الموضوع: تخيلوا اتظلم فى تقدير ماده بسبب ماتش مصر و الجزائر اللى فات

المشاركة الأصلية كتبت بواسطة medociv

واحد زميلي قعد يسقط 3 سنين ورا بعض وبال 8 مواد وفي مواد حالين قريب من بعض وفي الاخر اكتشف ان ادكتور كان زعلان معاه وفي صاحبه شغال في الكونترول كان مظبط صاحبي ده نفخه
حسبنا الله ونعم الوكيل

مش هقدر اقولك غير ان الكلام ده مستحيل يحصل
مفيش حاجة اسمها ان دكتور يجامل زميله وعلشان بيشتغل في الكنترول يسقط طالب 3 سنين في 8 مواد
مش دكتور واحد اللى بيبقي في الكنترول والنتيجة بتعدي على اكتر من دكتور ما بين قراءة الدرجة على ورقة الاجابة ومراجعة لاقراءة وكتابة الدرجة في نسحتين على الاقل ثم مراجعة المكتوب وكل عمل من دول بيقوم بيه دكتور مختلف يعني لا يمكن يحصل اللى قلته
ولو حصل صاحبك كان قدم بلاغ للنيابة العامة ولو ثبت ان فعلا درجاته اللى اترصدت غير الموجودة بالاوراق كانوا اتحبسوا فيها زي ما حصل مع وكيلي كلية طب القصر العيني من كام سنة وكانوا مغيرين نتيجة اولادهم علشان يبقوا من الاوائل
بلاش نصدق كل كلمة بتتقال لنا

المشاركة الأصلية كتبت بواسطة kh_talaat

للأسف نسبة كبير من دكاترة الجامعه بيبقوا معقدين نفسيا وشبع من بعد جوع ... لكن دة طبعا لا يمنع انه منهم ناس محترمة

توجه لله تعالى ... وقل حسبي الله ونعم الوكيل وثق ان الله لن يضيع حقك

زيهم زي اي فئة في المجتمع لكن الاغلبية ما زالت صالحة واحسن من فئات كتير جدا في المجتمع المصري

المشاركة الأصلية كتبت بواسطة zalpany2000

يا باشا تقدر تقول جوع بعد جوع :)
eng/muhamad
انا عايز اقولك اولا ربنا يكرمك و يوفقك ان شاء الله و ماتأثرش الماده دي علي تقديرك النهائي
بس انا عايز اتكلم معاك شوية عن مشكلة صغيرة معظم الطلاب مش بياخدوا بالهم منها ... للاسف الشديد كتير من الطلاب بيتعاملوا مع المعيدين بطريقة مش لطيفة وبيفتكروا ان المعيد ده زميلهم ومعاهم في الدفعة و بيهزروا معاهم جامد من غير ما يحطوا حواجز ... فيه ناس مش بتعترض علي اساس ان الطالب لازم يحس انه قريب من الطلاب وانه بحكم برضو انه مش في سن كبير قوي عادي انه يبقي بسيط ومش بيعمل نوع من انواع الحواجز مع الطلاب... لكن للاسف بنسبة كبيرة الطلاب مش بتعمل اعتبار برضو لفرق السن و الوضع و بياخدوا الموضوع تسليه انه بيهرج مع المعيد ده وبيحرجه وهكذا... ونظرا لان الفئة دي برضو صغيرة سنا نسبيا يعني فبيتاثر بالعلاقة الاجتماعية مع الطالب و بيكون فكرة عنه ممكن تنعكس علي درجاته ... وده غلط و قليل قوي اللي بيعرف يفرق بين الاتنين ... انت بتقول هرجت معاه وغلستوا علي بعض ... يمكن تكون اتكلمت بطريقة فعلا تضايقه وانت مش حاسس وبناء عليه هو كون عنك فكرة انك مش كويس وبالتالي أثر علي تقييمه -وده ما يعفيهوش من المسئولية- وادالك تقدير اقل، لكن عايز انبهك انك كنت ببساطة تقدر تتجنب الحاجات اللي من النوع ده مع الاشخاص اللي ماعندهمش تفهم للهزار و اي كان برضو تحافظ علي مسافة أمان . للاسف ان فعلا وسط الاكاديمين في الجامعات عندنا بتراوح بين الناس اللي بتتبني مبدأ الاحتكاك بالطلاب والتباسط في التعامل وحذف الفروق والحواجز ... ودول فيهم ناس ناجحين جدا .. وناس متذبذبين
والدكاترة اللي متبنين الاستيل الانجليزي الصرامة والجدية وعدم ترك مساحات اجتماعية للطلاب

وبين الدرجتين دول فيه ناس كتير
اللي يهمني في الاخر انك تقدر تفهم شخصية الدكتور - المعيد او الهيئة المعاونة وعلي الاساس ده تتصرف وما تتضايقش ان فيه ناس مقفلة .. كل واحد ليه شخصية
و ان شاء الله تعزمنا بقي عزمة كبيرة علي الامتياز باذن الله
اسف للاطالة
وتقبل تحياتي

يعني لو مقولتش اول جملة كان كلامك كله بقة 100 / 10

المشاركة الأصلية كتبت بواسطة eng/muhamad

انا فاهم كلام حضرتك و عارف بتعامل مع كل معيد ازاى و مع كل دكتور ازاى
كل واحد حسب شخصيته
الغريب فى الموضوع ان التيرم اللى حصل فيه الكلام و الهزار ده انا كنت معاه فى ماده و كان فى ايده اعمال سنه و يقدر ينقصنى فيها لكن هو معملش حاجه
لكن جاى بعد الموضوع بتيرم يعمل كده اشمعن؟؟؟؟؟؟؟؟؟؟
كان ناسى يعنى و لا ايه و لا عشان درجات التدريب اكبر من درجات الماده اللى كنت معاه فيها ؟؟؟؟؟؟؟؟؟؟؟؟؟؟؟؟

متهيالي كدة يبقي صعب سقطك علشان الهزار بتاع الترم الاول
ممكن فعلا يكون فيه خلل في درجاتك
او فيه سبب تانى

المشاركة الأصلية كتبت بواسطة baskota

انا فى دكتور قالهالى واضحة وصريحة قبل الامتحان ماقدرش ادى اللى بيكتب 10 صفحات زى اللى بيكتب صفحتين
اقوله يا دكتور ماهو ممكن يكون اللى مكتوب فى الصفحتين اهم من ال 10
يقولى بس برضه هو كتب كتير

ودكتور تانى اختلفت معاه فى النقاش حول ازمة الهوية شايلنى المادة وده كان فى تمهيدى الماجستير
ومادة يعنى تعيد السنة كلها
تخيل
تفضل متفوق طول حياتك وتشيل مادة فى تمهيدى
وتعيد السنة كلها عشان اختلاف فى وجهة النظر
ربنا يهدى

كلامه صحيح طبعا بس تفسيره غريب شوية
واكيد طبعا اللى بيكتب 10 صفحات لو صح احسن بكتير من اللى بيكتب صفحتين بس وصح
الصفحتين دول في الكليات النظري ممكن يبقوا العناوين بس
وازمة الهوية ؟ انتى مش بتدرسي طب يا بسكوتة ؟؟؟؟؟؟؟؟؟؟

المشاركة الأصلية كتبت بواسطة nabaster

خلاص يا جماعه

لاني فعلا معاكم بدات افتكر الي فات من بعد ما بدات انسي

احمدوا ربنا وقولواا الحمد لله



حسبي الله ونعم الوكيل فيك يالي ظلمتني

a.yakout

انت تاريخ يا ياقوت
وبعدين انت حسبنت على الراجل ل 10 سنين ادام
ده انت مبهدله في كل المواضيع يا راجل

المشاركة الأصلية كتبت بواسطة kh_talaat

انا عارف طبعا ان كل فئة في المجتمع فيها الكويس وفيها الوحش لكن المشكلة ان فيه بعض الدكاترة وبنسبة كبيرة بيدعي المثالية وحاسس انه صفوة المجتمع ويحب دايما يتعالى على اللي حواليه بدون اي داعي ودايما النسبة دي لو رجعت لتاريخه هتلاقيه في الأصل كان انسان معدم اقتصاديا واجتماعيا ... عشان كدة بقول شبع من بعد جوع

على فكرة برضه في المقابل في دكاترة بيبقوا محترمين جدا ومثاليين فعلا لكن للاسف نسبتهم اقل كتير ... واعتقد الموضع اولا واخيرا ملوش علاقة بالفقر ولا الغنى لأنه نابع اساسا من التربية

اقرا رد دكتور حسام كويس هتلاقي فيه ردي

المشاركة الأصلية كتبت بواسطة zalpany2000

cairo2005
انا الكلمة اللي قلتها في اول كلامي دي ردا علي الاستاذ kh_talaat
واضح ان حضرتك هيئة تدريس و انت عارف كويس قد ايه مرتباتنا مش مرتبات اساسا .. وعلي الرغم من ده ... يبقي المبدأ ... فباشرح بس اننا زينا زي غيرنا ويمكن اقل ماديا من ناس كتير لكن العبرة مش بالماده زي ما المفروض المجتمعات السليمة تقول

استاذي الكريم انا مش متفق معاك اطلاقا في كلامك واضح انك شوفت نماذج مش طبيعية .. وبعدين موضوع المثالية مش ادعاء لان ده نمط حياة وزي ما وضحت فوق يمكن ده اللي فاضل عشان هيئة التدريس يحس انه انسان ، ومش كل هيئة التدريس يعني ميسورين و العملية لاعبة معاهم حضرتك فاهم غلط خالص :)
ده غير ان كون الانسان معدم اقتصاديا واجتماعيا بس نبغ علميا و تفوق ده مايمنعش اطلاقا من انه يبقي مثالي وعلي النقيض تماما انه يبقي فاهم الحياة كويس ... ومتواضع كمان :)

استاذ محمد دول مش آلهة يعني ممنوع الاقتراب والتصوير :))) وبجد الطبيعي ان الناس دي تبقي اكبر بكتير من اللي حضرتك بتقولو
لو انت بتتكلم يبقي الافراد اولي من الجمع لان انا واثق ان ده مش حاله عامة، الدكتور او المدرس المساعد ا وحتي المعيد بيستمد نجاحه في الاساس من نجاح الطلاب مش أكتر.

د حسام ارجوك وحياة الغاليين عندك ما تفكرني بحكاية المرتبات
على فكرة امبارح رئيس الوزراء خبط التصريح عشر تلاف وعشرتاشر عن زيادة المرتبات وكلمني شكرا طبعا مفيش كالعادة

وطبعا دكاترة الجامعة مش الهة لكن انت اكيد بتتفق معايا ان ما زال الافضل هم الاغلبية وان امثال المعيد المكتوب عنه الموضوع اقلية والحمد لله رغم كل الظروف والمعوقات وموضوعذاب بس موضوع ممنوع الاقتراب او التصوير والله ما بيحصل وكل سنة في نهاية الدراسة مش بخلص من موضوع التصاوير ده كل شوية حد عايز يتصور صورة للذكري (طبعا الهباب وايام العذاب بس مش بيقولوا )

وحكاية ان دكاترة الجامعة ميسورين والعملية لاعبة معاهم زي ما انت قلت خليها على الله والله والله والله لولا مصادر دخل تانية بتدمر اعصاب الواحد ووقته كان زمان الواحد بيصوت من نص الشهر او ربعه

وحكاية ان الدكتور او المدرس المساعد او المعيد بيستمد نجاحه من الطلاب والله صحيح مليون في المية ومن ضمن عناصر الجودة التعليميةلو اتطبقت صح ان يبقي فيه نسبة من تقييم عضو هيئة التدريس بناء على راي الطلبة فيه (بس طبعا الكلام ده لو اتطبق في مصر اللى بينجح الطلبة هياخد اعلى درجة واللى بيديهم حقهم بس هياخد صفر )