصال مش بعد 24 ساعه هو ينفع تحط فلوسك فى بنك وتروح تسال عليها ينفع يقلك الرد بعد 24 ساعه ده مش منطقى الا اذا كانت سياسيه الشركه غير شفافه وغير واضحه مع العملاء
ثانيا : تكون الشركه التى تقدم العروض الجديده قبل اى حد وتكون مواعيد العروض مناسبه لجميع الاعمار مش بتوع الليل واخرة
واخيرا : لا تقلد الشركات الثانيه والمنافسه لها بنفس عروضها دا حتى يبقى عليها وهى شركه عالميه

أنا فقستهم ...

أنا عامل صفحة خاصة برقمي على موقعهم بتابع منه الرصيد وتفاصيل المكالمات ..

كانوا أرسلوا لي رسالة ان الانترنت مجانا حتى 12 - 8 وبالتالي دخلت مرتين بكمية بيانات اقل من 100 كيلوبايت

فوجئت بسحب جنيه عن كل مرة

وكذلك عرض رمضان من 1 -8 ص فوجئت باحتساب المكالمات

بعثت اي ميل شكوى وردوا علي خلال 48 ساعة

رجعولي ال 2 جنيه

ووضحولي ان احتساب المكالمات بيكون من رصيدي الإضافي وليس الأساسي

------------------------

وانا في عمان مشغل خدمة التجوال , وعن طريق صفحتي على فودافون >> فوجئت بتناقص الرصيد 10 ج شهريا

بعثت بشكوى عبر الايميل وردوا علي بعد شهرين ورجعولي الرصيد تاني

اللي ما يعرفش بيبلعوا رصيده والسلام

تصحيحين بسيطين

1- مكالمة خدمة العملاء بتبقى المكالمة كلها بتمن دقيقة

2- كليك و فودافون نفس الحاجة بالظبط مفيش حاجة اتباعت ..... هي من اول يوم و هي تبع فودافون و بعدين فودافون قررت تغير اسمها من كليك لفودافون مصر

اقتباس:

---

المشاركة الأصلية كتبت بواسطة أحمد كمال

تصحيحين بسيطين

1- مكالمة خدمة العملاء بتبقى المكالمة كلها بتمن دقيقة

2- كليك و فودافون نفس الحاجة بالظبط مفيش حاجة اتباعت ..... هي من اول يوم و هي تبع فودافون و بعدين فودافون قررت تغير اسمها من كليك لفودافون مصر

---

فودافون شركة عالمية، وهي اللي اشترت كليك واخدتها عالجاهز
لو كليك تبع فودافون من الاول، طب ليف في فودافون من زمان في العالم كله؟؟
تحياتي

اقتباس:

---

المشاركة الأصلية كتبت بواسطة mahdyez

عرض فودافون من الساعه 1 ص الى 8 ص تاخد ساعه مجانا عند الشحن بقى ده عرض فى رمضان
مين اللى هايتصل بوالده او عمه او احد اقاربه او زملائه الساعه 1 ص هايقول ايه علينا
دا لو الواحد اتصل به اى واحد الساعه 11م بيبقى قلقلان ليكون لاقدر الله فى حاجه مش كويسه
فيها ايه لو فى عرض او نظام جديد الواحد يتصل من الساعه 8 ص الى 11 م بسعر منخفض للدقيقه مش هاتخسر حاجه بجوار عروض الشركات المنافسه ولا هما مش بيشوفوا ولا بيسمعوا هذه العروض

---

العرض ده من 12صباحا إلي 6 مساء
مش 8 صباحا

و الساعة دي عشان حضرتك شحنت ب 10 جنيه بس لكن لو شحنت بأكتر يعني ب 25 مثلا هتاخد دقايق اكتر

فعلا فودافون عروضها تعبانة بالمرررررررررررررة
والواحد جديا بيفكر يغير اتصالات ..

اقتباس:

---

المشاركة الأصلية كتبت بواسطة Richman

فودافون شركة عالمية، وهي اللي اشترت كليك واخدتها عالجاهز
لو كليك تبع فودافون من الاول، طب ليف في فودافون من زمان في العالم كله؟؟
تحياتي

---

كلام غير صحيح ..... كليك هي فودافون و فودافون هي كليك .......

و ماكانش فيه فودافون في العالم كله و لا حاجة ..... كانت في انجلترا بس ..... و كانت بتفتح شركات في بلاد كتير باسماء مختلفة كل بلد و اسمها ......

من اول يوم في مصر و فودافون تمتلك 71% من كليك ..... و بعد 3 سنوات بدأت فودافون العالمية حملة لتغيير الأسماء في كل الدول لتوحيد الماركة

يعني في المانيا كان اسمها D2 .... خلوها Vodafone D2 و بعدها خلوها Vodafone

في مصر كانت ClickGSM ..... خلوها Click Vodafone و بعدها Vodafone Egypt ......


بالعكس ..... انا عايز اقول لك ان بعد ما كليك بقت فودافون ....فودافون العالمية خفضت حصتها في كليك من 71 الى 50.1% بسبب ازمة السيولة العالمية سنة 2001 !!

اقتباس:

---

المشاركة الأصلية كتبت بواسطة mohamed_refaat

فعلا فودافون عروضها تعبانة بالمرررررررررررررة
والواحد جديا بيفكر يغير اتصالات ..

---

حول و مش هتندم :)

اقتباس:

---

المشاركة الأصلية كتبت بواسطة أحمد كمال

حول و مش هتندم :)

---

استاذ احمد... كل سنه وحضرتك طيب....
كنت عايز اسأل حضرتك ليه بتفضل اتصالات (وانا على فكره معايا اتصالات يعنى مش معارض لفكره التحويل ولا حاجه)... بس تقريبا انا اعرف ان حضرتك شغال فى اتصالات فكنت عايز اعرف اسبابك لتفضيلها لان اكيد اسبابك غير المستخدمين لانك قريب من الشركه وتعرف اكتر فى الموضوع دا...
وشكرا مقدما

اقتباس:

---

المشاركة الأصلية كتبت بواسطة medo_2060

استاذ احمد... كل سنه وحضرتك طيب....
كنت عايز اسأل حضرتك ليه بتفضل اتصالات (وانا على فكره معايا اتصالات يعنى مش معارض لفكره التحويل ولا حاجه)... بس تقريبا انا اعرف ان حضرتك شغال فى اتصالات فكنت عايز اعرف اسبابك لتفضيلها لان اكيد اسبابك غير المستخدمين لانك قريب من الشركه وتعرف اكتر فى الموضوع دا...
وشكرا مقدما

---

انا طبعا شغال في اتصالات فعمر كلامي ما هيبقى محايد :)

اقتباس:

---

المشاركة الأصلية كتبت بواسطة أحمد كمال

انا طبعا شغال في اتصالات فعمر كلامي ما هيبقى محايد :)

---

طب بعد اذن صاحب الموضوع ....
اولا كل سنة وانت طيب يا ابوكمال
ثانيا انا دلوقتى بقالى 11 سنة مع موبينيل وحاسس انى بدفع كتير ( اشتراك شهرى - ستار 500 )
وكنت بفكر احول اتصالات بنفس الرقم ..... يا ترى ايه النظام

وهل لو عايز اجيب خط جديد كارت مدفوع مقدما بس يكون 011 ورقم كويس - هلى موجود ؟؟؟

بكرر اعتذار لصاحب الموضوع انى خرجت عنه

اقتباس:

---

المشاركة الأصلية كتبت بواسطة mido777

طب بعد اذن صاحب الموضوع ....
اولا كل سنة وانت طيب يا ابوكمال
ثانيا انا دلوقتى بقالى 11 سنة مع موبينيل وحاسس انى بدفع كتير ( اشتراك شهرى - ستار 500 )
وكنت بفكر احول اتصالات بنفس الرقم ..... يا ترى ايه النظام

وهل لو عايز اجيب خط جديد كارت مدفوع مقدما بس يكون 011 ورقم كويس - هلى موجود ؟؟؟

بكرر اعتذار لصاحب الموضوع انى خرجت عنه

---

التحويل من أي شركة في مصر لأي شركة في مصر كالتالي (لأن الاجراءات و اللوائح حاطاها الحكومة و على رقبة الثلاث شركات)

لو الخط في الشركة الحالية كارت:

هتروح فرع الشركة الجديدة و تقدم طلب و تدفع 75 جنيه و دول رسوم للحكومة عشان التحويل .....

عشان تحول محتاج بطاقتك + اسمك عند الشركة الحالية بالتهجئة بدقة (يعني Ahmad و لا Ahmed ..... علي و لا على .... إلخ)

بتستلم شريحة جديدة و في خلال اربع ايام الجديدة بتشتغل و القديمة بتتلغي (يعني مفيش انقطاع للخدمة) ..... بتحط الجديدة في التليفون و ترمي القديمة

الاجراء لو كارت بيبقى اسهل لذلك انصحك بتحويل خطك في موبينيل إلى كارت ثم التوجه لفرع اتصالات للتحويل (و هتحول على اتصالات فاتورة لو تحب على طول يعني مش هتقعد عالكارت غير 4 ايام بس :) )

-------------

لو خط فاتورة هي نفس الاجراءات أعلاه بس بيزيد عليها

بيتحسب لك متوسط اخر 3 فواتير + مكالماتك منذ اخر فاتورة

و دول بتدفعهم ديبوزيت عشان الشركة القديمة

يعني مثال عملي

اخر 3 فواتير ليك كانوا 500 و 400 و 600

و اتكلمت من ساعة اخر فاتورة ب 200

هتدفع (400 + 600 + 500) / 3 + 200

يعني 700 جنيه (غير ال 75 بتاعة التحويل)

و بعد ما خطك القديم يتقفل و تطلع لك اخر فاتورة ..... الشركة الجديدة بتسدد للقديمة كامل المبلغ (ال 700 جنيه)

و انت بقى تسوي حسابك مع القديمة

يعني لو طلعت فاتورتك الاخيرة 800 هتدفع 100 جنيه

طلعت 400 هتاخد من الشركة القديمة 300 جنيه .......

لذلك انصح بالتحويل للكارت ثم التحويل من شركة لشركة

طيب ينفع أغير للشركة الجديدة بنفس الرقم ولا لازم أغير الرقم ؟

اقتباس:

---

المشاركة الأصلية كتبت بواسطة sherif_84

طيب ينفع أغير للشركة الجديدة بنفس الرقم ولا لازم أغير الرقم ؟

---

أكيد ..... امال الموال ده كله ليه؟ عشان تنقل محتفظا برقمك :)

لو عاوز تنقل من غير رقمك مش محتاج الكلام ده كله هتشتري رقم من الشركة الجديدة و تلغي الرقم القديم و خلاص :)

اقتباس:

---

المشاركة الأصلية كتبت بواسطة أحمد كمال

انا طبعا شغال في اتصالات فعمر كلامي ما هيبقى محايد :)

---

حضرتك فهمتنى غلط يا استاذ احمد انا مش بتهمك بانك مش محايد عشان شغال فى اتصالات.. انا قصدى انك عشان شغال معاهم وعارف نظامهم عندك اسباب مثلا تفضلهم والاسباب دى مش واضحه لينا عشان احنا مش فى الشركه بعكس حضرتك
ارجو انك تكون فهمتنى ... ورمضان كريم

واضح ان ناس كتير بتفكر ف التحويل من فودافون لاتصالات

كنت علي وشك احول لفودافون الكارت علشان ادخل في نظام المحاسبه بالثواني لكن كنت متردد بسبب موضوع سرقه الرصيد ده

كده هتخلوني الغي الفكره خالص :( مش معقول هقعد اطابق رصيدي مع المكالمات كل شويه

ومش هينفع احول اتصالات برقمي الخاص للأسف الشبكه ضايعه في اماكن كتير وفي البيت مفيش خالص (أكتر من بيت) لأن معايا خط الشغل اتصالات في نفس التليفون وكذا مره ببقي عايز ارزع التليفون في الأرض علشان اخلص من تقطيع الصوت وسوء الشبكه اللي يجيب الضغط

فليبقي فودافون إيزي وما باليد حيله

انا شحنت ب25جنيه فودافون وبعتولى رساله
انى ربحت 420دقيقه مجانيه للاتصال بارقام فودافون
لمدة اسبوع من الساعه 12مساء الى 6مساء اليوم التالى

طيب سؤال في حالة تحويل كل خطوط الشركة بتاعتي حوالي 15 خط
من فودافون لاتصالات
ازاي بيكون التعامل؟
انا زهقت من ام فودافون
لصوووووووووووووص رسمي فهمي نظمي

تصدقوا انا كمان بفكر اغير من فودافون لاتصالات , و ان شاء الله قريب

فودافون مفيهومش اي حاجة مغرية !!

بس فودافون تعتبر احسن من موبينيل فى النصب موبينيل دى شركة .................

انا لسة محول لفودافون من بعد 4 سنين مع موبينيل

واتصالات احسن منهم بكتييييير ش

انا كمان بفكر من مدة اجيب خط اتصالات , من الاخر فودافون بقت بخيلة اوى :(

اقتباس:

---

المشاركة الأصلية كتبت بواسطة pro_samir

كنت علي وشك احول لفودافون الكارت علشان ادخل في نظام المحاسبه بالثواني لكن كنت متردد بسبب موضوع سرقه الرصيد ده

كده هتخلوني الغي الفكره خالص :( مش معقول هقعد اطابق رصيدي مع المكالمات كل شويه

ومش هينفع احول اتصالات برقمي الخاص للأسف الشبكه ضايعه في اماكن كتير وفي البيت مفيش خالص (أكتر من بيت) لأن معايا خط الشغل اتصالات في نفس التليفون وكذا مره ببقي عايز ارزع التليفون في الأرض علشان اخلص من تقطيع الصوت وسوء الشبكه اللي يجيب الضغط

فليبقي فودافون إيزي وما باليد حيله

---

أنا برضه فودافون ايزي وكنت ناوي احول لكارت علشان نفس الموضوع غير ال15% ضريبة الرفاهية على الفاتورة
وبالنسبة لسرقة الرصيد مبتفرقش من خط لكارت ....ده انا حاسس اني بتسرق اكتر من لما كنت كارت
بس شايف اننا نستنى ممكن العرض ده ينزل لعملاء ايزي زي ما باقي العروض بتنزلهم بس متأخر قوي
وساعتها هيبقى جمعنا كل المزايا ان شاء الله

انا غيرت اتصالات

انا شحنت ب 15 وكسبت 3 ساعات و بعد ما اتكلمت سألت عن الرصيد لقيته زى ما هو

بصفة عامة باتابع دايما ملخص المكالمة والرصيد لأن بيبقى فيه اخطاء

بس اكتر حاجة مضايقانى لما حولوا كل عملاء الدقيقة الأولى ب 20 والباقى ب10 الى اول دقيقتين ب 50 والباقى ب 5
الفكرة مش فى الفلوس رأيى ان دى استهانة بالعملا ان تغير نظامهم من غير متاخد رأيهم

أنا ريحت دماغي وحولت إتصالات بنفس رقمي

بالإضافه اللي كل اللي قولتوه: أنا كنت متضايق جداً جداً جداً من كم الرسائل الدعائيه اللي بيبعتوهالي غصب عني

كل شويه ألاقي رساله من نوعية "حمل ألبوم تامر حسني قبل أي حد" والرسائل دية بتضايقني جداً وكلمت خدمة العملاء أكتر من خمس مرات وكل مره يقولولي خلاص يا فندم كده مش هاتجيلك رسائل تاني، كام يوم وألاقي رسائل تاني.

بعد أما رحت إتصالات عشان أحول واحد كلمني من فودافون عشان يقنعني ويغريني إني أقعد، لما قلتله إني متضايق من موضوع الرسائل ده جداً قال لي إنسى إن إحنا نعرف نوقفلك الرسائل دية عشان الرسائل دية بتتبعت لكذا مليون مستخدم مع بعض وما ينفعش نستثني حد منهم. وقال لي الموضوع ده زي مثلاً لو شركة الكهرباء هاتقطع الكهرباء عن حي بأكمله وإنت عاوز تستثني عماره واحده من القطع ده، ليه هي عمارة الريس!!!!!!!!!؟ وكان بيتكلم بثقه عمياء، سبته يتكلم لحد الآخر وبعد كده قلت له: بص أنا مش هاجادل معاك إذا كان الموضوع ده ينفع من الناحيه التقنيه ولا لأ عشان ده مش مجال تخصصي, لكن كده يبقى إنت يا إما خدمة العملاء بتشتغلوني، عشان هم بيقولوا ينفع نوقفلك الرسائل وإنت بتقولي مستحيل!

لقيته بصراحه مش عارف يقول لي إيه بس بعد أما كان بيتكلم بثقه عمياء إن الموضوع ما ينفعش نبرة الثقه دية راحت وقال لي أنا متأكد بنسبة 95% إن الموضوع ما ينفعش لكن هارجع أسأل وأرد عليك بكره، ورد علي تاني يوم فعلاً وقال لي إنه سأل الناس وقالوا له إنه ينفع نوقف الرسائل فعلاً وإنهم فعلاً وقفوهالي!

بس أنا كنت واخد القرار إني أحول إتصالات وإتأكدت إني قراري صح بعد مكالمة الأستاذ بتاع فودافون.

يعنى الواحد لو هددهم انه هيحول شبكة تانية بتفرق معاهم!!!!!!!!!

يااااااااااااااااااااه

أنا الحمدلله خلصت من القرف ده من أول ما إتصالات إشتغلت وكنت من الناس اللى حاجزين أرقام من على النت قبل ما تشتغل

وأول ما إشتغلت رميت كل الخطوط الظريفة اللى معايا سواء فودافون أو موبينيل

فعلا كانوا بيسرقوا مني فلوس بالعبيط ومرة آخد بالي ويرجعولي الفلوس تاني وعشر مرات لأ

لكن إتصالات من ساعة ما إشتغلت عمري ماحسيت إن الرصيد بتاعي راح بدون سبب منطقي من ساعة إشتغلت لغاية إنهاردة .. غير يمكن مرة واحدة فقط وماكنتش متأكد هل أنا صح ولا خطأ عشان كده طنشت

غير إن الشبكة بتاعتها ليست سيئة على الإطلاق وجودتها تنافس جودة فودافون خصوصا بعد ما فودافون شغلت الجيل التالت وهي لم تكن مستعدة لها ودا أدى لهبوط كبير جدا جودة خدماتها من ساعتها