وانا كنت ماشى بالعربية من يومين بالظبط بسعة حوالى 80 -90 كيلو دخلت على زحمة فجيت امور وانقل غيار لقيت الفتيس حجر على الاخر كانه محشور وسط طوب ومش عارف ادى غيار خالص والا عارف اجيب المارش يدى الاولانى حاجات غريبة كده والله حصلت
وبعدين روحت للميكانيكى قاللى دى مشكلة رجلاش قام ظاطهالى وجيت امشى تانى بسرعه عملت نفس القصة
روحت رايح امبارح لميكانيكى تانى وقاللى انت عايز تغير المسمار اللى راكب على وش الفتيس ده اللى نب العقربة قام مغيره وقاللى خلاص المشكلة دى مش هاتحصل معاك تانى
بس الجديد بقى هى نفس المشكلة لسه بتحصل بس الجديد انه لما باجى اجرى مثلا واحرق النقلة شوية صغيرين مش جامد يعنى يعنى مثلا 10 كيلو زيادة على النقلة الاقى الفتيس حجر منى ومايرجعش تانى اللا لما اهدى السرعه شويتين كده
روحت للميكانيكى النهاردة قاللى زود زيت قمت مزود زيت على الاخر لحد مالقيت العربية النهاردة وهى واقفة نازل منها زيت كتير اوى ( مش عارف دى مشكلة تانية وللا لا ) والمهم حصل نفس المشلة والفتيس لسه بيحجر وقاللى لازم الفتيس يتحل ويتفور علشان نعرف العيب من ايه
وانا بصراحة مش عارف اعمل ايه فقلت الجالكم لانى عارف ان انتوا ناس فاهمة واللى اهم من كده قلبكوا على بعض وامناء