-
مراكز الخدمة - سيتروين
مراكز الخدمة :
* مركز خدمة عز العرب :
* طريق القاهرة الأسكندرية الصحراوى
ت/ 5390601
* الإعلام :
ت/ 3025363
* الأسكندرية:
5003001/03
* مركز خدمة أمير و جوزيف :
ش ذاكر حسين - مدينة نصر
ت/2721412
*أتوماجد سيرفيس:
9ش الأربعين من جسر السويس - مصر الجديدة .
ت/22990888[/font]
-
سلام عليكم جميعا
حد جرب امير و جوزيف في صيانة ال AX يا جماعة انا رحت عز العرب الراجل اللي ما بنصلحهاش :shock: انا مش عارف اصلحها فين عزيزة دي :lol:
-
السلام عليكم
بصراحة أنا معرفش بس كل اللى أعرفه إن الناس بتشكر فى مركز خدمة أمير و جوزيف و هما بيشتغلوا فى السيتروين
-
انا سمعت كده برضه من كذا واحد بس عندهم C4 مش عربيات اديمة مافيهاش كمبيوتر زي ال AX ان شكلي هاجربهم و نحكم بعدها
-
يا جمعاعة منصحش حد بعز العرب و لا امير و جوزيف الاتنين غالييييييييييين موت
اعرف واحد عندو Ax طلبو منو 24000 جنية عمرة موتور و العربية سعرها 26000 جنية
و كمان واحد عندو اكسارا 2 الفتيش علق طلبو منو 12000 جنية
انا عندي Xara 1 و مجرب
و بقيت بتعامل مع ناس تانية خالص و اللي مش مصدق يروح برجلية و ربنا معااااااااه
-
ممكن يا أستاذ خالد تحط لنا أسماء و عنوانين الناس اللى إنت بتتعامل معاهم
-
في الاول مل سنة وانتوا طيبين بمناسبة العيد اعاده الله علينا بالخير و البركات.
أنا صلحت العربية عند امير و جوزيف و بصراحة ما حستش انهم كانوا غاليين ولا حاجة يالعكس المصنعية كانت معقولة جدا و قطع الغيار كانت اسعارها اقل من لما بشتريها من عند مركز قطع الغيار بتاع وسط البلد بتاعهم. مثلا غيرت جلب العفشة و ظبط الكربراتير و الكهربا و كل ده المصنعية 150 جنيه و هم امناء جدا جدا و حريصين على النظام لدرجة ان القسيس كان بعدي في الدور و ما دخلش قبل اي حد بالعكس دخل في دوره بالظبط. بس ما عجبنيش حاجة واحدة هي انهم ما بيكشفوش المشكلة ياعني لازم تقولهم المشكلة ايه بالظبط . انا كنت هاتجنن لان خبرتي محدودة جدا ومش مميز اي صوت او اي مشكلة فلما بقول في صوت مش مريحني بيطلب مني منين او ازاي او كده. بمعنى اصح ماتوديش العربية و تقوله صلحها لازم تقول صلح كذا و كذا...
-
يا جماعة دا بناء علي تجربة لاني عندي اكسارا و طلع عيني عقبال لما لقيت حد مريح في الاسعار و كمان شغلو
واحد فاتح ورشة في ناهية و اسمو خالد بس مش انا يا جماعة و اللة هو اسمو خالد خلف
و دا رقم تليفونو 0103770049
و بجد مش هتندم لانو فعلا متخصص جدا في الستروين و البيجو و انتو عارفين الاتنين بقو واحد
و علشان انا عارف ان مشكلة الستروين في بلدنا انها مش منتشرة كقطع غيار و ميكانيكية علشان كدة حاجتها مش رخيصة
دي نصيحة اخ و انتو احرار
-
انا جربت الاتنين عز العرب وأمير وحوزيف
الاتنين ذوق ومكان نضيف بس غاليين موووت .. كل ما هنالك ان فرق امير وجوزيف عن عز العرب حوالي 100 الي 150 ج في المصنعيه انما كل قطع الغيار سعرها عندهم زي بعض بالضبط
يعني مثلا لو عز العرب هيدفعك 350 مصنعية فقط عشان يغيرلك تيل فرامل وفلاتر امير وجوزيف هيدفغك 200 جنيه في شغلانه المفروض مصنعيتها متاخدش بالكتير 50ج من الاساس ده غير انهم دايما عندهم زحمة ودور طويل يعني اليوم بيروح كله عندهم..
فانا قررت اني اغير الحاجات اللي كل شويه باعملها تيل وفلاتر وما شابه عند اي ميكانيكي محترم -لو حد يعرف حد كويس يرشحه- لاني بصراحه استويت من الاتنين دول انما لو لا قدر الله هافتح حاجه في موتور ولا كده هاخاف صراحه وهاضطر اروحلهم فيها -ربنا ما يحوجنا لكده-.
بالمناسبة صحيح في استشاره سريعه .. بالنسبه لقطع الغيار زي التيل والطنابير والحاجات دي هل تغييرها بحاجات مش اصليه بس برضه صناعه اوروبيه عادي؟ لأنها بتفرق جامد في السعر مثلا التيل الاصلي ب 350ج والصناعه الاوروبيه من محلات في شارع ددمشقفي مصر الجديدة ب 225ج وعلي كده كل حاجه فيها 100 , 150 ج توفير ان مكانش اكتر فايه رايكم ايه قطعه الغيار اللي ممكن تجيبها كده وايه لازم تجيبه اصلي ؟
-
السلام عليكم جميعا
انا اسمى هشام عبد البر وحاليا عندى زد اكس بس لسه يا دوب بقالها خمس ايام لكن كان عندى قبليها ايه اكس لمدة خمس سنين.
انا فيه ميكانيكى مرتاح معاه اوى الحمد لله وكل بتوع الاجرة عارفينه اسمه محمد الابيض وده فى زينهم هو عيبه مكانه بس مش حلو فى بداية مطلع زينهم بتدخل شمال من عند مستشفى بروك الخيرى (بيطرى) وبعدين تانى يمين هاتلاقيه فى الوش
انا مرتاح معاه اوى هو فاهم كويس اوىىى فى الستروين وبيشتغل فيها هى بس وعنده حاجاتها كمان استيراد وممكن يجيب جديد بالطلب وارخص من امير وجوزيف شوية واسعاره اغلى شوية من اى ميكانيكى عادى لكن طبعا مش زى امير وجوزيف . انا راى مثلا ان امير وجوزيف تروحلهم لو حاجة محتاجة ظبط بالكمبيوتر لو بتغير حاجة بيكسبو جامد من قطع الغيار وبيكسبو جامد من المصنعية.
-
السلام عليكم يا جماعه كل النقاش و الأسئله دى علشان تتختارو بين مركز خدمة أو مكانيكى في الشارع الأول بيحط قطعة الغيار الصح وعندة حد فاهم العربية اما التاني فبيتعلم فى العربية مش مهم ثمن قطعه الغيار ولا المصنعيه كام المهم هتعيش اد اية علشان كتر مشاوير التصليح مضعيه للوقت والفلوس
انا كان عندى اكسارا بيكاسو ودلوقتى معايا c5 وعمرى مأفتح الكبوت ألا عند حد فاهم لأني مش غاوى تجارب فى العربيه اللى بتقضى مصالحى
انما قطعه غيار مضروبه أو استيراد يكون ثمنها ما انقله لكم فى المرة القادمة
-
amir and joseph daaa 7araaaamy 27'er 7aga w bybawaz f el 3arbya aktar ma bysala7 w 7ara2ly el control unit bta3et 3arabyty el xsara 1 ana wadetlo el 3arbya bawazha aktar ma sal7ha kaman ma 3refsh yrakeb el tablooh sa7 w bwazly el cassete w alah 23lam bysra2 7agaat mn el 3arbyaat ely btetsaab 3ando ...ya3ny y2leb mnk mkn el 2zaz w yrakeblak bayz ybadel el compressor btaa3 el takyeef ya2leb mnk shwyet klebsaat da badly baraat el myzaan w rakeb 2 bayzeeen w wl 3arbya 7'adtha mn 3ando bt7def w b3d kda sal7tha bara w tooba en kont 2sala7 3ando tany da 2zbal 7d tsala7 3and citroen
-
انا لسه شاري اكسارا 2001 وعايز اسال علي الوش اللي بيركب فيه زراير رفع الشباك
-
إلى كل إللي راكب citroen c4 السيدان فقط أسعار قطع الغيار في عز العرب كالآتي :
1- فانوس أمامي .................1662 جم
2- فانوس خلفي ..................650 جم
3- مراية .......................960 جم
4- إكصدام أمامي ................2100 جم
5- إكصدام خلفي ................2675 جم
6- مساعد أمامي ................650 جم
7- مساعد خلفي ................790 جم
8- مقص ......................1400 جم
9- تيل فرامل أمامي ............550 جم
10- فلتر هواء ................165 جم
11- فلتر بنزين ...............95 جم
12- فلتر زيت .................90 جم
13- سير دينامو ................ 250 جم
14- سير كاتينة ................ 366 جم
15- بوجيهات .................. 250 جم
16- فلتر تكييف ................ 169 جم
17- طنابير أمامي .............. 789 جم
18- مارش .................... 2230 جم
19- طرمبة بنزين .............. 1825 جم
20- دينامو .................... 4495 جم
21- بطارية ................... 575 جم
22- وحدة BSM ( الكنترول + علبة الفيوزات بجوار الموتور ) ........... 2460 جم
23- ردياتير ................2020 جم
الأسعار دي على مسئوليتي من عز العرب الصحراوي بتاريخ 4-1-2010
Content Relevant URLs by
vBSEO 3.6.0 PL2