استفسار هام جدا عن فيكترا 2000 استيراد خارج مواصفات

**medo_tourkey** · 21-08-2010 12:36 AM

السلام عليكم ورحمة الله وبركاته

اانا محمد تركي من بنها لو حد سمع عنها
ودي اول مشاركة لية في المنتدى
عايز حد يفيدني عن اوبل فيكتر مو 2000 استيراد خارج مواصفات 2000 سي سي
اللي بيجبلي العربة بيقول ان الموديل ده نزل منه 5 عربيات استيراد خارج
بيقول العربية فول اوبشن اوتوماتيك بتعمل كل حاجة في التوكيل حتى تغير الزيت
عايز اعرف ايه مميزات العربية دي وايه عيوبها لاني المفروض نازل اشتريها ان شاء الله بعد بكرة يوم الاحد فياريت تفيدوني بسرعةةةةةةةةةةةةةةةةةةةةة ةةة
والسعرالمناسب ليها كام تقريبا ؟؟؟؟؟؟؟؟؟؟
وجزاكم الله كل خير

**SrOrR4EvER** · 21-08-2010 12:42 AM

الكلام ده مش صحيح والعربيات دى منزلتش استيراد من برة
هتلاقيها متعدلة وصاحبها بيقولك كدة عشان يعرف يبيع العربية
بص احسن حاجة تعملها عشان تتأكد من الكلام ده تروح المرور اللى تابع ليه العربية وتشوف ملف العربية نفسها هتلاقى اكيد ورق الموتور على الاقل استيراد يعنى متسقط ومتعدل
العربية الوحيدة اللى نزلت من برة هى cdx ودى بدأ نزولها من سنة 2002 ونزل منها تقريبا 90-100 عربية وعشان تتأكد زى مابقولك روح المرور واتأكد
ومسألة ان العربية استيراد وبتعمل كل حاجتها فى التوكيل فدى مع كامل احترامى كدبة كبيرة من صاحب العربية
لأن فى منصور مينفعش يدخلوا عربية عندهم مش نازلة تبعهم والا التوكيل يتسحب منهم
زى بالظبط العربيات الحديثة الخليجى منها ميدخلش التوكيل ابدا
اتاكد تانى بنفسك من كل حاجة قبل مايحصل انك تاخد عربية متعدلة على انها نازلة كدة من برة

**فادى محمد** · 21-08-2010 12:50 AM

وعليكم السلام ورحمه الله اهلا بيك يا باشا ..
تمام زي ماقاللك سرور باشا اصلها مش اختراع علشان مايبقاش منها غير 5 عربيات فقط...وممكن تغلس وتطلب من البائع ورق الموافقه الاستيراديه - بص علي الازاز بتاعها لو لقيته كله مختوم عليه جي ام يبقي مستورده ولو مختوم د جريش يبقي مصري-اقلب الكنبه الخلفيه لو لقيت عليها بادج febi تبقي استيراد ولو موبيكو تبقي مصري

**tananybasha** · 21-08-2010 01:08 AM

شغل تجار
و كلام هبل
يا اما متعدله
يا اما مشدوده
انما 5 عربيات و عربيتين و الكلام الكبير ده مفيش
و ال cdx نزلها منصور فى 2002
و قبل كده اكيد منصور كان مش بيقبل دخول عربيات
و لو موافقه استيرادية استحاله تبقى فوق 1600

**hardman20060** · 21-08-2010 04:35 AM

قبل ما تشتريها اكشف عليها في التوكيل لو لقيت كل حاجه تمام ومقهاش اي رش جو والتكييف والعفشه وكله تمام يبقي من 60 ل 63 كويس اوي لو الموتور الايكوتك.

**medo_tourkey** · 21-08-2010 05:21 PM

اوكي هشوف موضوع الكشف عليها في التوكيل ده ايه ظروفه
بس ياريت اعرف تمن الكشف في التوكيل بكام تقريبا
هية تبع مرور مدينة نصر وموجودة هناك في حاجة قريبة من هناك للكشف عليها
سؤال تاني سامحوني انا زي اخوكم الصغير
تكاليف نقل العربية وترخيصها وضربيتها وكل ما يخص الحوارات دي يكلف كام ؟؟؟؟؟؟؟؟؟؟

**hardman20060** · 21-08-2010 05:49 PM

اعتقد ان تمن الكشف في حدود 300 جنيه
هتدفع في المرور حوالي 800 جنيه لو هتجدد سنه واحده اما مصاريف العقد المسجل مش عارف كام بالظبط المهم طبعا لو حصل نصيب خليه يجبلك شهاده مخالفات.

**medo_tourkey** · 21-08-2010 08:02 PM

هدفع 800 جنيه بالضريبة
وياترى ضريبتها كام عشان لو هجدد 3 سنين زي مالناس هتجدد
ومحدش قالي برضه اذا كان في توكيل قريب من مدينة نصر او حد قريب من مدينة نصر بس يكون ثقة اكشف عنده على العربية