رأيكوا فى الفيرنا 2008

**vooooo** · 08-03-2008 08:38 PM

السلام عليكم
اخباركم ايه يا جماعه
عايز اسأل على الهيونداى فيرنا لأنى بفكر اشتريها لأنها فى فئه سعريه مناسبه و اعاده بيعها كويس
بس انا بين مجموعتين بيقولوا العربيه تحفه و جامده و سحب جبار علشان الموتور 1600 و ثبات كويس على السرعات و عفشه تستحمل شوارع مصر
و مجموعه تانيه تقول عربيه فاشله و رديئه الصنع و ده بيظهر فى الفرش و التابلوه ( و رأيى التابلوه ردئ فعلآ )
و مشكلتها الصاج ضعيف و البويه وحشه و بتعوم فى السرعات يعنى ثبات اى كلام و مشكلتها الكبرى الأتزان و الحدف اللى مالوش حل حتى فى التوكيل
شوفا مشكله الصاح و التابلوه البلاستيك ده مش هيفرق قوى معايا لكن اللى يفرق معايا الموتور و الثبات على السرعات العاليه
لأنى لو فى طريق سفر مش بقل عن 140 و للأسف ماجربتش الفيرنا خالص لكن جربت اللانوس و وحشه فى السفر

و دلوقتى واحد بيقولى ان فيه منها الكورى و ده اللى اجيبه و مفيش فرق سعر و بيشكر فى العربيه
فأيه رايكوا؟ غبور ولا الكورى ولا اكبر خالص منها مع العلم ان مش ناوى اخليها اكتر من 5 سنين معايا والله أعلم

**hesham2h** · 08-03-2008 10:28 PM

بص انا لسه جايبها من شهر ونص تقريبا

العربيه حلوه بصراحه ونعمه على الطريق

هو اللى يعيبها طبعا التقفيل المصرى والفرش والكلام ده وضوت الماتور عالى شويه

والحدفه دى طبيعيه فيها انا كنت جايبها بترمى يمين شويه

بعتها التوكيل

رجعت زى ما هى ولا عملوا فيها حاجه

بس كاسرعه العربيه سرعتها حلوه اوى ماتورها قوى وهى خفيفه فى جريتها حلوه

انا جربتها على طريق مصر السويس كنت ماشى 150 وكانت حلوه معايا

لو انت ناوى خلاص ورمتاح ليها اتكل على الله

وربنا يباركلك فيها ويديك خيرها ويكيفيك شرها

**arch_peter** · 09-03-2008 03:20 PM

فكر فى الفيفا لانها تقفيل ممتاز لونها من الداخل اشيك وكمان مرتفعه عن الأرض عن الفيرنا المصرية
متقفلة فى مصنع هيونداى الكورى اللى فى الهند يعنى تحت اشراف كورى ومتخصصين كوريين وقطع غيار داخلى وخارجى كورية
كمان الفول اوبشنز بتاعها هايل
طبعا الموتور 1500 مش 1600 زى الفيرنا المصرى

**Hossam.Hamdy** · 09-03-2008 09:38 PM

الفيرنا مفيش منها كورى جديد...موجود مستعمل 2004.
الصاج مش ضعيف اوى...احسن من الياريس و الالنترا الجديده..
انا معرفش ايه مشكلة التابلوه ,العربيه عندى من 2006 و التابلوه زى الفل...
الثبات ممكن تحلها و تركب جنط بيفرق جامد..
العربيه بتسحب حلو و جرايه...والتكييف تمام...
موضوع الحدفه ده مش عارف ليه موجود فى الموديلات الجديده ان معنديش حدفه ..هى عايزه تضبيط زوايا عند حد كويس ..ارابكوم مثلا...
الفيفا اكيد متجبهاش لانها شكل قديم المفروض كان ينزل سنة 2002 و 2001 موجود فى كل العلم من زمان..
الثبات بتاع الفيفا ضايع...بشوفها قدامى لما يكون فى حد بيجرى بيها بتكون زى المراجيح...
زنصيحه هات الفيرنا الشكل العادى 1500 كامله جميع الكماليات...صوت الموتور بتعها مش عالى زى 1600 و سحبها احسن..الكلام ده عن تجربه...
على فكره اغلب الفيرنا فى اوروبا و كوريا 1500 زى الاكسنت القديمه...عشان شوفت صور كثير لمواتير عربيات هناك زكانت 1500

**ddooddyy** · 10-03-2008 10:51 AM

معايا فيرنا 1600cc كاملة مانيوال
وأنا شايف إن مميزاتها :
1- موتور حديث وناعم ورهيب 1600cc
2- تكييف قوى
3- صالون واسع
4- كماليات إضافية (4زجاج كهربا-كاسيتCD و4سماعات-أماكن تخزين أكثر-كرسى السائق به دعامة متحركة للقطنية-مسند جنب للسائق-مرايات فى الشاماستين-stop& fog light- دركسيون متحرك-الكنبة قابلة للطى-2لمبة للصالون-سنتر وإنذر- ريموت كنترول السنتر فى المفتاح)
5-عفشة ناعمة وقوية
6-الفيرنا بتقفل العداد والRPM لسه عند5 أو6
7-الشكل الخارجى فخم (وده زوق نسبى من واحد للتانى)
8- إستهلاك البنزين أقل من أى سيارة فى نفس الفئة
9- سيارة منتشرة ومراكز صيانة منتشرة وقطع غيار رخيصة وده يرفع من سعر إعادة البيع
10- سعرها معقول جداً مقارنة بأى سيارة فى فئتها وبنفس الكماليات
وعيوبها:
1- صوت الموتور عالى نسبياً وده راجع لأنه 1600cc والكابوت من غير عزل والصوت بيخف بعد 5000كلم وتقريباً بيروح مع ال10000كلم
2- تقفيل مش 100% ممكن تديله 80% مقارنة مع المستورد
3- الكاوتش والجنوط مش تمام وده بيظهر مع السرعة (فوق ال140) ولكن تغيير الجنوط والكاوتش بيفرق كتير كتير

**vooooo** · 11-03-2008 01:22 PM

شكرآ على الرد

لكن فعلا القرار صعب
ناس تقول زود شويه و جيب نوبيرا و اهو كله قسط و ناس تقول النوبيرا وحشه
و شويه يقولوا زود شويه و هات نيسان صنى و ناس تقول ل دى وحشه
لدرجه انى بعدت تفكيرى عن الجديد خالص و بفكر دلوقتى فى رينو كيلو 2002 هاتشباك و برضه فيه ناس مش بتشكر فيها و ناس تقول تحفه ( احنا شعب جميل والله ) عمومآ العربيه ب 40000 و ماشيه 136000 كيلوانا شايف ان سعرها مناسب و برضه متردد لأن للأسف كلام الناس كتير و برضه المبلغ مش قليل علشان اندم عليه بعد كده
و تقريبآ كده فى الأخر مش هجيب عربيه والله أعلم و أرجع الفلوس تحت البلاطه تانى

و شكرآ مره تانيه للردود و الأهتمام

**Hossam.Hamdy** · 11-03-2008 01:35 PM

النوبيرا نفضلها خالص....الكليو قطع غيار غاليه....

**vooooo** · 11-03-2008 03:19 PM

النوبيرا فى فى دماغى دلوقتى خالص

لكن احب اعرف ليه انفضلها ( احب اعرف الأسباب علشان اقدر انصح غيرى )

و فعلآ انا سمعت الكليو قطع الغيار غاليه لكن هو موضوع تعود على اسعار قطع الغيار و انا متعود على اسعار الفولفو و دى اساسآ نار

**Hossam.Hamdy** · 11-03-2008 04:05 PM

الدايو اكيد حضرتك عارف ان هى شركه مش موجوده عالميا دلوقتى...

**eng / AhmeD** · 11-03-2008 04:58 PM

العربيات اللي في الفئة دي تقريبا هما الانوس و الفيرنا و الاسبيرانزا و الافيو و الكليو

1- الانوس انت جربتها و قولت مش مريحة في السفر خلاص سيبك منها

2-الفيرنا 1600 عيوب تصنيع شكل تابلوه مش قد كده خامات خفيفة موتور قوي سحب حلو ثبات مش قد كده بس ده نسبي اعتقد هي لحد 140 كويسة غير شوية مشاكل تقفيل و يميزها نتشارها الكبير و اعادة البيع بسهولة و علي فكرة الفيرنا الجديد موديل السنة دي فيه تقريبا عازل في الكبوت

3-الاسبيرانزا اوحشهم سمعة و أكثرهم في الكماليات و المفوض اقواهم في الموتور ده لو كان مظبوط و شكلها جديد و تابلوه شكله حلو و واسعة و صوتها الي حد ما واطي و ثبات ممتاز جدا في السفر و عفشة رياضية كويسة مع بعض مشاكل التقفيل بردو اللي بتتلاشي مع حداثة الموديل يعني فيه عيوب في 2006 مش موجودة في 2008

4-الافيو موتور جيد و عمره طويل بس عدد احصنة قليل و ثبات يعني مش اوي لحد 150 كويس و شكل شيك و تابلوه شيك بس اقلهم في الكماليات مفيش ازاز كهربا ورا في اي موديل مانيوال و توكيل محترم و مشاكل تقفيل بسيطة

5-الكليو اضيقهم و اغلاهم في قطع الغيار اوي و توكيل محترم و نعومة جيدة جدا السحب علي قده و الثبات جيد

و ربنا يوفقك في اختيارك

الموضوع: رأيكوا فى الفيرنا 2008

LinkBack

أدوات الموضوع

عرض

رأيكوا فى الفيرنا 2008 - انشر الموضوع فى :

-

-

-

-

-

-

-

المواضيع المتشابهه

عربيتي الفيرنا ال 2008 Gtr

ايه رأيكوا في الالنترا 2008 مستعمل خليجي فتحة سقف ؟؟

استفسار عن الفيرنا 2008

ايه رأيكوا فى السيينا 2008

المقارنه بين الفيرنا 2008 - لانوس 2008

الكلمات الدلالية لهذا الموضوع

المفضلات

المفضلات

ضوابط المشاركة