النهارده ياجماعه المارش أتصلح والعربيه دارت وزى الفل والحمد لله والتكلفه 105 جنيه شامله مصنعيه التركيب والفضل كل الفضل لعمنا الكبير طنانى باشا عشان لولاه كان زمانى لابس فى مارش أستيراد ب 300 & 400 جنيه غير تركيبه

الراجل المحترم ده ياجماعه ميعرفنيش ومعرفوش غير فى المنتدى وطبعا أنا عضو جديد

عمنا طنانى بقه بمجرد ما سمع بموضوع المارش ألا وجاله هسهس ولازم أشوفه ...

ياعم مش عايز أتعبك قوللى بس على كهربائى نضيف ....

لأ ملكش دعوه أنت هاتهولى يعنى هاتهولى ...

ياباشا مش عايز أعطلك يقولى ملكش دعوة برضه وقابلته وأديته المارش

والراجل تليفونه أتسرق وهو جايلى (حاجه تحرق الدم وفى رمضان كمان ) ومع ذلك أنسان بشوش ومبتسم وتحس من أول مره أنه أخوك ويعرفك من زمان

قاللى المارش هياخد يوم شغل عشان كان مدمر جلب وسوست وشربون وكوليهات
( الحرامى بتاعى كان مسلك منه حاجات عشان ميشتغلش تانى )
ومع ذلك أتصرف وجابلى ترس ألمانى وأتصرف معرفش منين وجاب السوست والكوليهات
وفى نفس اليوم قاللى المارش خلص والخراط عملك جلب محترمه بدل القديمه وبيلينه بس معلش هايركب بكره

( كأنه كده يعنى هايأخرنى مع أنى أنا اللى معطله عن شغله ومصالحه وقاعد على أيد الناس عشان تخلص بسرعه وتعمل الصح )

والنهارده كلمنى قاللى المارش خلص وهنجيلك بعد الفطار أنا والكهربائى ...

ياعم أبوس أيدك مش عايز أعطلك أكتر من كده ...
وأنت مالك قوللى بس أجى منين ....
ياعم دى بولاق دى الصين الشعبيه والناس فوق بعض يقولى خلص هاجيب الكهربائى وأجيلك

وفعلا مشوار محترم من الهرم لشارع ناهيا ومعاه الكهربائى وركب جرب تمام ..تمام

الكهربائى قاللى بطل تانى عشان مش عارف أيه مش مربوط كويس ...وربطه وكله تمام

طب ياعم أقعد عشان نعمل الواجب قاللى لأ والله عشان أروح شغلى

( يانهار أبيض بقيت فى نص هدومى وأنا فاكره أجازه ) وسايب برضه شغله وجايللى

كأنى أخوه أو صاحبه من زمان وكمان خد الكهربائى معاه وصله الأول وبعدين راح شاف شغله

والله والله والله ياعم طنانى أحرجتنى جدا بذوقك وأدبك وخدماتك اللى غرقتنى وأنت متعرفنيش وربنا يباركلك ويبارك فى أولادك ويجعله فى ميزان حسناتك ولو قعدت أشكرك من هنا لبكره مش هاوفيك حقك

هاسيب التفاصيل الفنيه لعمنا طنانى أتفضل ياباشا