الحمد لله اول حادثه ليا بالعربيه بس ربنا سترها
ازيكم ياجماعه
انا عملت حادث بسيط النهارده
الحكايه كنت مروح من الجامعه لحد ما وصلت قريب من البيت كدا وبعدين في شارع وانا بلف منه فا انا لسه واقف في اللفه كنت شايف واحد جاي بسرعه المهم انا مش في بالي لاني بعيد اساسا عنه ومستني يعدي مش عارف ايه الي حصل للراجل مسك فرامل جامد مش عارف ليه يمكن اتخض ولا كان سراحان مش عارف بالظبط ايه الي حصل ومقدرش يسيطر علي عربيته وعربيته كانت شاريد تقريبا موديل 70 ولا حاجه
المهم هوا مخبطنيش علي اد ما حكلي كل الصدام الامامي والخساير في الصدام بس الحمد لله اتحك نصه تقريبا وفيه حته من البلاستك بتاعها اتكسرت والفبر الي جوا طلع وكدا يعني بالاضافه لانو الصدام نفسه اتحك
بصراحه كنت مدايق جدا ونزلت لقيته راجل كبير وبما ان دي اول مره تحصل حاجه زي كدا ليا في مصر فا اتصلت علي واحد صاحبي فا قلي خده واطلعو علي القسم قلتله مش المفروض اكلم المرور يجي يعاين قالي محدش هيعبرك دلوقتي قبل الفطار بنص ساعه المهم فضلت حوالي 10 دقايق انا مش عارف اعمل ايه والرجل يقلي هتعمل ايه اقله مش عارف.المهم بتكلم مع الراجل وبقله ياحج دلوقتي انتا خبطلتي الصدام بتاعي وكنت بتجري جامد وحتي مش عارف ليه انتا مسكت فرامل مع انو الطريق كان مفتوحلك قالي لا انا مكنتش بجري.وبعد كدا عمل تليفون الراجل وقلتله نتصل علي المرور يجي يعاين ولا نطلع القسم قالي نطلع القسم قلتله خلاص اوكي بعد كدا.هوا حاسس انو انا محتاس ومش عارف اعمل ايه .فا قالي بقلك ايه هيا دي مش عربيتك صح؟
قلتله لا دي عربيتي فا قالي انتا متأكد قلتله يعني ايه متأكد اه دي عربيتي والراجل بدا يحس اني بدأت اتعصب وكدا
فا قلي خلاص بقا رمضان كريم ومش عارف ايه ومن هنا لهنا الراجل صعب عليا وقالي انا مش عايز منك حاجه ومش عارف ايه قلتله ياحج انتا الي غلطان يعني المفروض انا الي اعوز منك وانا في الاخر مش عايز منك اكتر من اني اعمل محضر علشان اضمن حقي في التأمين
قالي اصل المدام رايحه للدكتور وانا لازم امشي ومش عارف ايه ومش هقدر اقف اكتر من كدا .
وبس وراح فعلا مشي بس انا كنت اخدت نمر العربيه.وبعدين روحت وجالي واحد صاحبي وقالي تعالي نعمل محضر فانا بصراحه قلتله الراجل شكله غلبان مفيش حل تاني علشان التأمين قالي ممكن نعمل محضر ونقول انو مش عارفين مين الي خبطها فا فكرت شويه وبعدين قلت خلاص مش مشكله المسامح كريم وطلاما دا هيضمنلي حقي في التأمين خلاص كفايه.
رحنا القسم وعملنا المحضر وقالي بعد 3 ايام اروح النيابه واجيب صوره من المحضر من هناك وبس..
بصراحه انا مش عارف الي عملتو دا صح ولا غلط وايه الي المفروض اعمله بعد كدا
ومش عارف كمان لو العربيه دخلت التوكيل هتقعد كام يوم هوا المفروض انو اكصدام امامي كله هيتغير.
وربنا يكفينا شر الحوادث يا رب وقدر الله وماشاء فعل