الموضوع: شرح الفتيس الاتوماتيك للصنى

بص حضرتك فتيس الصنى فتيس مش معقد وسهل جدا فى التعامل
حضرتك انتا اول ماهاتركب العربية تسمى الله اولا ودعاء الركوب وتتوكل على الله
1- تدوس فرامل للاخر وتضغط على الزرار النيكل اللى فى الفتيس
حتلاقى ست نسب او حارات فى الفتيس
1-p ودة اختصار لكلمة باركنج بيبقى متعشق لما تيجى تركن العربية وتقفلها وتمشى
2-rودة طبعا اختصار للريفيرس اللى هوة المارشليه
3-nودة اختصار للنورمال اللى هوة المور
4-dودة اللى بيحرك العربية لقدام وفيه الغيارات الاربعة بشكل اوتوماتيك طول ما انتا دايس بنزين
5-2 ودة بينقل الغيار الاول والتانى بس علشان يدى عزم اكتر
6-1 ودة بيبقى غيار واحد بس علشان عزم اكتر لو طالع مطلع جامد او حاجة
اهم حاجة انك تفضل دايس فرامل وامتشيلش رجلك من عليها خالص طول ما انتا بتغير فى الحارات السابق ذكرهم علشان لاقدر الله ماتكسرش اى تروس فى الفتيس
وعلشان برضة تريح الفتيس حاول انك ماتدوس فرامل وتعشق العربية على الd فترة طويلة
الو فى اشارة او زحمة سير او حاجة وخصوصا على مطلع لان دة بيجهد الفتيس
حاول انك تغير للn ولو محتاج الفرامل ارفع الهاند
وميزة الاوتوماتيك حاجة انك لو على مطلع وشيلت رجلك من على الفرامل العربية مش هاتريح منك لانها بتبقى متعشقة على الD
وفعلا الاوتوماتيك مريح جدا فى السواقة والزحمة
وربنا يباركلك فى العربية ويكفيك شرها
واى استفسار تانى انا تحت امرك

المشاركة الأصلية كتبت بواسطة dr.m.mowafy

وكمان نصيحه تانيه
اياك تجيب الفتيس علي p
والعربيه مش ثابته تمام
لان ده هايكسرلك التروس

معلش يا دكتور انا هوضح المعلومة اكتر
حضرتك لما تكون ماشي بالعربية اوعي اوعي اوعي تستخدم الزرار النيكل خالص لأنك ممكن و انت ماشي بالعربية غظب عنك الفتيس يجي علي r و يكسرلك التروس
انا هقول لحضرتك مفاجأة بس ارجوك اوعي تجربها لأنها حصلت معايا صدفة و هي غظب عني و من غير تركيز ضغطت علي الزرار النيكل و جبت الفتيس علي r لكن النتيجه الخطيرة اللي عملتها النيسان ليا عشان مزعلش ان العربية بطلت في ساعتها و ده يدل علي التكنولوجيا الرائعة في العربية الجميلة ديه
بس برده حضرتك خلي بالك لأن دي كانت عدم تركير و ربنا محبش يزعلني فارجو انك متجربهاش انا بس حبيت اقول لحضرتك ان العربية دي بجد جوهرة
ربنا يباركلك فيها و يديك خيرها علي طول