أنا أؤيدك 100% لأنى رحت مركز الصفا (وياريتنى ما رحت ولا شوفتهم) أشتكى من سحب البنزين العالى فى دايو لانوس .. وقلتلهم قبل ما يفكوا أى حاجة فى العربية إن لو فى تغيير للرشاشات بأخرى إستيراد .. أروح بالعربية الأول أجيبها من الحرفيين لأنى عايز رشاشات البى إم m40 لأنى عرفت من خلال المنتدى ومن تجربة بعض الأعضاء إتها ممتازة مع اللانوس وبتوفر بنزين وكلهم جابوها بسعر 200 ج استيراد .. وبعد الكشف الظاهرى أكدولى إن العربية مش هتحتاج غير تنظيف للرشاشات بالألتراسونيك فقط .. إنتظرت دورى وبعد 3 ساعات بدأ الشغل فيها وفكوا الرشاشات والمسطرة وشوية حاجات تانية عبيطة كده !! وبعدين قالولى هتحتاج تغيير رشاشات !!!!!!!! ... قلتلهم طيب ما أنا قلتلكم من الأول الكلام ده وانتوا قولتولى مش محتاجة !!! ... ما علينا ، قالولى هنغيرها برشاشات أكسنت إستيراد محترمة ومتجربة وكل واحد فيهم متقاس على جهاز مش عارف اسمه إيه وحسسونى إنى هركب رشاشات جاجوار ... قلت ماشى بس أخلص من الهم ده
ركبوا الرشاشات وقفلوا الشغل وبيجربوا لقوا الرشاشات بايظة !!!!!!!!!!!!!!!!! .. يا حلااااااااوة
فكوا الدنيا تانى وقعدت ساعة كمان وبعدين ركبوا الرشاشات اللى بعدها وقالولى تمام بس لازم تغير بوجيهات وفلتر بنزين وفلتر هوا قبل ما تتحرك من عندنا وإلا نبقى مش مسؤولين عن تلف الرشاشات اللى ركبناها !!!!!!!! ولأن مفيش جنبهم حد بتاع قطع غيار إضطريت أوافق على أنواع غريبة بيركبوها من عندهم وعمرى ما سمعت عنها ولا شوفتها قبل كدة .. المصيبة التالية إنى رحت عشان أحاسب لقيت الحساب 700 ج بعد الواجب والتخفيض !!!!!!
المصيبة التالتة: الصنايعى بعد ما طفى العربية قفلها وساب المفتاح جواها والعربية عملت لوك زجاج وأبواب على المفتاح مع إنى كنت منبه على الموضوع ده لكل واحد بيقرب من العربية ، لكن بتكلم مين ؟؟ لا أذن تسمع ولا عقل يفهم !! وطبعا قالولى مفيش مشكله .. عندنا صنايعى ممكن يفتحهالك مش فاكر بصراحة إسمه بس بصراحة شكله كان عامل زى المساجين والأغرب إنهم قالولى روح إتكلم معاه إنت برغم إنه شغال فى المركز!!!
إتكلمت معاه كأنى بكلم نفسى وماردش عليا ولا حتى بص ناحيتى .. سبته شوية وبعدين إتكلمت تانى .. فراح زاغرلى وقاللى جملة واحدة "لما أخلص الشغل اللى فى إيدى هبقى أشوفها" .. الصراحة الأستاذ محمد صاحب المركز إستضافنى فى مكتبه وطلبلى قهوة وقعد يتكلم معايا حوالى ساعتين على بال ما البيه فتحلى العربية وجابولى المفتاح ... شكرت الراجل وأنا متغاظ واديت الصنايعى اللى فتحها ده 10ج بقشيش طبعا ده غير الـ 20ج البقشيش اللى دفعتها للصنايعى اللى اشتغل فى الرشاشات (مع إنهم معلقين يافطة مكتوب عليها: ممنوع الإكراميات) !!! .. واكتشفت إنه بوظلى الكارتيرة اللى ناحيتى لأنه قطمها عشان يوصل لضفيرة الكهربا ويعمل فيها قفلة تؤدى لفتح الأبواب!!! مشيت بالعربية بعد إجمالى حوالى 7 ساعات ومصاريف 730ج بعد ما جابولى سكر وقرحة وضغط ... المصيبة الرابعة: بعد الكلام ده بأسبوع رحت أعمل تشيك على الشغل عند الميكانيكى بتاعى اللى بتعامل معاه من سنين بعد ما لاحظت دخنة سودا بتتطلع من الشكمان .. حط العربية على الكومبيوتر وشغل وطفى وفحص العربية وبص على كل حاجة وبعدين قاللى الرشاشات دى خلع مش استيراد وسيئة ولازم ترجعلهم يغيروهالك (للعلم هما بيدوا ضمان سنة على الرشاشات .. طبعا إبقى قابلنى) وقاللى إن البوجيهات زفت وشالها وركب البوجيهات القديمة بتاعتى لأنها كويسة !! وكمان لقى فلتر البنزين مجهول الماركة واللى لسة راكب من أسبوع مكتوم .. طبعا رحت اشتريت فلتر بنزين وفلتر هوا تانى بدل الزبالة اللى ركبوهالى فى مركز الصفا .. تانى يوم رجعتلهم عشان يغيرولى الرشاشات بناء على الضمان السنة بتاعهم .. طبعا إستغربوا من كلامى وإن الرشاشات بتاعتهم سليمة ومافيهاش حاجة واللى أنا بقوله ده عبارة عن وساوس شيطانية والعياذ بالله !!!!!!!!!!!!!!!
فى الحقيقة طبعا زى ما كلنا عارفين .. مفيش حد محترم بيطول حاجة من منعدمى الضمير ولا بيعرف ياخد حقه ولا حتى بالخناق .. طول ماحنا فى بلد فيها جهاز حماية المستهلك مجرد رقم تليفون ، وطول ماحنا فى بلد شعارها "الشكوى لغير الله مذلة" ... وشكراً