الموضوع: ::: الحقيقة في "فضيحة" الزمالك في قضية جدو بالكامل .. وامسك نفسك من الضحك! :::

قالوا الناس مجانين.. سيبنا جدو، ودفعنا لشيكا 15 مليون فى تلات سنين!!

(منقول من Zamalekfans)

مجلس ادارتنا الموقر بعد تصعيد قضية جدو وبشدة..وترهيب اللاعب وايهام جمهور الزمالك المكلوم باعادة حقه الادبى..فجأة وبدون اية مقدمات طلعنا طيبين وقرر مجلسنا الصلح مع جدو..بتقولوا ايه يا ولاد..صلح!!

اسمحوا لى ان اسرد خواطرى وانا اشاهد قرارات المجلس الغريب كصلح جدو المفاجىء فى الخفاء مثلما تفعل الحكومة فى قراراتها بشأن رفع سعر السلع او البنزين..وبعد مرارة هزيمة انبى بعدما توسمنا خيرا فى الموسم الجديد ليصبح حلمنا قبل كل بداية موسم"وردى"..ينتهى بنا ونحن نعانى من"شوكاته" وللاسف!!

*"قالوا الناس مجانين وسيبنا جدو وقررنا نبقى طيبين"..

فهنيئا لجدو بهذا الانتصار..كبرت دماغك وكتبت ورقة سيتناسها التاريخ؛كتبتها لتضحك بها على مجلس متهاون فى حق نفسه قبل حق الزمالكاوية..اما حق الزمالكاوية الذى صارت لغة الحزن والكآبه الراعى الرسمى لهم تم اهماله..فحقهم أُهدر امام مجالس تتوالى كما كانت ايام الاضمحلال فى عهد الفراعنة..اسر تتساقط دون تاريخ؛لان التاريخ لا يذكر سوى العظماء فقط!!

*"مصيلحى بتاع الاتحاد سيد الكل"
..تفتكروا بعد مصيلحى بتاع اعلان الفانتالوب..اللى قال عنه رئيسه ان مصيلحى فى الشغل سيد الكل..اللى لو باع ال300 الف ازازة حيكمل شغل..مين مصيلحى اللى طلع اجمد بكتير من مصيلحى بتاع الفانتالوب..اكيد مصيلحى الاتحاد السكندرى..بص يا سيدى..باع جدو بـ7ملايين..اخد 3 لاعبين من الاهلى..لبس الاهلى فى الزمالك..وبكل ثقة فاز بكل شىء..راجل زور..وباع واحد متباع..كسب فلوس..اسهمه ارتفعت..برافو يا مصيلحى بجد..صحيح..مصيلحى فى الشغل..سيد الكل..اخص على ادارتنا!!

"قالوا مجنون حد يفكر..يرجع للزمالك حقه..مادام فيه ناس متخاذلين"
.. تفتكروا بعد القرار اللى يحسسك ان جدو ماسك على الادارة ذلة..يمكن "سى دى" او شريط فيديو ولا قضية شرف مثلا لننسحب كما تضع النعامة راسها فى الرمال!!

*"قالوا الناس مجانين..ودفعنا لشيكا 15 مليون فى 3 سنين"
..تفتكروا مجلس جدد للاعب تمرد على ناديه قبل بداية الموسم..لاعب ادخل ناديه فى مشكلة مع نادى اوروبى داخل بكرشه فى القضية بكل ثقة..هل يمكن ان يجعلنا اقوياء امام كيانات كاتحاد كرة او المنافسين..تفتكروا التجديد لشيكا هو اللى ناقص لحصد الالقاب.. 5 مليون فى السنة كاملة..الم نتعلم ابدا ان هذه المبالغ تزرع الفتنة بين اللاعبين..للاسف نفس السيناريو يتكرر ولكن بتغيير اسم اللاعب..ولكن النتيجة لاشىء!!

*"قالوا معقول حد يفكر ان اللى جى اصعب من الست سنين"
..ست سنين ماضية دون القاب اللهم الا كأس يتيم..والبداية تعادل مع الحرس..ثم تلاها فوز مقبول على بتروجيت ختمها بهزيمة من انبى..فانقلب الجميع على حسام..مشكلة حسام انه يسمع كلام راسه فقط..والمصيبة فى ذلك ليست فقط بالسقوط فى مباراة او فقدان نقاط..ولكن هذه البداية تكررت نصية فى المواسم الماضية بالكربون..ورد فعلها اقالة المدرب..ونحن توسمنا فى حسام خير..واى رد فعل تهورى قد يقصف بامل كل زمالكاوى هذا الموسم..ربنا يستر بجد.

*"قالوا معقول يبقى عندك عبد الواحد..وتجيب الحضرى جنبه عشان تقلب طين"
..تفتكروا التصريحات الصبيانية للحضرى وقتما كان فى الاهلى وبعدها سيون فالاسماعيلى..ثم يكررها الان..تجعل قرار احضاره صواب للعب بجانب الوحش وحيد..تفتكروا وحيد ممكن يبقى فين السنة اللى جيه لو مالعبش 20 ماتش على الاقل السنة دى؟!.. كل هذه القرارات ستؤدى للاسف..لزيادة الاحتقان لدى الجماهير

خواطر اخرى:
*موسم المئوية..ينتظره ملايين الزمالكاوية بشغف..وقرار جدو المتخاذل يضعف الامل فى الاصلاح..وينعكس بالسلب على الفريق..ليه..ليه التخاذل بهذا الشكل المذرى يا ادارة؟!

*الى حازم امام تحديداً..هل أنت راضى يا كابتن عن هذا القرار؟..هل انت مبسوط من اهانتنا يا رمز..يا من حزن جمهور الزمالك اجمع لاستدعائك للنيابة..يبدو ان كرامتك فوقنا نحن..للاسف يا كابتن.

*هل يشعر اى واحد من بهوات المجلس بالكآبه الشديدة التى زرعوها فى نفس كل زمالكاوى..هل لديكم نخوة تجعلكم تنسحبون قبل ان يفوز مرتضى بالقضية ويصعد على ظهوركم..للاسف..سنعود لنقطة الصفر من جديد..اول مرة ارى مجلس يحاول بشتى الطرق ان يكره جماهيره فيه..ليه؟!!

*رؤوف جاسر..اذا كان لديك الشجاعة كما قلت وهددت بالاستقالة فلتفعلها.

*اكثر شىء يؤلمنى بشدة..ان الجميع عشق هذا المجلس من قلبه..ولكنهم خذلونا بدرجة لا توصف!!

اخيرا وليس اخرا..لست من مدرسة المتفائلين عمال على بطال..ولست متشائما لاجل موقف..ولكن حقيقة اصبحت كفة التشاؤم تتثاقل وتزيد..الموضوع ليست نتيجة انبى..ولكن قصة جدو ذات النهاية الكارثية ستترك رواسبها بشدة..الكل اصبح يشعر بمرارة ستنفجر مع هزيمة اخرى..وستظهر مشاهد انفعالات الجماهير وهى تنظر لمجلس الادارة فى المقصورة تصرخ وتتشاجر..هل سيستريح مجلس الادارة وقتها..للاسف..كنا نتمناكم مجلس تاريخى للمئوية..ولكنه من الواضح انكم تريدون مسح اساميكم من جدران النادى والتاريخ..للاسف..لا قول غير كلمة.."اخص على قرار تصالح جدو"..ولا تعليق اخر..شكراً!!

كلمة اخيرة سامحونى فيها:
كنت دوما اقول..لو لم اكن زمالكاويا..لوددت ان اكون زمالكاويا..وكررتها مرارا وتكرارا..و لو الدنيا كلها احمرت برضوا زمالكاوى..ولكنه وبعد الموقف المتخاذل..وطالما موضوع جدو انتهى بهذا الشكل..اسف ان قلت ان شعارى فى هذه المرحلة.." لو لم اكن زمالكاويا..لوددت ان يريحنى الله من تشجيع الكرة..للاسف!!" ..الله يسامحكم بجد..الامضاء..زمالكاوى حزين.