سوبارو xt موديل 87 سبور باب واحد

**dodlyboy** · 26-08-2010 08:23 AM

انا قدامي عربية سوبارو xt موديل 87 سبور باب واحد فوانيس قلاب لو حد يعرفها ارجو يقولي اخبارها ايه و منين اجيب قطع غيار ليها عشان عايزة شغل جامد اوي و انا شفتها برة مصر صور و فيديوهات عجباني اوي بس نفسي اشدها صح..... هيا معروضة عليا ب 13 الف...انا من اسكندرية و ياريت اي حد بجد يفيدني في خلال يوم عشان ارد على الراجل و مش عايز اجبها و البس في الحيط.... مستني رد الناس الي بتفهم فيها....شكرا

**dodlyboy** · 26-08-2010 08:25 AM

قطع غيار ليها يا جماعة يعني كل حاجة... اكصدمات و فوانيس و عايز اسقط فيها مكنة و كل حاجة....عايز واحد بتاع سوبارو من الاخر

**raedegypt** · 26-08-2010 08:53 AM

مشكله العربيه دة بيعها تقيل ولايوجد لها قطع غيار الا عند التوكيل ومش كل حاجه تلاقيها دة فى الجديد فمابلك القديم وبعدين العربيات النادرة وكمان قديمه بتلاقى سعر دوبل بس لو وجدت القطعه المطلوبه من اصله . لان خلى بالك اى قطعه تعجز معاك ممكن توقف لك العربيه كلها .. فكر

**dodlyboy** · 26-08-2010 10:01 PM

الف شكر لييك يا باشا كلامك طمني و انا شكلي هصرف نظر عنها مع انها داخلة دماغي اوي بس بلدنا باة بلد الدايوو منهم لله الي كانو السبب.... عموما متشكر مرة تانية يا زعيم

**Alios** · 26-08-2010 11:15 PM

لو عاوز تجيب سوبارو ....

يبقى تفكر في موديل 99 و طالع .........

مشكلة السوبارو في اسكندرية ان مفيش حد بيبيع لها قطع غيار برا التوكيل ........ مفيش غير في القاهرة المحروسة .....

و مع ذلك ... السوبارو بدأت تكتر في اسكندرية الى حد ما .... ( تكتر لكن لسه ما انشرتش بشكل كافي ) .... :)

و بيني و بينك انا لو قدامي سوبارو 82 مش 87 كنت جبتها ......... بس لازم افكر برده في كل الجوانب ..... قطع غيارها و صيانتها ....

في ناس متخصصة سوبارو في القاهرة و يتعدوا ع الصوابع للأسف ....... و في اسكندرية مفيش واحد بيفهم فيها غير مركز صيانتها و مركز صيانتها ابقى قابلني لو جابوا لك قطعة غيار لموديل قديم زي 87 ... حتى لو جابوا , ح تدفع مبلغ و قدره ... يمكن اغلى من قطع غيار الجديدة .......

و كل اللي بيحصل للسوبارو من عدم توافر قطع غيار في مصر المحروسة إلا القاهرة .... و من عدم توافر صيانة برا التوكيل بجميع أنحاء مصر ....... كدا اللي بيحصل دا بسبب الكوري اللي ودى السوبارو في داهية في مصر ..... رغم انها رايحة في داهية من اول ما نزلت مصر !!!!! :) :)

**SeaShark** · 26-08-2010 11:19 PM

مش هتلاقيلها قطع غيار خالص ولا حتي استيراد و مانصحكش دور علي حاجة تانية في نفس الرينج اللي بدور فيه و قولنا برضه و احنا معاك.

**dodlyboy** · 28-08-2010 09:29 AM

الف شكر يا رجالة بجد
:)
انا خلاص صرفت نطر و واضح ان صاحبها كان عايز يلبسني في الحيط
بس الحمدلله " لا خاب من استشار"
يا راجل دة انا دخلت على موقع الشركة الاساسي و كلمت واحد من الموظفين اونلاين و بسأله عايز اكصدامين لعربية سوبارو و الموديل و كدة الراجل قالي هروح ابص و ارجعلك...شوية و رجع قالي للاسف ملهاش اكصدامات في الاستوك عندنا ولا فوانيس خليفة...في فوانيس امامية لو تحب.... قولتله يعني في الشركة مفيش ؟؟ هههههههههه عايز يبقى موجود في مصرنا ؟؟ هيهاات يا عم...منها لله الدايو و الفيرنا و العربيات النص كوم دي بجد حرااام ...يلا الحمدلله

**SeaShark** · 28-08-2010 12:15 PM

طيب كويس انك وصلت للقرار ده و ابءي قولنا انت نويت علي ايه

**dodlyboy** · 29-08-2010 12:28 AM

نويت على جولف 2 انشاءالله يا باشا...بس ربنا يكرمني والاقي واحدة واقفة على حيلها صح لاحسن دي اكتر عربية في مصر بتتفرم.... يا مسهل

**SeaShark** · 29-08-2010 12:37 AM

عربية حلوة اوي و الماني و بيبان فيها التظبيط بس زي ما انت قولت اهم حاجة انك تلاقي حالة كويسة
انزل برضه سوق العربيات و دور هناك مش لازم تشتري بس اتفرج و شوف كده يمكن تتكعبل في حد محترم بيبيع
برضه عندي ليك اقتراح تاني في قناة اسمها اوتوموتو القانة دي بتعرض عربيات للبيع و بتكون العربية مصورينها من جوة و من برة كانك اتفرجت عليها و السعر بيكون مكتوب و انا بتفرج علي القناة دي ساعات عشان اشوف ايه المعروض
اتفرج عليها كده و شوف ممكن تلاقي جولف او تلاقي حاجة تانية تعجبك انت مكنتش واخد بالك منها
و ان شاء الله تقع في حاجة كويسه.