الموضوع: مواد درسناها و ملهاش لازمه

في الكلية .. لغة عربية و ادب و نحو ... تاريخ مصر الحديث و احصاء و هما يمكن حاجات عادية بس بعييدة كل البعد عن التخصص ... و حاجة ملهاش اي لازمة

المشاركة الأصلية كتبت بواسطة jisso82

أنا مع أغلب الأعضاء إن احنا بشكل عام فى مصر عندنا سوء تخطيط قوى فى الناحية التعليمية و توزيع المناهج و المواد و إنه فيه حشو كتير يكاد يكون مالوش لازمة و خصوصا فى المراحل التعليمية الأولى بس مختلف معاهم فى إن أغلب الحشو اللى بتكلم عنه بيبقى غالبا فى محتوى المادة مش فى المادة نفسها يعنى صاحب الموضوع على سبيل المثال معترض على دراسته للوورد و لا لوورد 97 بالذات لأنه لو بيتكلم عن البرنامج عموما الناس دلوقتى ما بتشتغلش فى أى شركة أبا كان تخصصها من غيره أما لو بيتكلم عن الإصدار فممكن يقوللى إيه الفرق فى الأساسيات بينه و بين 2007 يعنى هيلاقى التطبيق واحد و الفانكشنز واحدة و الاختلاف بس مقصور على الانتر فيس و شوية أوبشنز جديدة.
و أكيد الرياضة البحتة اللى بياخدها فى الكلية ممكن يبقالها علاقة مثلا بتطبيقات فى قسم النحت يعنى يكون فى حسبات لازم يقدر يعرفها عشان أبعاد المجسم تطلع مظبوطة مثلا يعنى أنا بخمن مش بفتى.
أما الهارد وير فحضرتك حسب كلامك كده بتدرس أساسيات بسيطة جدا يعنى يادوب بتعرف مكونات الجهاز و وظائف المكونات دى و دى معلومات عامة مفيدة جدا عشان التعامل مع الجهاز فى المستقبل عن خلفية بالمكونات الالى بتتعامل فيها
أنا أخدت حضرتك كمثال لأنك صاحب الموضوع و لكن اللى قلته ينطبق على باقى الأعضاء

معلش انا معترض تمام مع حضرتك
ورد ايه دا اللى ندرسه
يعنى انا شغلى كله يأما ب ال
photoshop.illustrator.indesign
اعمل انا ايه بالبتاع اللى اسمه ورد دا اى حد فى الدنيا بيعرف يشتغل عليه
دا حتى امتحان بتاعه كان open book يعنى كنا بننقل الكتاب ونرسم القوايم و كل اللى استفدناه شويه التريقه على الماده
- والهاردوير
طال فى فنون تطبيقيه يدرس ان المكونات الماديه لجهاز الحاسب الالى هى الكيبورد و الماوس والشاشه ,,
دا والله استخفاف بعقول الطلاب
يعنى يبقى فيه ناس بيدرسوا برمجه و هندسه عكسيه فى كليات وناس يدرسوا الهذى دا
والرياضيات البحته لرده ملهاش اى لازمه لا فى قسم النحت ولا غيره
لانى اشتغلت كتير مع اصدقائى فى نحت و مستفدناش ب 1%
انا والله بتكلم بكل حياديه و موضوعيه
لاننا استفنا من مواد تانيه زى الرسم الهندسى والمنظور الهندسى و المنظور الحر جدا جدا جدا جدا

درسنا في تجاره اسكندريه الكمبيوتر نظري
كان حاجه شلل فعلا

متفكرنييش بقى الموضوع ده اكتر حاجه كرهتنى فى الكليه

انا فى كلية تجارة انجلش جامعة اسيوط
كل الكليات التانيه يعنى مثلا جامعة القاهرة بنى سويف وكدهبياخدو 5 مواد فى الترم عادى جدا انا اخد ليه 7 ولا 8
كل سنة مفروض عليا السياسة متعرفش لازمة امها ايه انا مش محااامى انا بتاع بطيخ اخد سياسة ليه
زتانى حاجه اسمها اللغه انا اخد لغه ليه ما كل المواد بالانجليزى لا هما بقى صعايده ويدونى اللغه اللى بيدوها لبتوع عربى يا سبحان الله فعلا وكل ده ولما تيجى تتخرج تلاقى نفسك بالعافيه جايب جيد ولا مقبول وهما يجيبو جدا بالمرتاح عشان 5 مواد لاكن الباشا عندو 8 على اساس انى فى كلية تانيه لما اتعقدت وفى الاخر انا هاخد بكالوريوز زفت وهو نفس الكلام
بس فى الاخر ابتسم انت فى مصر .............

التعليم كله فى مصر فاشل فاشل فاشل

انا امتحنت مادة فى الكلية بتاعتى 12 مرة عارفين يعنى ايه 12 مرة

المادة هى ديناميكا واستاتيكا وهندسة فراغية وانا اصلا ادبى فى الثانوية وكنت فى قسم تربية اساسى دراسات

بالله عليكم قولولى ادرس المادة دى لييييييييييييييييييه بيدونى حوالى 30 مسالة يقولك احفظهم هما كده وخلاص طيب انا اصلا مدرستش الاساسيات بتاعتها

حاجة تجيب اسهال مع قئ مع حالة من التخلف العقلى

بدل ما يدينى مادة فى صميم تخصصى لالا يدينى مادة علشان ادفع تمن الكتاب بتاعها

المشاركة الأصلية كتبت بواسطة mazagngi2010

الحمد لله اشهد ان هندسه الزقازيق خصوصا هندسه اتصالات كل المواد اللى درستها مالهاش اى لازمه فى الحياه وفى شغلى رغم انى مهندس اتصالات مش بياع سمك يعنى نفس التخصص
material-رسم هندسى-وصفيه-رياضه -ديناميكا-استاتيكا-fluid-thermo-electronics-power-communications -control-t-فيزيا-انتاج
ومواد قدهم 3 مرات بس دول اللى فاكرهم
وكانوا بيضحكوا علينا وبيقول لنا كلام عبيط من عينه احنا بنديك الاساسيات وبنعلمك ازاى تفكر وكانت حاجات من الخمسينات وانقرضت والحمد لله بالفهلوه وتفتيح المخ بقينا بنشتغل ولا ادين بالشكر لاى دكتور ادانى اى حاجه من الحاجات الفارغه اللى قرفونا بيها
ربنا ياخد اتصالات الزقازيق
اعقم هندسه اتصالات فى العالم

حضرتك الحاجات دى مهمه جدا .. و مش هتحس بقيمتها الا لو سافرت بره و شفت مهندسين بجد .. مش مشغلين "operators" زى معظم الشغل اللى هنا فى مصر .. مثال انت لو هتصمم بروتوكول جديد للاتصالات أو تكنولوجى جديده ..زى ال جى اس ام مثلا أو البلوتوث أو ال دى اس ال .. او حتى ال AM و ال FM لازم تكون دارس و فاهم أوى ال communications و ال electronics و الحاجات اللى انت حاسس انها ملهاش لازمه دى .. انما مين فى مصر بيصمم حاجه زى كده؟ عاوز بأه تشتغل الشغل اللى فى مصر تاخد كورس "Introduction to windows 98" و تتعلم ازاى تعمل أيقونة على سطح المكتب و تنقر بزر الفأره الأيمن .

متفتكرش اللى شغالين فى شركات الاتصالات الكبيرة زى موبينيل و فودافون و اتصالات عملوا حاجه بايديهم .. بياخدوا كورسات ازاى يشغلوا الاجهزة و التكنولوجى اللى جايه من برة .. و اللى بيكون هناك فاهم أوى .. بيكون فاهم التكنولوجى شغالة ازاى .. انما ان احنا نصمم حاجه جديدة .. نطلع مثلا نقول أنا هعمل تعديل أخلى برج واحد يغطى مدينة باكملها .. عشان تعمل كدة لازم تدرس الكلام اللى مش عاجبك ده.

نصيحة أخيرة .. متنبهرش بحد .. خصوصا .. لو وحد مدرسش زيك و شفته شغال فى شركة كبيرة و حاسس انه بيعمل اللى متعملش .. انت لو قربت من وظيفته هتلاقى انها بسيطة جدا و سهل جدا انها تتعمل .. انما العلم بجد .. هو اللى مش عاجبك ده.